Yuꞌdu ni nuu ndaani guidxilayú ne ni nuu ibáꞌ
9
Yanna rarí chi duꞌya nu ximodo uyuu né Dios ca xpinni chiqué,
ne ximodo nuu né laanu yanna.
Chiqué gudixhe be ximodo guni ca binni que cultu,
ne bizáꞌ cabe ti yuꞌdu para aca ni ndaaniꞌ.
2 Bicuí cabe ti carpa ne nga uyé de yuꞌdu stícabe.
Naca ni chupa ndaa,
ne ndaani tindaa que la?
nuu candeleru de oro ne mexa ra nexhe ca pan ni ma uyuu ndaayaꞌ.
Ne rabi cabe ni “Lugar Ra Nandxóꞌ”.
3 Para chuꞌ cabe ndaani sti ndaa que la?
napa cabe xidé tidi cabe ti cortina,
ne raqué nga rabi cabe ni “Lugar Ra Jma Nandxóꞌ”.
4 Nuu ti altar de oro ndaani ni ra riguu cabe guꞌxhuꞌ,
ne laca nuu ti guiña de oro ni napa cabe casi ti seña ma bidii stiidxa Dios laacabe aca cabe xpinni,
ne ndaani ni nuu ca guie ra cá ca mandamientu ni bidii Dios Moisés que,
ne laca nuu ti rii de oro ra dxá caadxi maná ne vara sti Aarón ni ulee bandaga chiqué.
5 Ne luguiá guiña que zuhuaa chupa figura casi ángel sicarú dede riaꞌqui biaaniꞌ,
ne ruchii bandá sti xhiaa cani ra ruchá cabe rini sti ca mani ni rusigaꞌde cabe Dios.
Peru nagasi qué zanda uzeꞌte nu xi riníꞌ irá ni.
6 Zacá nga nexhe chaahui irá ni nuu ndaani carpa que,
ne irá dxi riuu ca sacerdote ndaani primé ndaa que para riguni xhiiñaꞌ.
7 Peru rairopa ndaa que la?
sacerdote gola si riuu,
ne neca laabe la?
peru ti tiru si zanda chuꞌ be lu tubiza.
Ne para chuꞌ be,
napa be xidé chiné be rini ni usigaꞌde be Dios pur irá ni bichee ca binni que iza que sin ganna,
ne ni bichee be.
8 Racá rihuinni cusiidi Espíritu Santu laanu,
laga zuhuaa ru primé ndaa que la?
qué ñanda ñuu binni Lugar Ra Jma Nandxóꞌ que.
9 Ne irá nga nuu casi ti ejemplu para laanu yanna.
Purti neca biiti ca sacerdote que maniꞌ,
ne bichá ca rini stime lu altar,
peru neca zacá,
qué ñanda ña pe ladxidóꞌ ca binni que.
10 Bisiidi ca sacerdote que laaca xi na ley zanda go caꞌ,
ne xi zanda gue ca ne ximodo usiá ca ladi caꞌ,
peru biquiiñe irá nga laga si quixhe Dios ni jma riquiiñeꞌ.
11 Peru ma beeda Cristu,
ne ma laa naca sacerdote gola.
Ne pur laa ma ucuaa nu irá ni galán ni bidii stiidxa Dios chiqué zudii binni,
ne yanna ma cayuni be dxiiña ndaani yuꞌdu stibe,
yuꞌdu ni jma galán ne jma nandxóꞌ que irá yuꞌduꞌ,
purti cadi binni bizáꞌ ni,
ne cadi ndaani guidxilayú nuu ni.
12 Ma adxé laabe para ca xcaadxi sacerdote gola que,
purti ra biuu be ndaani Lugar Ra Jma Nandxóꞌ que la?
maca tobi si tiru biuu be,
peru qué ñuu né be rini sti chiva nin sti yuze huiiniꞌ,
sínuque rini pe stibe,
ne nga nga ni bilá laanu.
13 Chiqué ora uchee né tuuxa ley sti Moisés la?
ruchá cabe rini sti yuze ne sti chiva luguiá be,
ne laca ruzaaqui cabe ti yuze huiini,
ne ruchá cabe dé stime luguiá be para tidi ni bichee be que,
ne aca be nayá,
peru de luguiá si.
