Modo ibani ca xaíque sti xpinni Cristu
3
Casi na cabe que:
Pa nuu tuuxa cá ique gaca xaíque sti ca xpinni Cristu la?
jneza ni cá ique guni.
2 Peru ganna ca,
naquiiñe ibani jneza,
cadi gapa chupa chonna gunaa,
sínuque xheela si,
ne ganna ucueeza laa ne cuꞌ xpiaaniꞌ,
ne cadi guni gasti para iníꞌ binni laa.
Ne naquiiñe chuꞌ para uchagalú binni ora tiica gueda guiete ralidxi,
ne ganna usiidiꞌ.
3 Naquiiñe gaca ni tobi ni qué rixudxi ne qué ruyubi diidxa ne qué runi ni cadi jneza para si gapa bidxichi,
sínuque tobi ni nachaꞌhuiꞌ,
ne nadóꞌ,
ne cadi nisi cá ique gapa bidxichi,
4 tobi ni nanna guni mandar ndaani lidxi ne usiidi ca xiiñi uzuuba diidxa sin icabi ruaa.
5 Purti pa qué ganna be guni mandar be ndaani lidxi be la?
ximodo zanda gapa be ca xpinni Dios yaꞌ.
6 Cadi gaca ni tobi ni deru cayuni cre,
paxa ora gueda udxiiba laca laa ne guiaba ná casi biaba ná binidxabaꞌ.
7 Naquiiñe gaca ni tobi ni risaca,
cadi nezalú ca hermanu si,
sínuque ne nezalú cani qué runi cre,
ti cadi chuꞌ tu iníꞌ laabe para gaca ni na binidxabaꞌ.
8 Zaqueca ni gaca diácono,
gaca ni tobi nabani jneza ne runi ni riníꞌ,
ne qué rixudxi,
ne qué runi ni cadi jneza para si gapa bidxichi,
9 ne chi nanda ni biluíꞌ Dios laanu guni cre nu,
sin iree chu de laani.
10 Naquiiñe ihuinni pa zaquiiñe be para dxiiña ca,
óraque ru icaa be ni.
11 Zaqueca ca gunaa ni guni dxiiña ca,
laca naquiiñe ibani jneza,
cadi iníꞌ binni,
ganda ucueeza laa,
ne cadi quite si binni.
12 Diácono laca naquiiñe cadi gapa chupa chonna gunaa,
sínuque xheela si,
ne ganna guni mandar ndaani lidxi ne ucueeza lú ca xiiñiꞌ.
13 Purti diácono ni runi xhiiña jneza la?
rudxiiba cabe laa,
ne óraque jma rusi zanda güi né binni modo runi cre Cristu Jesús.
Nandxóꞌ ni runi cre nu
14 Ma naguixhe chaa ra nuu luꞌ,
peru cucaa gaꞌya ndi lú luꞌ,
15 quenquita indaa guendaꞌ.
Peru ma nannu ximodo naquiiñe guꞌnu dxiiña lade ca xpinni Dios ni nabani.
Laacabe cayapa cabe stiidxa be ndaani guidxilayú riꞌ,
ne cucueeza cabe cani rucaa lú ni.
16 Iruti zanda iníꞌ cadi nandxóꞌ ni runi cre nu,
neca nagana guiene binni ni casi zeꞌ.
Ndi nga laani:
Beda gaca Dios binni guidxilayú:
bisihuinni Espíritu Santu qué nuchee be,
ne biiya ca ángel laabe.
Bireeche stiidxa be lade irá binni,
uyuu tu bini cre laabe,
ne bigueta be ibáꞌ.