Iduꞌya dxí nu Jesús
12
Ma biduꞌya nu modo uzá ca binni ni bini cre Dios chiqué.
Zaqueca laanu,
udxíꞌ lú nu sa nu lu neza ni gudixhe Dios para laanu sin ixhacalaꞌdxi nu.
Ne para ganda chindá nu la?
naquiiñe usaana nu irá ni rucueeza laanu,
ne zaqueca usaana nu de uchéꞌ nu,
ti ma cadi icá nu yaga lu ná ni.
2 Cadi guiaana dxí nu de iduꞌya dxí nu Jesús,
purti nirudóꞌ laa uzá lu neza udixhe Dios sa cani runi cre laa,
ne yendá de ra nexhe chindá.
Guietenalaꞌdxi nu pabiáꞌ naná guca para laabe ra ucuá be lu cruz que,
peru qué nizaalaꞌdxi be gati be zaqué,
purti nanna be nabé zieche be ora ma udiꞌdi be ni.
Ne zaqué uca ni,
udiꞌdi si irá enda naná stibe que la?
ze be ibáꞌ,
ne ma zuba be cueꞌ Dios ni nandxóꞌ.
3 Laguuya si laatu pabiáꞌ bininá cani ruchee laabe,
ne ora guietenalaꞌdxi tu modo udiꞌdi be que la?
qué zadxaga tu,
ne qué zabí sa tu atrá.
4 Zándaca nabé naná cayaca para laatu ra cucaa lú cani ruchee laatu,
peru caꞌru chindá tu dede ra gati tu.
5 Ruluíꞌ ma biaanda laatu ni cá lu Xquiꞌchi Dios ra na:
Xiiñeꞌ,
cadi udxii dechu Dios ora tinde né lii,
ne cadi guiaanu triste ora usaba ná lii.
6 Purti ridinde né be cani nadxii be,
ne rusaba ná be cani ma napa be casi xiiñi be.
7 Cadi ixhacalaꞌdxi tu ti cusaba ná be laatu,
purti cayuni be casi runi binni xiiñiꞌ.
Lácaxa nuu xiiñi binni ni qué rusaba ná bixhoze laa.
8 Peru pa qué rusaba ná Dios laatu casi rusaba ná ca xcaadxi la?
cadi xiiñi pe laatu sínuque napa laatu casi xiiñi guiꞌxhi si.
9 Dxi nahuiꞌni nu la?
rusaba ná bixhoze nu laanu,
ne ridxibi nu laa.
Yanna jma rusi udíꞌ nu lugar guni mandar Bixhoze nu ni nuu ibáꞌ laanu,
ti icaa nu enda nabani.
10 Chupa chonna si iza bini mandar bixhoze nu ne jñaa nu laanu,
ne udiñe ca laanu para iziꞌdi nu biaꞌ nanna caꞌ.
Peru Dios nanna xi caquiꞌñe nu,
ne nga runi rusaba ná laanu,
ti gaca nu nachaꞌhui casi laa.
11 Dxandí iruti rieche ora cayaba náꞌ,
sínuque riaana triste purti naná ni.
Peru nabé racané ni cani nuu para iziidiꞌ,
purti ora ma udiꞌdi ni la?
zuuya cabe ma zanda sa cabe jma jneza,
ne ma nuu dxí ladxidóꞌ cabe.
Cadi udxii deche binni Dios
12 Nga runi pa ma bidxaga tu la?
lacuu stipa ná tu ne ñee tu,
13 ne lasá jneza sin iree chu tu,
purti zacá zacané tu uzuhuaa chaahui stobi ni ruluíꞌ chi guiaba.
14 Laguni biaꞌ ganda para cadi chuꞌ dinde né tu irutiꞌ,
ne lagapa xpida tu nayá purti tu cadi nayá xpida la?
qué zanda guꞌya Señor.
15 Laguuya gá nin tobi de laatu cadi udxii deche Dios ora racalaꞌdxi gacané laatu,
ne zaqueca nin tobi de laatu cadi aca casi xculá rusindá intiica gata cueꞌ.
16 Ne nin tobi de laatu cadi chuꞌ né tuuxa ni cadi xheelaꞌ,
ne nin tobi cadi usaana de ganaxhii ni zeeda de Dios,
casi biꞌni Esaú chiqué.
