Jesús zeda gaca casi Melquisedec
7
Melquisedec ca nga uca rey de Salem,
ne laca uca sacerdote sti Dios ni nandxóꞌ.
Guietenalaꞌdxi nu ni uca dxi zeeda Abraham de ra yetixhe dxí ca rey que.
Biree Melquisedec bichagalú laabe ne uluu ndaaya laabe.
2 Oraque ulee be tindaa tindaa lu irá ni né be,
bidii be laa casi ti diezmo ni ricaa sacerdote.
Ni riníꞌ lá Melquisedec la?
“rey ni runi mandar jneza”.
Ne laca gudxi cabe laabe “rey ni riguixhe dxí lu enda ridinde”,
purti nga ni riníꞌ diidxa Salem.
3 Ra cá de laabe lu Xquiꞌchi Dios la?
qué riete gasti de bixhoze be nin jñaa be nin bixhoze gola be,
nin dxi gule be nin dxi guti be.
Ne zacá zeda aca be casi Xiiñi Dios,
purti qué riete pa uyuu dxi biree be de sacerdote gola.
4 Laguuya si pabiáꞌ bisaca be,
purti dede Abraham bixhoze gola nu bidii laabe tindaa tindaa de lu irá ni guxha ca rey que.
5 Lu ley sti Moisés cá,
ulí Dios ca xiiñi Leví aca sacerdote,
ne gudxi laacabe icaa cabe diezmo dede sti ca biꞌchi cabe neca laca za ca de Abraham casi laacabe.
6 Peru Melquisedec,
neca cadi xiiñi Leví laa,
ucuaa diezmo ni bidii Abraham laa,
ne uluu ndaaya Abraham.
Abraham nda bidii stiidxa Dios laa.
7 Peru rarí riduꞌya nu uluu Melquisedec ndaaya laabe,
ne irá binni nanna jma risaca ni riguu ndaaya que ni riuu ndaayaꞌ.
8 Ca sacerdote ni ricaa diezmo yanna ri la?
binni guidxilayú laacaꞌ,
ne zadxiña dxi gati caꞌ,
peru Melquisedec qué riete lu Xquiꞌchi Dios pa guti.
9 Ca xiiñi Leví ni nuu de sacerdote yanna la?
rudii binni laaca diezmo.
Peru zanda gabi nu casi ñaca laca bidii cabe diezmo Melquisedec chiqué,
ra bidii Abraham ni laabe,
dxi yechagalú be laa que.
10 Purti neca caꞌru gale Leví chiqué,
peru xiiñi Abraham laa,
ne ra bidii Abraham diezmo Melquisedec la?
casi ñaca ne laabe bidii be.
11 Pa qué ñuu sacerdote ni za de Leví,
qué ñaꞌta di ley.
Yanna pa ñanda nusiá cabe ladxidóꞌ binni biꞌni ni na ley que la?
ma qué niquiiñe ñeeda sti sacerdote casi Melquisedec ni cadi za de Aarón.
12 Ne ra bidxaa sacerdote la?
laca bidxaa ley.
13 Ne sacerdote cubi ni cuzeꞌte nu ri la?
nga Jesucristu,
ne cadi za be de familia sti Leví,
sínuque za be de adxé xiiñi Israel,
ne nin tobi de familia stibe qué ñaca sacerdote.
14 Purti irá binni nanna gule Jesús Señor stinu lade ca xiiñi Judá,
ne qué ñuu dxi nuzeete Moisés Judá dxi uníꞌ tuu nga aca sacerdote.
15-16 Ne rihuinni dxichi jma risaca Cristu que ca xcaadxi sacerdote,
purti casi Melquisedec laa.
Guca be Sacerdote peru cadi purti gule be lade familia ni na ley gaca sacerdote,
sínuque purti nandxóꞌ be;
qué ziuu dxi gati be.
17 Purti cá lu Xquiꞌchi Dios ra na rabi Xiiñiꞌ:
Lii nga sacerdote gola casi Melquisedec,
ne qué ziuu dxi iree lu de laani.
18 Zacá ma ucuá ná ley ni guta chiqué purti qué ñanda ñuni gastiꞌ.
19 Qué ñanda nusiá ni ladxidóꞌ binni.
Nga runi gudixhe Dios sti modo ni dxandí zaquiiñe para uchiña laanu ra nuu.
20-21 Dxi uníꞌ Dios tu aca sacerdote lade ca xiiñi Israel la?
qué ñuni di juramentu.
Peru dxi uníꞌ be aca Cristu sacerdote la?
dxi que huaxa biꞌni be juramentu.
Casi cá lu Xquiꞌchi be ra na:
Ma biꞌni Dios ti juramentu,
ne qué ziuu dxi uchiá ni.
Ne ndi nga na be dxi biꞌni be juramentu que,
na be rabi be Xiiñi be:
Lii nga sacerdote casi Melquisedec,
ne qué ziuu dxi iree lu de gacu ni.
22 Nga runi nanna dxichi nu jma zanda uchiña Jesús laanu ra nuu Dios que ca sacerdote uyuu chiqué.
23 Dxi caꞌru gueeda Jesús la?
qué ñanda ñaana ti sacerdote si,
purti rati,
ne óraque riuu stobi adxé.
24 Peru qué ziuu dxi gati Jesús,
nga runi qué ziuu dxi iree de aca sacerdote stinu.
25 Zanda ulá be cani uchiña be ra nuu Dios ne ma qué zanitilú caꞌ,
purti qué ziuu dxi gati be,
ne nuu be para iníꞌ né be Dios pur laacaꞌ.
26 Ne sacerdote casi pe laabe ca,
nga ni caquiꞌñe nu.
Nachaꞌhui be ne nayá ladxidóꞌ be,
purti qué ñuu dxi nuchee be.
Qué ñaca né be cani cuchee tobi si,
ne ma bidxiiba Dios laabe ibáꞌ.
27 Adxé laabe para ca sacerdote ni uyuu chiqué,
purti ca ngue la?
irá dxi gupa ca xidé biiti ca tuuxa maniꞌ,
ne binéꞌ ca rini stime lu altar para usigaꞌde ca Dios.
Nirudóꞌ runi cabe ni para guiaxa xpecadu pe cabe,
ne óraque ru guni cabe ni para sti binni.
Peru Cristu la?
ti tiru si bisigaꞌde rini stiꞌ Dios pur irá nu,
dxi guti be que,
ne ma cadi naquiiñe guni ru be ni sti tiru.
28 Cani uca sacerdote gola purti cá lu ley sti Moisés aca ca ni la?
bichee caꞌ,
purti binni guidxilayú laacaꞌ.
Peru biꞌni Dios ti juramentu ra gudixhe aca Xiiñi sacerdote gola.
Nga nuu jlugar ley yanna.
Ne qué ñuu dxi nuchee Xiiñi be que.