Modo guni binni ni chuꞌlaꞌdxi Dios
13
Cadi guiaana dxí tu de ganaxhii saa tu casi enda biꞌchiꞌ.
2 Cadi guiaanda laatu uchagalú tu cani zeeda de sti guidxi,
purti ra huayuni cabe zacá la?
nuu tu huachagalú ángel sin ganna.
3 Laguietenalaꞌdxi cani yeguyoo,
casi ñaca yeguyoo né tu laacaꞌ,
ne zaqueca cani cayacaná,
casi ñaca cayacaná né tu laacaꞌ.
4 Cadi gapa tu enda xheela casi enda riguite.
Cani ma bichaganá la?
cadi uchee né xheelaꞌ,
purti zusaba ná Dios cani rapa jnadxii ne cani riuu né xheela stobi.
5 Cadi ibani tu para gapa si tu bidxichi,
sínuque laguieche né biaꞌ tiica napa tu,
purti na Dios rabi laanu:
“Qué zusaana laatu ne qué ziaana dxie de acaniá laatu.”
6 Nga runi zanda iní nu sin chuꞌ nu xizaa:
“Racané Señor naa.
Nga runi qué zadxibe ni guni binni naa.”
7 Laguietenalaꞌdxi ca hermanu ni uca xaíque stitu,
ni byuíꞌ né laatu stiidxa Dios.
Laguuya modo biree ndu xhiiña cabe,
ne laguni cre Dios casi bini cre cabe.
8 Qué ziuu dxi idxaa Jesucristu de ni naca.
Cásica laabe neegueꞌ,
zaqueca yanadxí,
ne zaqué si guiaana be.
9 Cadi udii tu lugar chuꞌ tu quite laatu,
usiidi laatu cadi go to xiixa ti jma uzuhuaa dxiichi tu,
purti qué huayacané ni cani runi ni.
Dios si zanda uzuhuaa chaahui laanu.
10 Casi ñaca ñapa nu ti altar ibáꞌ,
ne zanda icaa nu ni nexhe lú ni para go espíritu stinu.
Peru nin tobi de ca sacerdote ni zinanda ley,
qué zanda go ni nexhe lu altar que.
11 Chiqué ruuti cabe maniꞌ,
ne riné sacerdote gola rini stime ndaani Lugar Ra Jma Nandxóꞌ para guiaxa xpecadu binni.
Peru cuerpu stime,
ruzaaqui cabe laa zitu huiini de ra nabeza binni.
12 Zaqueca biꞌni cabe Jesús;
biiti cabe laa zitu huiini de guidxi,
ne raqué bixhii rini sti para biaxa stonda binni.
13 Para ca binni que,
qué nisaca Jesús.
Nga runi yesaana ca laabe zitu huiini de guidxi.
Peru yanna laanu chuu nu ra nuu be neca laca qué risaca nu para laacaꞌ.
14 Purti gasti guidxi ra zanda guiaana nu ndaani guidxilayú ri ni qué zanitilú.
Nga runi cabeza nu ni gueeda ruꞌ,
ni qué zanitilú.
15 Yáquexa ma bichiña Jesucristu laanu ra nuu Dios la?
cadi guiaana dxí nu de usisaca nu Dios purti ra udxiꞌba nu laa pur irá ni huayuni para laanu la?
casi ñaca cusigaꞌde nu laa xiixa galán.
16 Cadi usiaanda tu aca tu nachaꞌhui ne binni,
ne udii tu tindaa de ni napa tu cani qué gapa,
purti casi ñaca nusigaꞌde tu ni Dios ne nga nga ni riulaꞌdxiꞌ.
17 Lauzuuba stiidxa cani nuu de xaíque stitu.
Laguni ni gabi ca laatu purti qué rixhacalaꞌdxi ca de gapa ca laatu,
ti nanna ca Dios iníꞌ pa jneza cayuni caꞌ.
Pa guni tu zacá la?
zieche né cabe xhiiña cabe,
ne qué zaca ni naná para laacabe,
ne jma rusi zanda acané cabe laatu.
18 Lainíꞌ né Dios pur laadu,
purti nanna du nayá ladxidóꞌ do nezalú be,
ne ni racalaꞌdxi du nga irá ni guni du,
guni du jneza.
19 Ne jma rusi canaba lú tu iníꞌ né tu Dios ti ganda ibigueta ra nuu tu nagueenda.
Ndaaya ne diuxi
20 Señor Jesucristu nga Pastor ni nandxóꞌ stinu ni rapa chaahui laanu.
Purti ra gudixhe Dios sti modo chuꞌ né binni laa tobi si la?
uca firmar ni ne rini stibe,
peru bisibani Dios laabe de lade gueꞌtuꞌ.
21 Yanna rinaba lu Dios,
ni riguixhe dxí ladxidóꞌ binni,
udii laatu irá ni naquiiñe tu para ganda guni tu ni na,
ti irá nu aca nu modo racalaꞌdxi aca nu.
Ne zanda aca ni purti ma runi cre nu Jesucristu.
Cadi guiaana dxí nu de usisaca nu laabe.
Amén.
22 Hermanu caꞌ,
rinaba laatu cadi ixhacalaꞌdxi tu ca diidxa ni rulidxe laatu riꞌ,
purti cadi xirooba di guiꞌchi bicaa lú tu.
23 Laucaa diaga ni chi tidxe laatu riꞌ:
Ma bindaa cabe hermanu Timoteu,
ne pa gueeda nagueenda la?
ziniá laa ra nuu tu ora chaaꞌ.
24 Laudii diuxi irá cani napa tu de xaíque lade tu,
ne irá ca hermanu.
Ne laicaa diuxi sti ca hermanu de Italia.
25 Dios cuꞌ ndaaya irá tu.
Amén.