10
Qué ñanda di nudii ley sti Moisés irá ni galán ni ma gudixhe Dios para binni guidxilayú,
peru zanda gabi nu naca ni casi bandá sti ni qué nihuinni chiqué.
Purti neca biꞌni binni casi cá lu ley que,
bixhii ca rini sti mani para bisigaꞌde ca Dios,
peru neca ne nga qué ñanda ña chaahui ladxidóꞌ caꞌ,
ne cada iza ribigueta ca para guni ca ni sti tiru.
2 Pa ñaca nusiá rini ni ruxhii cabe que ladxidóꞌ cabe la?
ma ñaana dxí cabe de ñuni cabe ni,
purti ñanna cabe ma bia ladxidóꞌ cabe.
3 Peru cadi zacá di nga laani,
sínuque cada iza ora uxhii cabe rini que la?
jma rusi rietenalaꞌdxi cabe ni huachee cabe.
4 Purti qué zanda ixá stonda binni ne rini sti yuze ne sti chiva.
5 Nga runi dxi bedandá Cristu ndaani guidxilayú,
na rabi Bixhoze:
Qué ñuulaꞌdxu nicoou rini sti maniꞌ,
nin xiixa nusigaꞌde cabe lii,
sínuque gudixhe lu naa gueda aca binni guidxilayú.
6 Ne qué ñuulaꞌdxi lu irá ni ruzaaqui cabe,
ne rini ni ruxhii cabe para guiaxa stonda cabe.
7 Nga runi rabe lii:
“Dios stinneꞌ,
rarí nuaa para gune ni na luꞌ,
casi cá ni lu Xquiꞌchi lu de naa.”
8 Rarí riduꞌya nu xi na Jesucristu.
Na be qué racalaꞌdxi Dios uxhii cabe rini sti maniꞌ,
nin usigaꞌde cabe xiixa laa,
nin uzaaqui cabe tuuxa mani para guiaxa stonda cabe,
neca nga cá lu ley guni cabe.
9 Oraque na be:
“Rarí nuaa para gune ni na luꞌ.”
Ne ra uníꞌ be zacá la?
bichiá be enda ruxhii rini sti mani para guiaxa pecadu,
ne bisihuinni be chi guni be ni ma gudixhe Dios acaꞌ.
10 Ne yanna ma uca ni gudixhe Dios que,
purti ma bidii Jesucristu xpida para guiaxa stonda nu tobi si tiru,
ne pur ni biꞌni be que ma bia ladxidóꞌ no.
11 Irá dxi ma nuu ca sacerdote,
ma cuxhii rini sti maniꞌ,
peru qué ziuu dxi quixe rini que ni bichee binni.
12 Peru Jesús la?
ti tiru si bixhii rini stiꞌ,
ne ngue si para biaxa irá ni.
Oraque ze be ibáꞌ ne ma zuba be cueꞌ Dios.
13 Ne raqué cabeza be dede dxi ma guta dxí irá ni rucaa lú laabe xa ñee be.
14 Ti ofrenda si bisigaꞌde be Dios chiqué,
ne ma cadi naquiiñe ru gasti para guia ladxidóꞌ irá cani ma bixá stonda.
15 Ne nanna nu dxandí ni bizeꞌte nu ca,
purti rusiene Espíritu Santu ni laanu pur ni cá lu Xquiꞌchi Dios ra na:
16 Dxi ganda dxi que,
zaguixhe sti modo chuꞌ né cabe naa tobi si,
ne dxi que zucaa ca mandamientu stinne lu xquenda biaani cabe ne ndaani ladxidóꞌ cabe.
17 Ne laca na Señor:
Ma qué ziuu ru dxi guietenaladxe pa uyuu dxi bichee né cabe naa.
18 Zacá nga laani,
pa ma bixhá Dios stonda nu la?
ma cadi naquiiñe quixhe nu xiixa lu altar para guiaxa stonda nu.
Idxiña nu ra nuu Dios
19 Chiqué la?
sacerdote gola si zanda chuꞌ ndaani Lugar Ra Jma Nandxóꞌ sti yuꞌdu que.
Peru yanna laanu,
hermanu caꞌ,
ma zanda chuꞌ nu Lugar Ra Jma Nandxóꞌ ni nuu ibáꞌ,
purti bixhii Jesucristu rini sti pur laanu.
