Tobi si naca xpinni Cristu
4
Yeguayuaa purti rune xhiiña Señor.
Yáquexa ma ulí Dios laatu para gaca tu xpinni la?
rinaba laatu sa tu jneza.
2 Cadi udxiiba tu laca laatu,
sínuque lagaca nadóꞌ,
ne cadi casi ze tu idxiichi né tu stobi.
Lagacané saa ti ihuinni nadxii saa tu.
3 Ma biꞌni Espíritu Santu laatu tobi si.
Nga runi cadi chuꞌ dinde tu,
ti cadi ilaa saa tu.
4 Ti cuerpu si napa Cristu,
ne nga nga ca xpinni,
ne tobi si Espíritu nuu,
ne laca tobi si ni chi udii Dios irá nu.
5 Tobi si Señor nuu,
ne tobi si ni runi cre nu,
ne tobi si xi pur riuu nisa irá binni.
6 Laca tobi si Dios nuu,
ne laa nga Bixhoze irá nu,
ne riquiiñe laanu para guni nu xhiiñaꞌ,
ne nuu ndaani ladxidóꞌ no.
7 Peru cada tobi nu napa nu dxiiña ni zanda guni nu,
biaꞌ gracia bidii Cristu laanu.
8 Casi cá lu Xquiꞌchi Dios:
Dxi biasa be ze be ibáꞌ la?
gudixhe dxí be cani bicaa lú laabe,
ne bidii be gracia binni para guni xhiiña be.
9 Xi riníꞌ ni ra na ni “biasa be ze be ibáꞌ” yaꞌ.
Riníꞌ ni nirudóꞌ biete be ndaani guidxilayú.
10 Ne ni biete que ca nga ni gudxiꞌbaꞌ,
para cadi guiaana tobi si lugar,
sínuque chuꞌ irá ladu.
11 Gudixhe be caadxi xpinni be para gaca apóstol,
ne xcaadxi para güi né binni ni uluíꞌ Dios laa,
ne xcaadxi para sa né stiidxa Cristu,
gabi binni ximodo ilá,
ne xcaadxi para gaca pastor,
ne xcaadxi para gaca maistru.
12 Bidii be dxiiña que laaca para acané ca ca xcaadxi hermanu iziidi guni xhiiña Dios,
ti uzuhuaa chaahui irá xixé xpinni be.
13 Ne zuni cabe dxiiña que,
dede ora ma gaca nu tobi si lu ni runi cre nu,
ne gunibiáꞌ chaahui nu Xiiñi Dios.
Zacá zaniisi nu lu stiidxa Cristu dede idxiña dxi gaca nu casi laa.
14 Ne ma qué zinanda nu intiica nacubi ni canausiidi binni,
casi runi xcuidi,
ti dxi rarí,
sti dxi raricaꞌ.
Qué zinanda nu ni riguixhe binni nexhená para cuee chu laanu de ni jneza,
15 sínuque zinanda nu ni dxandíꞌ,
ne zanaxhii saa nu,
ti jma rusi gaca né nu Cristu tobi si.
Laa nga xaíque stinu.
16 Laanu zeda aca nu casi cuerpu stibe,
ne ma gudixhe chaahui be laanu casi nexhe chaahui irá ndaa lu ti cuerpu,
ne biꞌni be laanu tobi si,
casi guiꞌdi cada ndaa lu ti cuerpu,
para cadi iree cueꞌ nu.
Pa jneza cayuni cada ndaa de ti cuerpu dxiiña la?
jneza zaniisi binni que.
Zaqueca laanu,
pa cada tobi nu guni nu dxiiña ni gucuaa nu la?
ze dxi jma rusi ziuzuhuáꞌ chaahui nu ne ziyanaxhii saa nu.
Naquiiñe usihuinni xpinni Cristu nacubi xpida
17 Yanna chi tidxe laatu xiixa,
casi ñaca Señor cayabi ni laatu:
ma cadi ibani tu casi nabani cani qué runibiáꞌ Dios,
purti nabani ca casi na ique caꞌ,
ne abati zaquiiñe ni laacaꞌ,
18 ne nacahui xquenda biaani caꞌ.
Qué gapa ca enda nabani ni rudii Dios,
purti naguidxi ladxidóꞌ ca ne qué na ca guiene caꞌ.
19 Qué rituí lú ca guni ca intiica ni na ique caꞌ,
ne irá ni nadxabaꞌ,
dede biaꞌ gapa ca gana.
20 Peru laatu la?
cadi nga di nga biziidi tu ra biziidi tu stiidxa Cristu.
21 Pa dxandí stiidxa be bina diaga tu ne biziidi tu ni zeeda de laabe la?
22 ma cadi ucaa ique tu ni ucuá ique tu chiqué,
purti udxite si ni laatu biꞌni tu ni cadi jneza.
23 Ma naquiiñe usihuinni tu ma nacubi tu dede ndaani ladxidóꞌ to ne idubi xquenda biaani tu.
24 Naquiiñe ibani tu modo naguixhe Dios ne usihuinni tu dxandí ma adxé laatu yanna,
purti ma nayá xpida tu ne runi tu ni jneza.
25 Nga runi lausaana de usiguii tu,
ne ora güi tu diidxa lainíꞌ ni dxandíꞌ,
purti irá nu ma naca né nu Cristu tobi si.
26 Ne pa idxiichi tu la?
cadi udii tu lugar guiaazi gubidxa cadxiichi ru tu,
sínuque lauyubi tidi ni nagueenda.
Pacaa zuchee tu.
27 Cadi udii tu lugar aca xcustu binidxabaꞌ.
28 Ni uca gubaana la?
ma cadi cuanaꞌ,
sínuque ma iquiiñe ná para guni dxiiña jneza,
ti ganda gapa xiixa para acané cani qué gapa gastiꞌ.
29 Cadi iníꞌ tu diidxa ni guniná stobi,
sínuque lainíꞌ diidxa jneza ni zanda acané stobi uzuhuaa chaahuiꞌ,
ne ni acané tutiica guna diaga ni iníꞌ tu.
30 Ne cadi guniná tu Espíritu sti Dios,
purti uluu Dios laabe ndaani ladxidóꞌ to ti ihuinni ma sti laatu.
Ne ziaana né be laatu dede dxi gueda caa Cristu ca xpinni.
31 Lausaana de aca nanalaꞌdxi tu binni,
ne de idxiichi né tu laacaꞌ,
ne de chuꞌ tu xiana,
ne de guni char tu tuuxa o cuꞌ dí tu laa.
Lausaana de uyubi tu izaaca stobi xiixa.
32 Ni guni tu la?
lagaca nachaꞌhui ne stobi,
ne lailaselaꞌdxi saa.
Laguni perdonar saa casi bini perdonar Dios laatu ra guca né tu Cristu tobi si.