Ni dxandí runi cre Dios
11
Pa dxandí runi cre nu Dios la?
qué zagúꞌ xa ique nu de ni cabeza nu udii be laanu,
ne neca caꞌru ihuinni irá ni,
peru casi ñaca ma caduꞌya nu ni yanna,
purti runi cre nu laabe.
2 Bieche né Dios ca bixhoze gola nu chiqué purti bini cre ca laa.
3 Runi cre nu Dios,
nga runi nanna nu uyáꞌ guidxilayú ra uníꞌ be gaca ni.
Dxi caꞌru iníꞌ be,
qué nihuinni gastiꞌ,
peru yanna ma riduꞌya nu ni.
4 Rarí chi duꞌya nu modo bini cre caadxi de ca bixhoze gola nu chiqué.
Purti bini cre Abel Dios,
nga runi jma uyuulaꞌdxi Dios ni bisigaꞌde be laa,
que ni bisigaꞌde Caín.
Ne pur nga runi uníꞌ Dios ma nayá ladxidóꞌ be,
ne ucuaa ni bisigaꞌde be laa que.
Zacá riduꞌya nu neca ma guti be peru de yanna ruzeete cabe pabiáꞌ bini cre be Dios.
5 Ne laca purti bini cre Enoc Dios,
nga runi undisa Dios laa,
yené laa ibáꞌ sin ñati,
ne biyubi cabe laa,
peru qué nidxela cabe laa,
purti ma undisa Dios laa.
Lu Xquiꞌchi Dios rabi laanu,
ante che be ibáꞌ,
uyuulaꞌdxi Dios ni biꞌni be.
6 Peru qué zanda guni binni ni riulaꞌdxi Dios pa qué runi cre.
Purti para idxiña cabe laabe la?
napa cabe xidé guni cre cabe nuu be ne rulabi be cani uyubi laabe.
7 Ne laca purti bini cre Noé Dios,
nga runi bizuuba stiidxa Dios ra gudxi Dios laa xi chi aca.
Ne neca caꞌru guꞌya be ni,
peru biꞌni be ni na Dios,
bizáꞌ be arca ra bilá né be binni lidxi be que.
Pur modo bini cre be que bisihuinni be pabiáꞌ cuchee binni guidxilayú,
ne bieche né Dios laabe,
purti rieche né cani runi cre laa.
8 Abraham laca purti bini cre Dios,
nga runi bizuuba stiidxaꞌ.
Biree de xquidxi sin ganna paraa cheꞌ,
ucuaa neza,
uyé guidxi ni gudxi Dios laa zudii laa ne ca xiiñiꞌ.
9 Ne neca casi ñaca nuu be xquidxi binni,
peru biaana be ndaani guidxi ni ma gudxi Dios laabe zudii laabe que.
Biaana be raqué purti bini cre be Dios,
neca ndaani carpa si uleza be,
ne zaqueca uleza ca xiiñi be,
Isaac ne Jacob,
purti ne laaca bidii stiidxa Dios.
10 Biꞌni be zaqué purti cá lú be icaa be guidxi ni bicuí Dios para laabe ibáꞌ,
guidxi ni qué ziuu dxi initilú.
11 Laca zanda guietenalaꞌdxi nu,
qué ñanda ñapa Sara xiiñiꞌ.
Peru neca ma udiꞌdi de ra ñapa be xiiñi be la?
beda gapa be tobi purti bini cre be zuni Dios ni ma gudxi laabe.
12 Zacá riduꞌya nu neca nabé ma huaniisi Abraham para gapa xiiñiꞌ,
peru beda idale xiiñi casi luceru ne casi yuxi sti nisadóꞌ.
13 Irá cabe guti cabe runi cre ru cabe Dios.
Neca caꞌru icaa cabe ni bidii stiidxa Dios zudii laacabe,
peru casi ñaca biiya cabe ni de zitu ne bieche né cabe ni.
Ne uníꞌ cabe cadi ndaani guidxilayú ri nga xquidxi cabe sínuque zidiꞌdi si cabe ndaani ni.
14 Purti ni iníꞌ zacá la?
rihuinni cabeza chuꞌ ndaani xquidxi peꞌ.
15 Purti pa nucaa ique cabe nibigueta cabe guidxi ra biree cabe la?
ñanda ca nibigueta cabe raqué.
Peru cadi nga di nga ni ucalaꞌdxi cabe,
16 sínuque ucalaꞌdxi cabe ti guidxi ni jma galán,
o zanda gabi nu guidxi ni nuu ibáꞌ.
Ne pur nga runi qué rituí lú Dios aca Dios stícabe.
Ne ma naguixhe chaahui ti guidxi para laacabe.
17 Chiqué bitiidi Dios Abraham ti prueba para guꞌya pa dxandí runi cre be laa,
ne bihuinni dxandí runi cre be.
Purti uná be udixhe be tobi lucha xiiñi be para nusigaꞌde be laa Dios,
neca ma gudxi Dios laabe,
na rabi laabe:
18 “De Isaac nga uzulú idale xiiñi luꞌ.”
19 Biꞌni be zaqué purti ma runibiáꞌ be Dios ne ma nanna be dede gueꞌtu zanda usibani.
Zacá zanda gabi nu casi ñaca guti Isaac ne bigueta bibani para ucuaa bixhoze laa sti tiru.
