GUIꞌCHI BICAA SAN PABLU LU CA XPINNI CRISTU NI NUU COLOSAS
1
Naa nga Pablu.
Naca apóstol sti Jesucristu purti gudixhe Dios gaca ni.
Naa ne hermanu Timoteu
2 cucáꞌ du guiꞌchi ri lú tu,
hermanu caꞌ,
ca xpinni Dios ni nuu ndaani guidxi Colosas,
cani runi cre Cristu.
Dios Bixhoze nu cuꞌ ndaaya laatu ne quixhe dxí ladxidóꞌ to.
Caniꞌ né Pablu Dios pur cani ma bini cre
3 Cada iní né du Dios Bixhoze Jesucristu Señor stinu rudíꞌ du diuxquixe laa pur laatu.
4 Purti gunna du pabiáꞌ runi cre tu Cristu,
ne nadxii tu irá ca xpinni Dios.
5 Ne runi tu zacá purti dede dxi ucuaa tu ca diidxa ni dxandíꞌ,
ma nanna tu xi nuu chaahui para laatu ibáꞌ,
ne nga nga ni cá lú tu yanna.
6 Ne ma careeche ca diidxa que idubi naca guidxilayú.
Caree ndu ni,
ne cadale cani runi cre,
cásica huayaca lade tu dede dxi binibiáꞌ tu enda nachaꞌhui sti Dios ne gunna tu dxandí nadxii laanu.
7 Laani nga bisiidi Epafras laatu.
Nadxii du laabe ne huayuni né be laadu dxiiñaꞌ.
Biꞌni be xhiiña Cristu lade tu sin niree be gana.
8 Laabe gudxi be laadu pabiáꞌ nadxii saa tu,
casi racané Cristu ca xpinni ganaxhii saa.
9 Nga runi dede dxi gunna du ni,
qué huayaana dxí du de iní né du Dios pur laatu.
Rinaba du laabe udii Espíritu Santu enda biaani laatu ne usiene laatu ti ganna pe tu xi racalaꞌdxi be guni tu,
10 para ganda sa tu modo naquiiñe sa ca xpinni Señor ne guni tu ni jma chuꞌlaꞌdxiꞌ.
Zacá zaree ndu xpida tu,
ne jma ziyunibiáꞌ chaahui tu Dios.
11 Ne laca rinaba du laabe udii be stipa laatu ne enda nandxóꞌ stibe,
ti ganda guieche tu neca gueeda stale enda naná luguiá tu,
ne cadi ixhacalaꞌdxi tu,
12 ne ganda udii tu diuxquixe Dios Bixhoze nu saca bisisaca laanu ne uluu laanu ra nayaꞌni ti ganda icaa nu ni napa para ca xpinni.
13 Ulee be laanu lu ná guelacahui ne ma uluu be laanu lu ná Xiiñi be ni nadxii be.
14 Laa bilá laanu ne bixhá stonda nu ra guti pur laanu.
Irá ni biꞌni Xiiñi Dios
15 Qué randa riduꞌya nu Dios,
peru bisihuinni Xiiñi be tu naca be,
purti casi laabe Xiiñi be,
ne maca nuu Xiiñi be ante cha irá xixé ni nuu.
16 Dxi bizáꞌ be irá xixé ni nuu ibáꞌ ne ni nuu guidxilayú la?
Xiiñi be biꞌni irá ni,
casi ni rihuinni,
zaqueca ni qué rihuinni,
ni nandxóꞌ ne ni runi mandar.
Laa bizáꞌ irá ni,
ne para laa uyáꞌ ni.
17 Maca nuu Xiiñi be que dxi caꞌru cha irá ni,
ne laa naaze irá ni.
Nga runi nexhe chaahui ru ni.
18 Ne cadi nga si,
sínuque laca laa nga xaíque sti ca xpinni.
Laabe naaze be ca xpinni be.
Zeda gaca ni casi ti cuerpu.
Ca xpinni be nga cuerpu ca,
ne laabe nga ique ni.
De laabe biale cuerpu que purti nirudóꞌ laabe bibani be de lade gueꞌtu para isaca be jma que irá xixé.
19 Purti ucalaꞌdxi Dios aca be irá ni naca.
20 Ne laca pur laabe gudixhe Dios chuꞌ né irá xixé ni bizáꞌ tobi si,
cásica cani nuu ibáꞌ,
zaqueca cani nuu ndaani guidxilayú.
Guca ni ra guti be lu cruz.
21 Chiqué qué ñuu né tu Dios tobi si,
sínuque bicaa lú tu laa ra biꞌni tu ni cadi jneza,
peru yanna ma biꞌni pur chuꞌ né tu laa tobi si,
22 ra guti Cristu lu cruz dxi naca binni guidxilayú.
Ne biꞌni be ni para cuee chu be laatu de ni nadxabaꞌ,
ti idxiña tu ra nuu be ma nayá ladxidóꞌ to,
ne ma cadi dxiꞌba donda ique tu.
23 Peru naquiiñe cadi ichaacha tu de ni runi cre tu,
sínuque lauzuhuaa dxiichi casi ti yaga napa xcu gueteꞌ.
Dede dxi bina diaga tu stiidxa Cristu ma nanna tu xi cabeza laatu.
Yanna cadi ixhacalaꞌdxi tu de cueza tu ni.
Stiidxa be ca nga careeche idubi naca guidxilayú.
Naa naca tobi de cani canaucheeche ni.
Gudixhe Dios Pablu acané ca xpinni
24 Cayeche cadide ra nagana yanna para acaniá laatu.
Purti lu cuerpu stinne cazaa chaahui enda naná beda tidi Cristu pur ca xpinni.
Ca xpinni be ca nga cuerpu stibe.
25 Naa beda gaca tobi de cani runi dxiiña lade ca xpinni be,
purti gudixhe Dios ti dxiiña ladxi naya para acaniá laatu,
usiide laatu stiidxa sin usiaadxa gasti lú ni.
26 Ma biluíꞌ be ca xpinni be ni qué niná be nuluíꞌ be iruti dede dxi uyáꞌ guidxilayú.
27 Gudixhe be uluíꞌ be ni laaca ti ganna ca pabiáꞌ sicarú ni gudixhe be guni be para irá xixé binni.
Ndi nga ni gudixhe be gacaꞌ:
gapa tu Cristu ndaani ladxidóꞌ to,
ne zacá zasaca né tu laa ra nuu be.