Modo racalaꞌdxi Dios ibani ca xpinni
4
Hermanu caꞌ,
bisiꞌdi du laatu modo racalaꞌdxi Dios sa tu,
ne cayuni tu ni.
Yanna rinaba du laatu jma rusi guni tu ni.
Cayabi du ni laatu purti ma xpinni Jesús laanu.
2 Ma nanna tu xi irá gudixhe Jesús gabi du laatu guni tu.
3 Ni racalaꞌdxi Dios nga sa tu jneza,
cadi chuꞌ né tu ni cadi xheela tu.
4 Ne cada tobi tu lacueza né xheela tu modo riulaꞌdxi Dios,
ne laganaxhii laa purti risaca.
5 Cadi guni tu casi runi cani qué runibiáꞌ Dios,
rapa ca xheela ca para si gaca xcustu caꞌ.
6 Nin tobi de laatu qué chi chite tu hermanu stitu de ni cuzeꞌte du riꞌ,
purti nabé naná zusaba ná Señor ni guni ni.
Maca gudxi du ni laatu.
7 Purti uníꞌ né Dios laanu para guni nu ni nachaꞌhuiꞌ,
cadi ni nadxabaꞌ.
8 Cani qué ulabi ni cayabi du laatu ri la?
cadi zácaxa cadi culabi binni guidxilayú,
sínuque cadi culabi Dios.
Laa nda bidii laanu Espíritu Santu stiꞌ.
9 De enda ranaxhii saa la?
cadi naquiiñe ucaa guiꞌchi lú tu,
purti maca bisiidi Dios laatu guni tu ni.
10 Ne rihuinni cayuni tu ni,
purti nadxii tu irá ca hermanu ni nuu idubi Macedonia.
Peru rinaba du laatu,
hermanu caꞌ,
laganaxhii jma que biaꞌ nadxii tu yanna.
11 Cadi ma canazá tu cherí chericaꞌ,
sínuque laucaa ique xhiiña si tu,
ne laguni dxiiñaꞌ,
casi gudxi du laatu guni tu.
12 Zacá qué zapa cani qué runi cre Cristu xi pur iníꞌ laatu,
ne qué ziaadxa laatu gastiꞌ.
Modo ibigueta Señor
13 Hermanu caꞌ,
racalaꞌdxi du ganna tu xi raca binni ora ma guti,
ti qué chuꞌ tu triste casi cani qué nuyubi nulá Cristu laa.
14 Runi cre nu cásica guti Jesús ne bisibani Dios laa zacaca zusibani be cani guti ma runi cre laa para guedané ca laa.
15 Nga runi racalaꞌdxi du ganna tu xi na Dios:
pa nabani nu dxi ibigueta Señor,
qué zazá niru nu lú cani ma guti.
16 Purti sicarí nga chi aca ni.
Zacá ti ridxi casi ora cayuni mandar tuuxa,
ne laca zucaa tobi de ca ángel ni jma risaca ridxi,
ne zaxidxi trompeta sti Dios,
ne ziete Señor de ibáꞌ.
Nirudóꞌ ibani ca xpinni Cristu ni ma guti,
17 ne óraque laanu cani nabani,
guiasa né nu laaca tobi si lu bi para idxaaga nu Señor lade za.
Ma qué ziuu ru dxi ixele nu de laa.
18 Lagüíꞌ ni lade tu para guieche saa tu.