Modo biꞌni Pablu dxiiña Tesalónica
2
Hermanu caꞌ,
laaca tu nanna tu cadi pur gana si uyuu du ra nuu tu.
2 Nanna tu neca udinde né cabe laadu ne bininá cabe laadu ndaani guidxi Filipos peru ucané Dios laadu para gunda bidxiña du xquidxi tu ne byuí né du laatu stiidxa be sin nidxibi du,
neca uyuu tu bicaa lú laadu.
3 Nanna du jneza ni bisiꞌdi du laatu,
ne qué nusiguii du para niguite du binni nicaa stiidxa du.
4 Bisaana Dios stiidxa ladxi ná du purti nanna zanda güi du ni jneza,
ne zacá cayuí du ni.
Laa nanna xi nuu ndaani ladxidóꞌ do,
ne cuyubi du guni du ni chuꞌlaꞌdxi be ne cadi ni chuꞌlaꞌdxi binni.
5 Laatu nanna tu qué ñuu dxi nugá du laatu ne qué ñuu dxi nuyubi du nicaa si du xpueltu tu.
Dios nanna nayá ladxidóꞌ do.
6 Qué nuyubi du nisaca du lade tu,
nin lade xcaadxi binni,
neca ñanda nisaca du purti Cristu biseenda laadu.
7 Sínuque uca du nadóꞌ ne laatu,
casi runi ti gunaa ne ca xiiñiꞌ,
rusiniisi laacaꞌ.
8 Pa ñanda la?
cadi stiidxa Dios si nudíꞌ du laatu,
sínuque ne xpida pe du,
tantu nadxii du laatu.
9 Hermanu caꞌ,
laatu nanna tu bini du dxiiña ridxí ne huaxhinni para gupa du ni udidi né du dxi laga cayuí né du laatu stiidxa Cristu,
ti cadi gua nin tobi tu laadu.
10 Xpinni Cristu caꞌ,
biiya tu modo uzá du lade tu,
ne laca biiya Dios.
Ne pur modo uzá du que la?
bihuinni xpinni Dios laadu.
Bini du jneza,
ne qué gapa binni xi pur udxiiba donda ique du,
purti qué nuchéꞌ du.
11 Nanna dxichi tu uní né du cada tobi tu casi riníꞌ né bixhoze binni laa.
Ucané du laatu para cadi iree tu gana,
12 ne gudxi du laatu sa tu casi naquiiñe sa ca xpinni Dios.
Laa guridxi laatu para ganda chuꞌ tu ra runi mandar,
ne guꞌya tu enda nandxóꞌ stiꞌ.
13 Qué riaana dxí du de udíꞌ du diuxquixe Dios purti ucuaa tu ca diidxa byuí né du laatu casi stiidxa Dios ne cadi casi stiidxa binni.
Ne dxandí stiidxa Dios ni.
Ne dede dxi bini cre tu ni,
cayuni ni dxiiña ndaani ladxidóꞌ to.
14 Hermanu caꞌ,
dxi bininá ca binni xquidxi tu laatu la?
bizaaca tu casi bizaaca ca xpinni Dios ni nuu Judea,
cani ma bini cre Cristu Jesús.
Neca judíu laacabe peru laca ca judíu bininá laacabe.
15 Ne laca judíu biiti Señor Jesucristu,
ne laca biiti ca ca profeta chiqué,
cani byuíꞌ né laaca stiidxa Dios,
ne yanna ma uladxi ca laadu.
Qué runi cabe ni na Dios,
ne ridxela saa né cabe irá binni.
16 Racalaꞌdxi cabe ucueeza cabe laadu de güi né du ca binni ni cadi judíu diidxaꞌ,
ti cadi ilá caꞌ.
Ne zacá cazaa chaahui stonda ca judíu,
ne yanna huaxa ma nuu pe xiana sti Dios luguiá caꞌ.
Cá ique Pablu ibigueta Tesalónica
17 Hermanu caꞌ,
biréꞌ du ra nuu tu caadxi,
peru ladxidóꞌ do biaana né laatu,
ne pa ñanda si guiuba niduꞌya du laatu.
18 Ucalaꞌdxi du ñuu du.
Naa,
jma que ti tiru biyube ñaaꞌ,
peru bicueeza binidxaba laadu.
19 Laatu nga cá lú du usieche tu laadu,
ne usihuinni tu xhiiña du dxi gueeda Jesucristu Señor stinu,
ti ganda guieche né du ni bini du.
Nga runi napa du gana iduꞌya du laatu.
20 Purti laatu nga raca né du nandxóꞌ ne rieche né du.