Modo guni Timoteu xhiiña Dios
5
Cadi tinde neu ti hermanu ni ma nagola,
sínuque uníꞌ né laa ne diidxa nadóꞌ casi niníꞌ neu bixhoꞌzoꞌ.
Ne gupa cani nahuiini casi biꞌchi luꞌ.
2 Ne zaqueca ca gunaa gola,
laca gupa laaca casi jñoouꞌ,
ne ca binni dxaapa huiini casi bizaꞌnu sin iníꞌ ique lu gasti de laacaꞌ.
3 Gucané ca viuda ni huandí qué gapa tu guꞌya laa.
4 Peru cadi naquiiñe gacané nu ca viuda ni napa xiiñi o xiaga,
purti naquiiñe iziidi ca xiiñi cabe gacané laacabe saca bisiniisi cabe laacaꞌ,
purti nga nga riulaꞌdxi Dios guni binni,
ne jneza ni.
5 Ni dxandí viuda,
qué gapa tu guꞌya laa la?
ma Dios si cá lú,
ne zaníꞌ né laa ridxí ne huaxhinni.
6 Peru viuda nabani modo na ique la?
cadi ulabi tu laa.
Casi ñaca ma guti.
7 Gudxi laacabe guni cabe irá ni cayabe lii riꞌ,
ti cadi iníꞌ binni laacabe.
8 Ti hermanu ni qué ulabi ca lisaa ne jma rusi pa qué ulabi ca binni lidxi,
ma biree de ni runi cre,
ne zeda aca jma nadxaba que ni qué runi cre.
9 Lu guiꞌchi ra ricá lá ca viuda,
laucaa lá ca viuda si ni ma bisaa sesenta añu,
ni qué nibeza né stobi laga nabani xheelaꞌ.
10 Laguuya pa runibiáꞌ binni laabe pur xiixa nachaꞌhui huayuni be,
casi pa jneza bisiniisi be xiiñi be,
pa huachagalú be binni ralidxi be,
pa huayacané be ca hermanu sin aca be nayáꞌ,
pa huayacané be cani cadiꞌdi ra nagana,
o stobi stobi enda nachaꞌhui ni biꞌni be.
11 Peru cadi ucaa tu lá ca viuda nahuiini ruꞌ,
purti zuquiinde laaca ichaganá ca ne ma zusaana ca xhiiña Cristu,
12 neca ma bidii stiidxa ca guni ca ni.
Zacá zaguiꞌba donda ique caꞌ.
13 Ne cadi nga si,
sínuque laca riaa cabe enda nachaabaꞌ,
ma canazá cabe yoo pur yoo.
Ne ni jma rusi feu riziidi cabe uchá cabe cuentu ne riguu ruaa cabe ratiisi ne riníꞌ cabe ni cadi jneza iníꞌ cabe.
14 Nga runi racaladxe ichaganá ca viuda ni nahuiini ruꞌ,
gapa ca xiiñi caꞌ,
ne cui ca yoo,
ti cadi gapa binni xi pur iníꞌ ca xpinni Cristu.
15 Purti nuu caadxi de laaca ma bitiixhi binidxaba ique.
16 Pa nuu tuuxa hermanu o hermana napa viuda lade binni lidxi,
naquiiñe acané laabe,
ti cadi gua ca xpinni Cristu laabe ne zacá zugaanda ni idopa para ca viuda ni dxandí qué gapa tu guꞌya laa.
17 Naquiiñe udii tu ni ibani né ca hermanu gola naca xaíque lade tu,
cani cayuni xhiiña jneza,
jma rusi cani qué rusaana ná de güi stiidxa Dios ne usiidiꞌ.
18 Purti na Xquiꞌchi Dios:
“Cadi cuꞌ lu guixhe xii ruaa buey laga cayuni dxiiñaꞌ.”
Ne laca na ni:
“Naquiiñe guiaxa ni runi dxiiñaꞌ.”
19 Cadi ucaa diaꞌgu pa gueda nduu tuuxa xqueja ti hermanu gola pa cadi né ca chupa chonna hermanu ni biꞌya dxandí bichee be.
20 Peru tutiica cuchee la?
udinde né laa nezalú irá hermanu,
ti idxibi ca xcaadxi.
21 Chi tidxe caꞌ lii nezalú Dios ne Señor Jesucristu ne ca ángel stiꞌ,
biꞌni irá ni cayabe lii riꞌ.
Bisaba ná cani uchee,
tutiica naca.
22 Cadi casi zeuꞌ quixhu tuuxa guni xhiiña Dios,
ne cadi chi chuu lu lu enda ruchee sti stobi,
sínuque biyubi cadi uchee luꞌ.
23 Para ma cadi aca huará xhaata lu la?
cadi gueuꞌ nisa si,
sínuque ne caadxi vinu.