6
Nga runi,
naquiiñe ucáꞌ ique nu iniisi nu lu stiidxa Dios ne cadi guiaana nu casi cani deru cuzulú caziidi de Cristu.
Dede dxi bizulú nu,
ma biziꞌdi nu naquiiñe guni cre nu Dios ne usaana nu modo bibani nu dxi caꞌru gunibiáꞌ nu stiidxaꞌ.
2 Ma biziꞌdi nu de enda riuu nisa,
ne ma biziꞌdi nu ni runi ca hermanu gola,
riguixhe ná ca luguiá sti hermanu para chuꞌ ndaayaꞌ.
Ne ma nanna nu ziuu dxi guiasa binni de lade gueꞌtuꞌ,
ne óraque zabidxi Dios cuenta laanu,
ne qué ziuu dxi idxaa ni iníꞌ be dxi que.
3 Peru cadi tiisi ma biziꞌdi nu biaꞌ cá,
guiaana dxí nu,
sínuque huaziuu ti nu ndiꞌ,
pa na Dios.
4 Pa gusaana tobi de guni cre Cristu la?
iruti zanda uchiña laa ra nuu be sti tiru.
Purti ma biene stiidxa be ne ma biiya enda nachaꞌhui sti Dios,
ne ma ucuaa Espíritu Santu.
5 Ma bidii cuenta galán stiidxa Dios,
ne laca ma biene xi chi aca dxi usihuinni Dios enda nandxóꞌ stiꞌ.
6 Ne pa usaana be irá ni la?
ma qué zanda ru uchaa be laabe,
ne casi ñaca cabigueta cucaa be Cristu lu cruz sti tiru pur ni nuu ndaani ladxidóꞌ be,
ne cayuni be para uxidxi cabe Cristu.
7 Zeda aca binni casi ti layú ni reꞌ irá nisa guie ni guiaba lú.
Pa cuee ndu layú que xiixa para ni runi dxiiña lú la?
zaguu Dios ndaaya ni.
8 Peru pa nisi guixi ne guiꞌxhi udii ni la?
qué iquiiñe ni para gastiꞌ,
ne ziaba dí sti Dios luguiá ni,
ne ziaꞌqui ni.
Zuni Dios ni ma uníꞌ
9 Peru neca cayabe irá ndi laatu,
hermanu ni nadxiee caꞌ,
nanna ziuu tu ndaayaꞌ,
ti nanna ma bilá tu.
10 Nanna jneza runi Dios,
ne qué zusiaanda irá enda nachaꞌhui ni huayuni tu ca xpinni purti nadxii tu laa.
Huayacané tu laaca ne cayacané ru tu laaca dede yanna.
11 Ne racaladxe cadi guiaana dxí nin tobi de laatu de guni xhiiña be ne enda nayecheꞌ,
ti icaa tu irá ni racalaꞌdxi be udii be laatu.
12 Cadi ichaaba tu,
sínuque laguni casi cani ma napa ni bidii stiidxa Dios udii binni.
Cacaa cabe ni purti runi cre cabe ne cadi caree cabe gana.
13 Guietenalaꞌdxi nu de dxi bidii stiidxa Dios Abraham.
Bini jurar be pur laca laabe purti iruti ru jma nandxóꞌ que laabe para ñuni jurar be pur laa.
14 Na be rabi be Abraham:
“Dxandí zaguaa ndaaya lii ne zutale ca xiiñi luꞌ.”
15 Ne uleza Abraham sin nixhacalaꞌdxi dede bidxiña dxi ucuaa ni uníꞌ Dios zudii laa.
16 Ora runi jurar binni la?
runi jurar pur tobi ni jma nandxóꞌ que laa,
ti guni cre ni caníꞌ né be que dxandí zuni be ni.
17 Peru iruti ru jma nandxóꞌ que Dios.
Nga runi bini jurar be pur laca laabe ti ganna dxichi cani cudii stiidxa be que dxandí zuni be ni ma uníꞌ be,
ne qué zuchaa be gastiꞌ.
18 Ra uníꞌ be ne ra bini jurar be que bisaa be ni chupa,
ne nanna nu qué zusiguii be.
Ne irá nga rusieche laanu,
laanu cani biyubi nu acané be laanu,
ne cá lú nu ni bidii stiidxa be udii be laanu.
19-20 Nanna dxichi nu zuni be irá ni ma uníꞌ be,
ne nga nga ni naaze dxiichi ladxidóꞌ no ti qué iniibi nu,
casi rinaaze ancla barcu para qué iniibi.
Nga runi ma cadi cá lú nu ni nuu ndaani guidxilayú riꞌ,
sínuque ni nexhe ibáꞌ para laanu ra ma nuu Jesús zuhuaa lu Bixhoze pur laanu,
ne qué ziuu dxi guiaana dxí be de aca be sacerdote gola casi Melquisedec.