20 Dxi uluu Isaac ndaaya Jacob ne Esaú ne gudxi laaca xi chi aca dxi ma guti la?
gunda uníꞌ Isaac de ni chi aca ru purti bini cre Dios.
21 Jacob laca purti bini cre Dios,
nga runi dxi ma chi gati uluu ndaaya iropa xiiñi José,
ne neca ma lu ti bastón zucá be peru bisisaca be Dios.
22 Dxi mayaca gati José bietenalaꞌdxi gudxi Dios laa napa ca israelita xidé iree ca de ndaani guidxi Egipto,
para gudixhe xi guni né cabe dxita sti dxi iree cabe.
Biꞌni be zaqué purti bini cre be ni uníꞌ Dios que.
23 Ora gule Moisés la?
biiya bixhoze be ne jñaa be pabiáꞌ galán laabe,
para bicaachi ca laabe chonna beeu,
ne qué nidxibi ca ni na rey Faraón.
Biꞌni cabe zaqué purti bini cre cabe Dios.
24 Ne zaqueca bini cre Moisés Dios dxi ma huaniisi,
ngue runi qué ñuulaꞌdxi ñaca xiiñi xiñi dxaapa rey Faraón.
25 Purti neca ñeche né be irá ni ñapa be,
peru chupa chonna si gubidxa,
ne qué ñuulaꞌdxi Dios ni.
Ne pur nga ulí be acaná né be ca binni xquidxi be.
26 Para laabe la?
jma risaca acaná be casi ucaná Cristu,
que ñapa be irá ni nuu ndaani guidxi Egipto,
purti bicaa ique be ni chi udii Dios laabe.
27 Ne laaca purti bini cre be Dios,
ngue runi biree be de ndaani guidxi Egipto sin nidxibi be rey que neca cadxiichi né laabe,
ne bidxii lú be neza ze be purti casi ñaca cayuuya be Dios neca qué rihuinni.
28 Ne laca purti bini cre be Dios,
nga runi biꞌni be ni gudxi Dios laabe,
binéꞌ be rini irá ra puerta sti ca binni Israel dxa gueela que,
ti qué guiuu ángel guuti lugola sticaꞌ.
29 Ne laca purti bini cre cabe Dios,
nga runi gunda udiꞌdi cabe Nisadóꞌ Xiñá que,
casi ñaca nidiꞌdi cabe ra nabidxi.
Ne ra ucalaꞌdxi ca binni Egipto nidiꞌdi casi udiꞌdi cabe la?
bilaahua caꞌ.
30 Ne laca purti bini cre ca binni Israel Dios,
nga runi biaba lindaa sti guidxi Jericó dxi bidii ca vuelta guidxi que gadxe gubidxa.
31 Zaqueca Rahab,
gunaa dxaba que,
bilá dxi binitilú irá binni xquidxi purti bini cre Dios ne bichagalú ca xpinni be dxi yeundaachi ca ndaani xquidxi.
32 Xi ru zanda gabe laatu yaꞌ.
Ñuuladxe ñue nia laatu de Gedeón ne Barac ne Sansón ne Jefté ne David ne Samuel ne ca profeta.
Peru ma qué zanda.
33 Irá cabe bini cre cabe Dios.
Nga runi gunda gudixhe dxí cabe rey,
ne bini mandar cabe jneza,
ne ucané Dios laacabe casi bidii stiidxa zacané laacabe.
Ne laca bini cre cabe,
nga runi gunda biseegu cabe ruaa lion,
34 ne bisuíꞌ cabe gui naroꞌbaꞌ,
ne bilá cabe de ra ñati cabe ne espada.
Ne cani ridxibi para ucaa lú la?
bicaa lú ca sin nidxibi caꞌ dede gunda binidé ca ca dxu ni bicaa lú laacaꞌ.
35 Laca uyuu caadxi gunaa runi cre Dios,
guti binni lidxi ne bibani.
Ne laca uyuu xcaadxi xpinni Dios guti ra bininá cabe laa purti runi cre Dios,
ne qué niná ca nilá caꞌ,
purti nanna ca jma galán gati ca ti ibani né ca Dios.
36 Ne uyuu xcaadxi ni bini burla cabe laa,
ne gudiñe cabe laa dede bindiibi cabe cadena laa ne biseguyoo cabe laa.
37 Nuu tu guti purti bichá cabe guie laa,
ne nuu ni biꞌni cabe laa chupa ndaa,
ne nuu ni bitiidi cabe ra nagana para nuxhele cabe laa de Dios ne nuu ni biiti cabe de espada.
Ne nuu ni uzá nacu xquidi dendxu ne xquidi chiva,
guti zí caꞌ,
ne nagana uca para laacaꞌ,
ne ucaná caꞌ.
38 Tan nachaꞌhui cabe,
cadi para laacabe guiaana cabe lade binni guidxilayú ni nadxabaꞌ.
Uzá ca guiꞌxhi ne lade dani ne ndaani cueva ne ndaani bizé.
39 Bieche né Dios irá cabe pur modo bini cre cabe,
peru caꞌru icaa cabe ni uníꞌ Dios udii laacabe guti cabe.
40 Purti ma gudixhe xiixa jma galán,
ne cadi para laasi cabe sínuque ne para laanu.
Nga runi na cueza cabe icaa né cabe ni laanu.