Pur ti bladu endaró si bitoo irá derechu ni gupa de enda lugola stiꞌ.
17 Ne nanna tu ximodo beeda iree ni laabe.
Purti ora ucalaꞌdxi be nicaa be ndaaya sti bixhoze be,
ma qué niná bixhoze be,
ne neca biina be peru ma huadxí ngue para uchaa be ni biꞌni be.
18 Ma bidxiña tu ra nuu Dios,
peru cadi casi bidxiña ca binni Israel laabe lu dani Sinaí chiqué.
Bidxiña cabe ñee dani que,
ne bihuinni bele,
ne biseegu guelacahui idubi dani que,
ne biete ti bi yooxho ne nisa guie.
19 Bina diaga cabe uxidxi trompeta,
ne bizulú Dios uníꞌ né laacabe.
Peru de tantu bidxibi cabe,
unaba cabe ma cadi iníꞌ ru be.
20 Ma qué ñanda ñuni huantar cabe ni caníꞌ be que,
purti na be rabi be laacaꞌ:
“Tutiica uxhaata ñee lu dani riꞌ napa xidé gatiꞌ,
naca ni binni o maniꞌ.
Lauchá guie laa o laguuti laa ne flecha.”
21 De tantu bidxibi cabe irá ni cayuuya cabe que,
dede Moisés na:
“De tantu cadxibe dede cayaca diꞌteꞌ.”
22 Peru laatu,
ma bidxiña tu ra nuu Dios.
Casi ñaca ma nuu pe tu ra nuu be ibáꞌ,
ne zuhuaa ñee tu lu dani Sion,
ne nuu tu ndaani guidxi Jerusalén,
xquidxi Dios ni nabani,
peru cuzeete Jerusalén ni nuu ibáꞌ cadi ni nuu ndaani guidxilayú.
Ne raqué nuu irá ca ángel stibe,
nin iruti qué ñanda nugaba laacaꞌ.
23 Ne laca nuu ca xpinni Dios ni bibani chiqué,
cani ma biuu ibáꞌ,
zanda gabi nu ma xquidxi ca ibáꞌ.
Casi cayabe laatu ca,
ma bidxiña tu ra nuu Dios ni cuidxi cuenta irá binni,
ne laca ra nuu be nuu ca espíritu sti irá ca binni ni nachaꞌhui ni uyuu chiqué,
cani ma bisiá be ladxidóꞌ.
24 Ne laca ma bidxiña tu ra nuu Jesús,
ni bedaguni ni gudixhe Dios gaca para ganda chuꞌ né binni laa tobi si.
Bixhii Jesús rini stiꞌ,
ne jma risaca rini ni bixhii be que,
que rini ni bixhii Abel.
25 Laguuya gá cadi chuꞌ dxi ma qué na tu ucaa diaga tu ora iníꞌ né Dios laatu.
Purti pa qué nilá cani qué nulabi laabe ra bilidxe be laaca ndaani guidxilayú la?
jma rusi qué zalá nu pa qué ulabi nu laabe yanna ra culidxe be laanu de ibáꞌ.
26 Dxi uníꞌ né be laaca que la?
biniibi dxacha guidxilayú,
peru yanna na be rabi be laanu:
“Zuniibe ruaꞌ guidxilayú sti tiru si,
ne cadi guidxilayú si,
sínuque ne ibáꞌ.”
27 Ne ra bizeete be uniibi ru be guidxilayú la?
zanda guiene nu zadxiña dxi iniibi irá xixé ni bizáꞌ be,
ne zanitilú cani óraque,
para guiaana ni qué ziuu dxi initilú.
28 Qué ziuu dxi iluxe enda runi mandar sti Dios ne ma uluu laanu lade ni.
Nga runi cadi guiaana dxí nu de udíꞌ nu diuxquixe laabe ne ganaxhii nu laabe de idubi ladxidóꞌ no,
ne idxibi nu laabe ne guni nu ni na be ti guieche né be laanu.
29 Purti laabe nga Dios stinu ne zeda aca be casi gui ni runidé irá ni nadxabaꞌ.