Gudixhe Dios Pablu chi güi stiidxa lade cani cadi judíu
3
Qué riaana dxie de inié nia Dios pur laatu.
Naa nga Pablu,
ne yeguayuaa yanna ri purti byue nia laatu stiidxa Cristu.
2 Zuluáꞌ ma nanna tu modo guca Dios nachaꞌhui ne naa,
gudixhe naa güe nia laatu stiidxa Cristu.
3 Biluíꞌ naa ni iruti ñanna chiqué,
bisiene pe naa de laani.
Ma ru bizeete ni lu guiꞌchi riꞌ.
4 Ne ora guꞌnda tu ni la?
zanna tu dxandí riene stiidxa Cristu ni iruti ñanna chiqué.
5 Chiqué qué nusiene Dios ni irutiꞌ,
peru yanna ma bisiene ni ca apóstol stiꞌ ne ca xcaadxi ni ruiꞌ stiidxaꞌ.
Espíritu stibe bisiene ni laadu.
6 Ndi nga ni biluíꞌ be laadu:
ma cadi ca judíu si chi icaa ni bidii stiidxa be udii be ca xpinni be,
sínuque né cani cadi judíu,
ra guni cre ca stiidxa Cristu.
Ne ma tobi si laaca ne ca judíu ni ma bini cre,
ne tobi si zacaa né ca ca judíu ni ma bidii stiidxa Dios udii cani guni cre Cristu Jesús.
7 Qué risaca diaꞌ,
peru gulí Dios naa güe stiidxaꞌ,
purti guca nachaꞌhui ne naa.
Ne zanda gune ni purti nuu né enda nandxóꞌ stibe naa.
8 Neca jma huaxiéꞌ risaca lade irá ca xpinni Dios,
peru gudixhe naa chiniá ca diidxa de enda nayeche lade tu,
cani cadi judíu,
para güe nia laatu pabiáꞌ risaca ni napa Cristu para laanu.
9 Ma xadxí gudixhe Dios ni bizáꞌ irá xixé ni nuu,
xi chi guni yanna,
peru qué nuluíꞌ be ni binni.
Yanna ma gudixhe be ni ladxi naya para güe ni.
10 Gupa be ni chiqué ti usihuinni be ni luguiá ca xpinni Cristu yanna para guꞌya cani nandxóꞌ ne irá cani risaca ibáꞌ pabiáꞌ jneza irá ni riguixhe be gacaꞌ.
11 Dede dxi caꞌru cha guidxilayú maca gudixhe be guseenda be Señor Jesucristu,
ne yanna ma guca ni gudixhe be que.
12 Laanu ma guca né nu Cristu tobi si ra bini cre nu laa,
nga runi ma zanda idxiña nu ra nuu Dios sin idxibi nu.
13 Hermanu caꞌ,
cadi chuꞌ tu triste ti cayacanaꞌya pur laatu,
sínuque laguieche purti zacá rihuinni pabiáꞌ risaca tu.
Naroꞌba amor ni napa Cristu para laanu
14 Ora rietenaladxe irá ni gudixhe Dios ne ni ma biꞌni la?
ruzuxiꞌbe xa ñee.
Laa nga Bixhoze Jesucristu Señor stinu.
15 Ne de laabe za irá xixé,
cásica cani nuu ibáꞌ zaqueca cani nuu ndaani guidxilayú.
16 Qué gapa enda nandxóꞌ stibe paraa iluxe,
ne rinaba laabe udii Espíritu stibe laatu de lú ni,
biaꞌ caquiiñe tu para uzuhuaa chaahui tu.
17 Rinaba laabe acané be laatu guni cre chaahui tu,
ti ganda cueza pe Cristu ndaani ladxidóꞌ to,
ne icaa xcu xpida tu lu amor stiꞌ,
ti qué lica iniibi tu.
18 Rinaba lu Dios gusiene laatu ne irá ca xpinni pabiáꞌ naroꞌba amor ni napa Cristu para laanu.
Zeda aca ni casi xiixa ni nabé nalaga,
ne ziuulaꞌ,
ne gueteꞌ,
ne nasoo.
19 Rinaba ganda guiene tu pabiáꞌ nadxii be laanu,
neca nanna iruti qué zanda guiene chaahui pe pabiáꞌ ni.
Peru rinaba lu Dios gusiene laatu xcaadxi ti idxá tipa ladxidóꞌ to de irá ni naca.