5
Hermanu caꞌ,
cadi naquiiñe ucaa xi beeu o xi dxi gueeda Señor,
2 purti maca nanna dxichi tu dxi gueeda be la?
mala guiuu be,
casi riuu gubaana huaxhinni.
3 Ruluíꞌ gasti chi gaca,
nuu dxí guidxi,
mala inaaze be laaca casi rinaaze yuuba ti gunaa ora ma gunda dxi gapa baꞌduꞌ.
Zacá zazaaca cabe,
ne óraque ma qué zalá cabe.
4 Peru laatu,
hermanu caꞌ,
ma biree tu ra nacahui,
ma qué zanda inaaze dxi que laatu,
purti cabeza tu ni.
5 Ma cadi nuu tu lu guelacahui,
purti ma zinanda tu ni dxandí ni gudixhe Dios,
casi ñaca cuzaani be laatu.
6 Yanna,
gataná nu ne cuꞌ xpiaani nu.
Cadi gaca nu casi cani qué runi cre,
casi ñaca nisiaasi caꞌ.
7 Purti huaxhinni nga rasi binni ne laca huaxhinni rixudxi.
8 Peru laanu,
zanda gabi nu ma birá gueela para laanu.
Nga runi naquiiñe cuꞌ xpiaani nu,
uzuhuáꞌ dxichi nu lu ni runi cre nu ne ganaxhii saa nu,
ne guietenalaꞌdxi nu ma bilá nu.
Irá nga zapa laanu.
9 Purti cadi gudixhe Dios laanu para guiaba ná nu,
sínuque para ganda ilá nu pur Jesucristu Señor stinu.
10 Laa guti pur laanu ti ganda cueza né nu laa tobi si,
pa nabani ru nu,
o ma guti nu dxi gueeda.
11 Nga runi lausieche saa cásica cayuni tu,
ne cada tobi uyubi uzuhuaa chaahui stobi.
Ra culidxe Pablu ca hermanu
12 Hermanu caꞌ,
rinaba du laatu icaa tu stiidxa cani runi dxiiña lade tu,
cani za niru lú tu ne rabi laatu xi na Señor guni tu.
13 Lausisaca laacabe ne laganaxhii laacabe purti cayuni cabe dxiiña que.
Ne cadi chuꞌ dinde tu.
14 Hermanu caꞌ,
laulidxe cani nachaaba lade tu,
cani qué na guni dxiiñaꞌ.
Lagacané cani cadxibi,
ne cani caꞌru uzuhuaa chaahui,
ne cadi ixhacalaꞌdxi tu laacaꞌ.
15 Laguuya gá qué chi uquixe tu ni guni binni laatu,
sínuque lagaca nachaꞌhui ne irá hermanu,
ne zaqueca cani qué runi cre.
16 Cadi usaana tu de guieche tu,
17 ne lainíꞌ né Dios sin guiaana dxí tu.
18 Intiica izaaca tu,
laudii diuxquixe Dios purti nga nga ni na be guni cani ma nuu né Cristu Jesús tobi si.
19 Laudii lugar guni Espíritu Santu dxiiña luguiá tu.
20 Laicaa stiidxa cani ruiꞌ né laatu ni rabi Dios laa.
21 Lauyubi uná nga ni jneza,
ne nga laguiaana né.
22 Ne laixele de irá xixé ni nadxabaꞌ.
23 Dios riguixhe dxí ladxidóꞌ no,
ne rinaba du laa usiá pe xpida tu ne xquenda biaani tu ne espíritu stitu,
ne idubi naca tu,
ti qué quiba donda ique tu dxi gueeda Jesucristu Señor stinu.
24 Zuni Dios irá nga luguiá tu,
purti runi ni riníꞌ,
ne laa uníꞌ né laatu.
25 Hermanu caꞌ,
lainíꞌ né Dios pur laadu.
26 Laudii stale diuxi irá hermanu ne laquidxi dxiichi laacaꞌ.