20 Ra guti be que la?
bixhele be ti neza cubi para laanu,
ne ma biuꞌ nu lu neza sti enda nabani que dede guiuꞌ nu ibáꞌ.
Zanda gabi nu ma undadi be cortina ni ucuá ndaani yuꞌdu que,
ne ma zanda guiuꞌ nu.
21 Ne ma napa nu ti sacerdote gola ni nuu para guꞌya ca xpinni Dios.
22 Nga runi idxiña nu ra nuu Dios de idubi ladxidóꞌ no,
ne guni cre pe nu zacané laanu,
purti ma bisiá rini sti Cristu ladxidóꞌ no de irá ni bichéꞌ nu,
ne ma bia cuerpu stinu ne nisa yá ra uyúꞌ nisa nu.
23 Yanna,
inaaze dxiichi nu ni ma runi cre nu,
purti nanna nu qué zaguite si ni bidii stiidxa laanu,
sínuque zuni ni ma uníꞌ.
24 Ne naquiiñe ucáꞌ ique nu acané saa nu para ganaxhii nu jma,
ne guni nu ni nachaꞌhuiꞌ.
25 Ne cadi guni nu casi cani rusaana de che cultu,
sínuque cada tobi acané stobi para indisa ique,
ne jma rusi yanna purti caduꞌya nu ma zeda dxiña dxi gueeda Jesucristu Señor stícanu.
26 Purti pa ma nanna nu xii nga jneza,
peru uyubi nu uchéꞌ nu la?
ma gasti zanda usigaꞌde nu Dios para guiaxa stonda nu.
27 Ne pa nuu tu guni zacá la?
ganna dxichi zusaba ná Dios laa dxi usaba gui para unitilú irá ni bicaa lú laa.
28 Chiqué pa uchee né tuuxa ley sti Moisés,
ne iníꞌ chupa o chonna dxandí ni la?
maca zigati ngue,
ne neca ninaba be nilá be,
qué ñanda.
29 Ne pa zacá biꞌni cabe cani bichee né ley sti Moisés la?
jma rusi naná zaca para cani udxii deche Espíritu sti Dios ni nadxii laacaꞌ,
ne casi ñaca ruutu ñee ca Xiiñi Dios purti qué rulabi ca rini ni bixhii para ihuinni dxandí zuni Dios ni ma uníꞌ.
Ne laca rini que bisiá ladxidóꞌ caꞌ.
30 Ma nanna nu ca diidxa ni uníꞌ Dios chiqué:
“Xcuenta nuu ni,
ne naa uquixe ni laacabe”,
na be.
Ne laca cá ca diidxa ri lu guiꞌchiꞌ:
“Zuzuhuaa ca xpinni Dios nezalú para iníꞌ ca xi huayuni caꞌ.”
31 Nabé naná zaca para cani cuchee ora gueda guiaba ca lu ná Dios ni nabani.
32 Peru laguietenalaꞌdxi dxi nacubi binibiáꞌ tu stiidxa Cristu,
qué nixhacalaꞌdxi tu,
neca nabé naná ni udiꞌdi tu.
33 Gunaaze cabe caadxi de laatu,
bininá cabe laaca ne bini burla cabe laaca nezalú binni,
peru qué nusaana tu laacaꞌ,
sínuque biaana né tu laacaꞌ.
34 Ne zaqueca qué nusaana tu ca hermanu ni bieguyoo,
ne qué niguu xa ique tu dxi ucuaa cani nanalaꞌdxi laatu stitu,
purti nanna tu jma galán ni napa tu ibáꞌ,
ne ngue la?
qué ziuu dxi initi lú.
35 Ne pa zacá uzá tu chiqué la?
zaqueca guni tu yanna,
ne cadi usaana tu de guni cre tu Dios,
purti naroꞌba ni chi udii laatu.
36 Naquiiñe cadi ixhacalaꞌdxi tu,
ti ganda guni tu ni na Dios ne icaa tu ni ma uníꞌ zudii laatu.
37 Cá ca diidxa ri lu Xquiꞌchi Dios:
Nagueenda zeda dxiña dxi nexhe gueeda Señor.
Ma qué zandaa diꞌ.
38 Zabani cani ma bia ladxidóꞌ purti runi cre caꞌ.
Peru ni ibigueta atrá la?
ma qué zieche nia diaꞌ laacaꞌ,