Ejemplu sti Jesucristu
2
Pa rusieche Cristu laatu ne nuu dxí ladxidóꞌ to purti nadxii laatu,
ne nuu né Espíritu sti laatu,
ne nanna tu ganaxhii tu ne ilaselaꞌdxi tu stobi la?
2 lauchá ladxiduáꞌ de enda nayecheꞌ.
Lachuu tobi si ne laganaxhii saa,
lagaca tobi si lu ni quixhe tu guni tu,
ne tobi si icá ique tu.
3 Cadi guni tu xiixa para si tidi tu lú stobi,
nin para chuꞌ tu udxiiba laatu,
sínuque cada tobi gaca nadóꞌ ne usisaca stobi,
ne cadi laca laa.
4 Cadi sti si tu ma cá ique tu,
sínuque laucaa ique ni caquiiñe stobi.
5 Laguietenalaꞌdxi pabiáꞌ nadóꞌ uca Cristu Jesús dxi uzá ndaani guidxilayú,
ne lachinanda ejemplu stiꞌ.
6 Neca Dios laabe peru qué ña be tu naca be,
7 sínuque bisaana be enda Dios que para beda gaca be casi ti mozo ra gule be ndaani guidxilayú.
8 Ne ra ma naca be binni guidxilayú,
bidii be lugar uca be biaꞌ ri tiꞌ,
ne bizuuba be diidxa dede uná be guti be lu cruz casi rati cani qué iquiiñeꞌ.
9 Ngue runi ma bidxiiba Dios laabe ne bisisaca laabe jma que irá xixé,
10 ti ora guiete lá be guzuxibi irá cani nuu ibáꞌ ne irá cani nuu ndaani guidxilayú ne irá cani nuu xaguete guidxilayú,
11 ne iníꞌ ca nezalú iráꞌ:
“Jesucristu nga Señor”,
ne zacá usisaca ca Dios Bixhoze be.
Modo ibani xpinni Cristu ndaani guidxilayú
12 Hermanu stinne ni nadxiee caꞌ,
cásica bizuuba tu stiidxa dxi nuaa ra nuu tu la?
jma rusi yanna nuaa zitu de laatu.
Laucaalaꞌdxi guni tu ni jneza,
dede dxi ilá chaahui tu.
Lagaca nadóꞌ ne laidxibi.
13 Purti cadi stubi tu nuu tu,
sínuque nuu Dios cayacané laatu uluiꞌlaꞌdxi tu guni tu ni na,
ne zaqueca ti ganda guni tu ni.
14 Laguni irá ni sin quiche ruaa tu ne sin tinde tu,
15 ti qué chuꞌ tu gapa xi pur iníꞌ laatu,
ne ti ihuinni ma xiiñi Dios laatu,
ne nayá ladxidóꞌ to neca nabeza tu ndaani guidxilayú ni nadxabaꞌ,
lade binni ni runi ni na ique sin gapa xpiaꞌ.
Zeda gaca tu casi biaani ndaani guidxilayú cahui riꞌ,
16 purti ra güi né tu laacabe diidxa ni rudii enda nabani,
casi ñaca cuzaani tu lade cabe.
Zacá zieche nia laatu dxi gueeda Cristu,
ra ganna cadi pur gana si guzaya bine dxiiña lade tu.
17 Zeda gaca fe stitu casi ti ofrenda ni racaladxe usigaꞌde Dios,
ne pa naquiiñe uxhiee rini stinne para izaa chaahui ni la?
zune ni de idubi ladxiduáꞌ,
ti guieche nu tobi si.
18 Purti racaladxe guieche tu,
ne laatu,
cadi naa siaꞌ.
Timoteu ne Epafrodito
19 Ribeza acané Señor Jesús naa ti guiuba guseenda Timoteu ra nuu tu chi guuya xi ze xa tu para ganda gata dxí ladxiduáꞌ.
20 Laasi be lade irá ni runi né naa dxiiña zanaxhii laatu casi nadxiee laatu,
ne zacané laatu de idubi ladxidóꞌ.
21 Purti ca xcaadxi la?
jma ricá ique ca laca laacaꞌ,
ne qué rizaalaꞌdxi ca xhiiña Cristu.
22 Peru ma nanna tu pabiáꞌ rudxii lú Timoteu dxiiña ne modo huayacané naa ra canayué stiidxa Cristu,
casi ñaca xiiñe laa.
23 Nga runi racaladxe guiuba guseenda laabe,
peru cabeza siaꞌ ihuinni xi ziaa xaꞌ raríꞌ.
24 Peru laca nanna zuseenda Señor naa ra nuu tu.
25 Biseenda tu Hermanu Epafrodito ra nuaa para acané naa,
ne dxandí bini né be naa dxiiñaꞌ.
Tobi si bicaa lú né be naa ni ucalaꞌdxi nucueeza dxiiña riꞌ.
Peru zuluáꞌ naquiiñe useenda laabe ra nuu tu yanna
26 purti nabé ma cabana be laatu ne nuu be xizaa gunna tu uca huará be.
27 Zacá uca ni,
uca huará be dede bilá ñati be,
peru biá Dios laabe,
ne cadi laasi be sínuque ne naa.
Pacaa la?
jma rusi naroꞌba yuuba ñuaa niaꞌ.
28 Nga runi cuseenda laabe nagueenda,
ti guieche tu ora guꞌya tu laabe,
ne ma cadi chuaa xizaa.
29 Lauchaga lú laabe ne stale enda nayecheꞌ.
Biꞌchi tu nga laabe neza Señor.
Ne laganaxhii irá casi laabe ca.
30 Purti dede bilá ñati be runi xhiiña Cristu.
Nin qué lica ña be xpida be,
nudii be ni ra ucané be naa xcuenta tu.