14 Ne pa biquiiñe irá nga para bisiá laacabe la?
jma rusi nandxóꞌ rini sti Cristu,
purti ucané Espíritu ni bidii Dios laabe gudixhe be xpida be casi ti ofrenda ni nayá ne bisigaꞌde be ni Dios.
Ne rini bixhii be que nga usiá ladxidóꞌ no de irá ni bichéꞌ nu chiqué,
ne uchaa laanu ti ibani nu casi na Dios ni nabani.
15 Ne pur ni biꞌni Cristu que,
ma bidii stiidxa Dios binni guidxilayú sti tiru,
ma gudixhe ti modo chuꞌ né cabe laa tobi si.
Chiqué laca bidii stiidxa be ca bixhoze gola nu,
peru bichee né ca laabe.
Peru ra guti Cristu,
raqué biaxa xpecadu iráꞌ,
cásica cani uníꞌ né be chiqué,
zaqueca cani caníꞌ né be yanna,
para udii be laaca enda nabani ni qué zaluxe.
16 Ora ma chi gati binni la?
rusaana testamentu.
Peru neca cá ni lu guiꞌchiꞌ,
qué zaca ni pa caꞌru gati be.
17 Purti laga nabani ru ni biꞌni ni que la?
qué zanda icaa cabe ni.
18 Nga runi dxi bidii stiidxa Dios ca xpinni chiqué la?
uca firmar né ni rini.
19 Guietenalaꞌdxi nu ximodo uca ni:
biinda né Moisés ca binni que irá ca mandamientu ni cá lu ley que,
ne óraque ucuaa be ti lari de lana xiñáꞌ ne ti rama hisopo,
bigadxe be ni de rini sti yuze huiini ne sti chiva,
ne nisa,
ne biruba be ni lu libru ra cá ley sti Dios que,
ne laca biruba be ni luguiá ca binni que.
20 Ne rabi be ca binni que:
“Ndi nga rini ni cayuni firmar ca mandamientu ni caguixhe Dios para guni tu.”
21 Ne óraque biruba Moisés rini que ndaani yuꞌdu que ne lu ni riquiiñe para cultu stícabe.
22 Pur ni cá lu ley nanna nu irá ni guia naquiiñe guia ne rini,
ne pa qué ixii rini la?
qué zanda guiaxa xpecadu cabe.
Rini sti Cristu rusiá binni de ni huachee
23 Carpa ni bizáꞌ Moisés que,
ne irá ni uyuu ndaani ni que la?
caadxi si ruluíꞌ cani laanu ximodo ibáꞌ.
Randa ria cani ra idxá cani rini sti maniꞌ.
Peru naquiiñe guia ni nuu ibáꞌ ne rini sti tuuxa ni jma risaca que maniꞌ.
24 Nga runi ra nuu Cristu yanna la?
cadi ndaani yuꞌdu ni bicuí binni,
sínuque ibáꞌ biuu be,
caníꞌ né be Dios pur laanu.
Purti ca yuꞌdu ni nuu ndaani guidxilayú la?
naca cani casi bandá si sti ni nuu ibáꞌ.
25 Ne ma qué zaguixhe ru be xpida be sti tiru para guiaxa xpecadu binni,
casi runi ca xcaadxi sacerdote gola,
cada iza riuu ca ndaani Lugar Ra Jma Nandxóꞌ,
riuu né ca rini,
peru cadi sticaꞌ.
26 Pa ñuni be casi runi ca la?
nanna panda tiru ñati be dede dxi uyáꞌ guidxilayú yaꞌ.
Peru cadi zacá di nga laani,
sínuque dxi gunda dxi la?
beda uxhii be rini stibe para guiaxa xpecadu binni ne ma qué ziuu ru dxi guni be ni.
27 Irá binni guidxilayú napa xidé gati ti tiru,
ne óraque ma cuidxi Dios cuenta laacaꞌ.
28 Zacaca beda gati Cristu ti tiru si para guiaxa xpecadu irá binni guidxilayú,
ne ziuu dxi ibigueta be rairopa tiru peru ma cadi para quixe be ni huachee binni,
sínuque para ulá chaahui be cani cabeza laabe.