Ziuu tu iree chu
4
Cayabi dxichi Espíritu Santu laanu,
dxi mayaca gueeda Cristu ziuu tu iree chu de ni runi cre nu,
zinanda enda rusiguii ne irá ni rusiidi binidxabaꞌ.
2 Zuna diaga cabe ni de ruaa cani nabé rusiguii dede ma qué racaná ladxidóꞌ.
3 Zabee ca de ichaganá binni ne laca zabee ca de go binni xiixa endaró,
neca Dios bizáꞌ ca endaró ca para go ca xpinni ne udii ca diuxquixe laa.
4 Nazaaca irá ni bizáꞌ Dios.
Qué gapa nu xi pur udxíꞌ nu nin tobi de laani,
sínuque icaa nu ni,
ne udíꞌ nu diuxquixe laa.
5 Zanda idóꞌ no ni,
purti ra udíꞌ nu diuxquixe laabe riguu be ndaaya ni.
Modo ibani Timoteu lade ca hermanu
6 Pa gusiidu ca hermanu casi cayabe lii ri la?
zuꞌnu xhiiña Jesucristu jneza,
ne laga cayuꞌnu ni la?
zidxá ladxidóꞌ lo de stiidxa Dios ni runi cre nu,
ca diidxa galán ni maca zinanda lu de ma xadxí.
7 Cadi quitu stiempu lu luguiá ca cuentu yooxho ni ricaa yu né binni,
sínuque bicaa ique sa lu gaxha de Dios.
8 Caadxi si racané ejerciciu cuerpu stinu para gapa stipa,
peru ni zacané pe laanu la?
nga uyubi nu sa nu gaxha de Dios,
purti nga zaquiiñe laanu lu enda nabani ni napa nu yanna riꞌ ne ni gueeda ruꞌ.
9 Dxandí ni,
ne irá binni nicaa ni de idubi ladxidóꞌ.
10 Nga runi laanu runi nu dxiiñaꞌ,
ne rudxíꞌ lú nu ni nagana,
purti ma cá lú nu Dios ni nabani,
ni cayapa irá binni,
jma rusi cani runi cre laa.
11 Gudxi ca hermanu guni irá nga,
ne bisiidi chaahui ni laacaꞌ.
12 Biyubi modo iníuꞌ,
biꞌni jneza,
gunaxhii ca xcaadxi,
bini cre de idubi ladxidóꞌ loꞌ,
ne bibani nayá para uluíꞌ lu cani ma runi cre ximodo sa caꞌ,
ti cadi udxii deche ca lii tisi nahuiini luꞌ.
13 Laga cabeza lu guendaꞌ,
bichiña irá ca hermanu,
biinda né laaca stiidxa Dios,
bisiidi chaahui ca hermanu ne ucané laaca udxii lú ca lu xhiiña Dios.
14 Biquiiñe gracia ni uníꞌ Dios icoou dxi gudixhe ná ca hermanu gola luguiá luꞌ.