Lauzuhuaa chaahui lu neza sti Señor
4
Hermanu stinne caꞌ,
nadxiee laatu ne ribana laatu.
Laatu nga enda nayeche stinneꞌ,
purti zeda gaca tu casi ti premiu ni bidii Dios naa.
Yanna racaladxe gabe laatu uzuhuaa chaahui tu lu neza sti Señor.
2 Rinaba hermana Evodia ne hermana Síntique chuꞌ ca tobi si,
purti benda ca neza Señor.
3 Ne lii la?
hermanu,
bini neu naa dxiiña sin nixhacalaꞌdxuꞌ.
Rinaba lii acanéu ca gunaa ca purti huayuni né ca naa xhiiña Cristu,
laaca ne Clemente ne xcaadxi.
Cá lá cabe lu libru ra cá lá irá cani ma napa enda nabani ni qué zaluxe.
4 Laguieche irá dxi purti xpinni Señor laatu.
Ne sti tiru rabe laatu,
laguiecheꞌ.
5 Lagaca nachaꞌhui dede izaabi stiidxa tu.
Ma zeda dxiña dxi gueeda Señor.
6 Cadi chuꞌ tu xizaa de gastiꞌ,
sínuque lainíꞌ né Dios.
Lainaba laa irá ni caquiiñe tu,
ne laudii diuxquixe laa.
7 Ne óraque zaguixhe dxí ladxidóꞌ to dede iruti zanda guiene ximodo ni.
Ma qué zadxibi ladxidóꞌ to,
ne zata dxí xquenda biaani tu,
purti nuu né tu Cristu Jesús tobi si.
Laucaa ique ni jneza si
8 Yanna hermanu caꞌ,
ma para iluxe guiꞌchi riꞌ,
racaladxe gabe laatu,
ucaa ique tu ni dxandí si,
ne ni naquiiñe ulabi nu,
ne ni jneza,
ne ni nachaꞌhuiꞌ,
ne ni rusieche binni,
ne ni guiaba laacaꞌ.
Laquixhe xquenda biaani tu lu ni jneza ne ni dxandí risaca.
9 Ne lachinanda ni bisiide laatu,
ni bisaana nia laatu guni tu,
ni bina diaga tu uniéꞌ,
zaqueca ni biiya tu bineꞌ.
Laguni zacá,
ne zaguixhe dxí Dios ladxidóꞌ to.
Ucané ca binni Filipos Pablu
10 Nabé cayeche ne cudiee diuxquixe Señor purti ma cayacané tu naa sti tiru.
Cadi cayabe diaꞌ bisiaanda tu naa purti bindaa tu para biseenda tu,
sínuque nanna qué nidxela tu ximodo ñuni tu ni.
11 Ne laca cadi cayabe laatu huayaadxa naa xiixa,
purti ma biaa guieche nia biaꞌ tiica napaꞌ.
12 Nanna xii nga enda pobre ne laca huayapa stale.
Ma biziide ibane ratiisi ne sica tiisi,
zuhuaa stale endaró lua la?
o gastiꞌ,
dede guiaana si ni napaꞌ,
o qué lica gapa gastiꞌ.
13 Intiisi zanda gune purti nuu né Cristu naa ne racané naa.
14 Peru galán biꞌni tu,
ucané tu naa dxi caquiiñe ni.
15 Hermanu de Filipos caꞌ,
rietenalaꞌdxi tu dxi nacubi canayué stiidxa Cristu,
dxi biree de Macedonia que,
laasi tu lade irá ca xpinni Cristu ulee tu lu ofrenda stitu biseenda tu luaꞌ.
Ne biꞌni tu ni purti dxandí bieche né tu stiidxa Dios ni bisiide laatu.
16 Zaqueca dxi uyuaa Tesalónica,
jma que ti tiru biseenda tu ni caquiiñeꞌ.
17 Cadi cuyube usigaꞌde binni naa,
sínuque cayuuladxe cayuni tu ni purti zacá cadale stitu ra nuu Dios.
18 Ne ni biseenda né tu Epafrodito que la?
ma napa jma que biaꞌ caquiiñeꞌ.
Zeda gaca ni casi ti ofrenda cusigaꞌde tu Dios ne casi ti xhoꞌ naxhi ni ziulaꞌdxi be icaa be.
19 Intiisi iquiiñe tu zudii Dios stinne ni laatu,
purti nuu né tu Cristu Jesús tobi si.
Zabee be ni lu irá ni napa be ibáꞌ.
20 Laabe nga Dios stinu,
ne qué ziuu dxi guiaana dxí de isaca be.
Amén.
Diuxi
21 Laudii diuxi irá ca xpinni Cristu Jesús.
Ne laicaa stiuxi ca hermanu nuu né naa raríꞌ.
22 Laicaa stiuxi irá ca xpinni Cristu,
nirudóꞌ sti cani nuu ralidxi César.
23 Jesucristu Señor stinu cuꞌ ndaaya irá tu.
Amén.