Zuhuaa Jesús lu Dios pur laanu
8
Lade irá ni cucaa lu guiꞌchi ri la?
ndi nga ni jma racaladxe ganna tu:
iruti ru stobi casi Jesucristu,
sacerdote gola stinu ni ma nuu ibáꞌ,
zuba cueꞌ Dios ni nandxóꞌ.
2 Ma nuu be de sacerdote ndaani ti yuꞌdu ni dxandí yuꞌdu ni bicuí Dios,
cadi ni bicuí binni.
3 Irá sacerdote gola nuu para quixhe ca ni guedané binni usigaꞌde Dios lu altar,
ne para idxiña né ca rini sti mani ni ma guti ra nuu Dios para guia ni huachee ca binni que.
Jesucristu,
sacerdote gola stinu,
laca gupa xidé bisigaꞌde xiixa Dios.
4 Pa ñuu ru be ndaani guidxilayú la?
qué ñaca be sacerdote purti nuu ru sacerdote caguixhe ni chi usigaꞌde cabe Dios casi na ley sti Moisés guni cabe.
5 Peru yuꞌdu ni nuu ca sacerdote ndaani la?
zeda aca ni casi bandá si sti yuꞌdu ni nuu ibáꞌ que.
Guietenalaꞌdxi nu xi gudxi Dios Moisés dxi ma chi ucuí yuꞌdu que,
na Dios rabi laabe:
“Biiya guꞌnu ni casi pe ni bilué lii lu dani que.”
6 Peru jma risaca xhiiña Cristu que xhiiña ca xcaadxi sacerdote que,
purti ra biꞌni Dios laabe sacerdote gola la?
laca gudixhe ti modo cubi chuꞌ né nu laa tobi si,
ti modo jma galán para ni gudixhe ra bidii stiidxa Moisés que.
Jma galán ni purti jma naroꞌba ni bidii stiidxa be guni be para laanu.
7 Pa ñaca ñanda ñuu né binni Dios tobi si modo gudixhe ni chiqué la?
ma qué niquiiñe niguixhe sti modo yanna.
8 Bizeete be qué niquiiñe ni guta chiqué purti nisi bichee ca binni que.
Cá lu Xquiꞌchi be ra na be:
Binni Israel ne binni Judá caꞌ:
Zadxiña dxi quixhe sti modo chuꞌ né tu naa tobi si,
9 peru cadi casi gudixhe para ca bixhoze gola tu dxi uluaa naya ná ca para ulee laaca de ndaani guidxi Egipto.
Purti qué ñuni ca ni gudxe laaca ñuni caꞌ.
Nga runi bisaana laacaꞌ.
10 Ndi nga chi gune para ca binni Israel dxi idxiña dxi que:
zucaa ca mandamientu stinne lu xquenda biaani ca ne ndaani ladxidóꞌ caꞌ,
ne óraque huaxa zapa ca naa de Dios sticaꞌ,
ne zaca ca xpinneꞌ.
11 Ne óraque ma cadi naquiiñe usiidi cabe biꞌchi cabe nin binni xquidxi cabe para gunibiáꞌ ca tuu nga Señor,
purti irá cabe zunibiáꞌ cabe naa dede ni jma nahuiini hasta ni jma huaniisi lade cabe.
12 Zuxhaya stonda cabe,
ne qué ziuu dxi guietenaladxe pa uyuu dxi bichee né cabe naa.