Lauyubi ni zeeda de ibáꞌ
3
Yáquexa ma bibani né tu Cristu de lade gueꞌtu la?
lauyubi gapa tu ni zeeda de ibáꞌ ra zuba Cristu cueꞌ Dios.
2 Laucaa ique ni nuu ibáꞌ,
ne cadi ni nuu ndaani guidxilayú.
3 Purti guti né tu Cristu,
ne yanna ma nuu né xpida tu laa ra nuu Dios.
4 Cristu nga enda nabani stinu,
ne dxi ihuinni be la?
laca zahuinni né tu laabe ne zasaca né tu laabe.
5 Nga runi,
lagaxha irá ni zeeda de guidxilayú ri ndaani ladxidóꞌ to.
Nin tobi de laatu cadi chuꞌ né ni cadi xheelaꞌ,
nin guni gasti ni nadxabaꞌ.
Cadi chi nanda tu ni na ique tu,
nin uluiꞌlaꞌdxi tu guni tu ni cadi jneza.
Ne cadi nisi bidxichi ma cá ique tu gapa tu,
purti ra guni tu zacá la?
ma nga nga ni cusisaca tu,
ne cadi Dios.
6 Pur irá nga zusaba ná Dios cani qué ruzuuba stiidxaꞌ.
7 Zacaca bibani tu chiqué,
biꞌni tu irá nga.
8 Peru lausaana ni yanna.
Cadi guni tu xiana,
cadi idxiichi tu,
cadi uyubi tu guniná tu stobi,
cadi cuꞌ dí tu binni,
ne cadi iníꞌ tu diidxa guidxa.
9 Ne cadi usiguii saa tu,
purti ma bisaana tu ni uca tu chiqué,
ma qué runi tu irá ni biꞌni tu.
10 Ma adxé laatu yanna.
Ma bichaa Dios laatu,
ne ze dxi jma rusi ziuchaa laatu,
cayuni laatu casi laa,
dede gunibiáꞌ chaahui tu laa.
11 Yanna ma gasti naca pa judíu binni o pa cadi judíu,
nin pa uca circuncidar o pa coꞌ.
Gasti naca pa de adxé guidxi,
ne pa qué ganna gastíꞌ,
nin pa esclavu o pa coꞌ.
Sínuque ni risaca nga gaca ca xpinni Cristu ne gapa ca laa ndaani ladxidóꞌ caꞌ.
12 Nadxii Dios laatu ne ulí laatu para laa.
Nga runi laguiá binni ne lagaca nachaꞌhui ne laacaꞌ.
Cadi udxiiba tu laca laatu,
lagaca nadóꞌ,
cadi idxiichi tu neca uyubi cabe uchiichi cabe laatu.
13 Cadi ixhacalaꞌdxi saa tu,
ne laguni perdonar ni guni stobi laatu.
Casi bini perdonar Cristu laatu,
zacaca laguni.
14 Peru jma naquiiñe ganaxhii saa tu,
purti zacá zaca pe tu tobi si.
15 Laudii lugar quixhe dxí Dios ladxidóꞌ to,
purti para nga uníꞌ né laatu gaca tu tobi si.
Ne laudii diuxquixe laa.
16 Lauchá tipa ladxidóꞌ to de stiidxa Cristu.
Lausiidi saa ne laquixhená saa ne stale enda biaaniꞌ.
Laguunda salmo ne himno ne cantu sti Dios,
ne maca cudii tu diuxquixe laa ndaani ladxidóꞌ to.
17 Irá ni guni tu ne irá ni iníꞌ tu,
laguni ni casi naquiiñe guni ca xpinni Señor Jesús.
Ne laudii diuxquixe Dios Bixhoze nu,
ne zucaa diaga laatu purti xpinni Jesús laatu.
Modo ibani né binni xheela ne xiiñiꞌ
18 Hermana caꞌ,
lauzuuba stiidxa xheela tu,
purti zacá naquiiñe guni ca xpinni Señor.
19 Ne laatu,
hermanu caꞌ,
laganaxhii xheela tu ne cadi aca né tu laaca naduxhuꞌ.
20 Ne laatu,
baꞌdu caꞌ,
lauzuuba stiidxa bixhoze tu ne jñaa tu de iráꞌ,
purti nga nga riulaꞌdxi Señor.
21 Hermanu caꞌ,
cadi uyubi tu uchiichi tu xiiñi tu,
ti cadi iree ca gana.
Modo guni xpinni Cristu xhiiña binni
22 Laatu,
cani cayuni xhiiña binni,
lauzuuba stiidxa xpixuaana tu,
cadi ora si cayuuya ca para guiaana tu bien ne laacaꞌ,
sínuque laguni ni de idubi ladxidóꞌ to purti ridxibi tu Dios.
23 Irá ni guni tu la?
laguni ni de idubi ladxidóꞌ to,
casi ñaca xhiiña Señor cayuni tu,
cadi xhiiña binni.
24 Ma nanna tu naguixhe chaahui Señor ni udii laatu saca biꞌni tu dxiiñaꞌ.
Purti xhiiña Cristu cayuni tu,
ne laa nga xpixuaana pe tu.
25 Peru tu guni ni cadi jneza la?
ziaba ná pur ni biꞌniꞌ.
Purti nezalú Dios,
biaꞌca risaca tobi risaca stobi.