Modo iníꞌ né binni Dios
2
Nirudóꞌ chi tidxe lii guꞌyu iníꞌ né cabe Dios pur irá xixé binni,
ne inaba cabe laa cuꞌ ndaaya laacaꞌ,
ne acané laacaꞌ,
ne udii cabe diuxquixe laa pur irá caꞌ.
2 Naquiiñe iní né nu Dios pur presidente ne irá ni runi mandar,
ti ganda chuꞌ dxí xquidxi nu,
ne ibani nu sin cuꞌ xa ique nu gastiꞌ.
Ne ibani nu modo racalaꞌdxi Dios ti qué gapa binni xi pur iníꞌ laanu.
3-4 Zacá nga riulaꞌdxi Dios iníꞌ né tu laa,
ne jneza ni.
Laa bilá laanu,
ne racalaꞌdxi ulá irá binni,
ne ganna ca ni dxandíꞌ.
5 Tobi lucha Dios nuu,
ne tobi si tu zanda iníꞌ né laabe pur laanu,
Jesucristu ni beda gaca binni guidxilayu.
6 Dxi bidxiña dxi gudixhe Dios ihuinni racalaꞌdxi ulá irá binni la?
beda gati Cristu,
beda tixe saca ilá cabe.
7 Ne nga runi biseenda naa güe nia cani cadi judíu stiidxaꞌ,
usiide laaca ni dxandí ti guni cre caꞌ.
Dxandí ni caniéꞌ,
cadi cusiguieeꞌ,
purti ma xpinni Cristu naa.
8 Racaladxe iníꞌ né ca hermanu de irá guidxi Dios,
peru guꞌya chaahui ca pa nayá ladxidóꞌ caꞌ,
pa cadi cadxiichi caꞌ,
pa cadi nuu dinde né ca iruti para guni ca ni.
9 Ne ca hermana la?
cadi gacu ca lari ni cadi jneza gacu xpinni Cristu,
nin uyubi ca chuꞌlaꞌdxi binni laaca pur modo guni ca ique caꞌ o gaze ca oro o perla o gacu ca lari nabé risaca,
10 sínuque uyubi ca chuꞌlaꞌdxi binni laaca purti nachaꞌhui ca ne runi ca jneza casi naquiiñe guni ca xpinni Dios.
11 Ne cui dxí ca ra cultu ucaa diaga caꞌ ti iziidi caꞌ.
12 Qué rinaꞌya usiidi gunaa ra cultu nin gapa ca xiixa dxiiña para guni mandar ca hombre,
sínuque ucaa diaga ca sin iníꞌ caꞌ.
13 Purti nirudóꞌ bizáꞌ Dios Adán,
óraque ru bizáꞌ Eva.
14 Ne cadi Adán di bisiguii binidxabaꞌ,
sínuque Eva,
ne laa bichee.
15 Peru zalá gunaa ra gapa xiiñi pa guni cre ne ganaxhii Dios ne gaca nachaꞌhui ne chuꞌ xpiaaniꞌ.