Lainíꞌ né Dios pur laadu
3
Hermanu caꞌ,
ma para iluxe du,
rinaba du laatu iníꞌ né tu Dios pur laadu ti guiuba ireeche stiidxa Señor,
ne icaa cabe ni irá ladu casi ucuaa tu ni.
2 Ne lainaba lu Dios ulá laadu de lu ná cani qué na guni jneza,
cani runi ni na ique,
purti cadi irá binni runi cre.
3 Peru zuni Señor ni ma uníꞌ,
zuzuhuaa chaahui laatu ne zapa laatu de irá ni nadxabaꞌ.
4 Nanna dxichi du cayacané Señor laatu,
nga runi cayuni tu ni gabi du laatu ne zuni ru tu ni.
5 Señor gacané laatu ganna tu pabiáꞌ nadxii Dios laatu,
ne guni tu casi biꞌni Cristu:
cadi ixhacalaꞌdxi tu.
Tu qué guni dxiiñaꞌ cadi go
6 Hermanu caꞌ,
cayabi du laatu casi ñaca Señor Jesucristu ñabi ni laatu,
laixele de tutiica hermanu ni qué na guni dxiiña ne qué na guni casi bisiꞌdi du laatu.
7 Maca nanna tu naquiiñe guni tu casi bini du dxi uyúꞌ du lade tu.
Qué ñuꞌ si du lade tu sínuque bini du dxiiñaꞌ.
8 Ne qué nidóꞌ si du xqueta binni,
sínuque bini du dxiiña ridxí ne huaxhinni biaꞌ ra gunda tiꞌ,
para cadi gua nin tobi tu laadu.
9 Neca jneza nudii tu laadu ni nibani né du pur ni naca du,
peru bini du ni para uluí du laatu ximodo guni tu.
10 Purti gudxi ca du laatu dxi nuu du lade tu,
tu qué guni dxiiña la?
cadi go.
11 Cuzeꞌte du ni purti gunna du nuu de laatu qué na guni dxiiñaꞌ,
canaundaachi si ni cayuni stobi.
12 Yanna racalaꞌdxi du ulidxe du cani qué na guni dxiiña ca,
ne gabi du laaca guni ca dxiiña jneza ti gapa ca ni ibani né caꞌ,
purti nga nga ni na Jesucristu Señor stinu.
13 Ne laatu la?
hermanu caꞌ,
cadi ixhacalaꞌdxi tu de guni tu jneza.
14 Pa nuu tuuxa qué na guni ni cucáꞌ du ri la?
laguuya chaahui tu laa ne cadi idxaaga tu laa,
ti ituí lú.
15 Peru cadi gapa tu laa casi ni nanalaꞌdxi laatu,
sínuque laulidxe laa casi enda biꞌchiꞌ.
Señor cuꞌ ndaya laatu
16 Riguixhe dxí Señor ladxidóꞌ no,
ne laa pe quixhe dxí ladxidóꞌ to irá dxi ne intiica gueeda luguiá tu.
Chuꞌ né Señor irá xixé tu.
17 Naa nga Pablu.
Naa piaꞌ cucaa diuxi riꞌ.
Sicarí rucaa lu irá ca guiꞌchi stinneꞌ,
ti ihuinni naa rucaa cani.
18 Jesucristu Señor stinu cuꞌ ndaaya irá tu.
Amén.