5
Gulí Dios ca sacerdote gola para iníꞌ né laa pur binni,
ne para quixhe ca ni guedané binni usigaꞌde Dios lu altar,
ne para idxiña né ca rini sti mani ni ma guti ra nuu Dios,
para guiá ni huachee ca binni que.
2 Peru qué rixhacalaꞌdxi cabe cani qué riene ne cani ruchee,
purti laca binni guidxilayú laacabe ne laca zanda uchee cabe.
3 Ne purti ruchee cabe la?
laca naquiiñe guedané cabe ni usigaꞌde cabe Dios para guiaxa stonda cabe,
casi runi cabe pur binni.
4 Peru iruti zanda gudxiiba laca laa aca sacerdote gola,
sínuque Dios nga ribí tu aca ni,
casi ulí Aarón,
primé sacerdote gola.
5 Nin Cristu qué nudxiiba laca laa,
sínuque Dios ulí laabe para aca be sacerdote gola stinu.
Purti maca cá lu Xquiꞌchi Dios ra na rabi laabe:
Lii nga Xiiñeꞌ.
Dede yanadxí zusihuinne Xiiñe lii.
6 Ne laca cá sti lugar lu Xquiꞌchi Dios ra na rabi laabe:
Lii nga sacerdote gola,
ne qué ziuu dxi guiaana dxí de aca lu ni,
casi Melquisedec.
7 Dxi uyuu Cristu ndaani guidxilayú,
unaba lu Dios nulá laa de enda guti que,
dede biina ne bicaa ridxi.
Bicaa diaga Dios laabe purti qué nudxiiba be laca laabe sínuque biꞌni be irá ni na.
8 Peru neca Xiiñi Dios laabe,
udiꞌdi be irá enda naná que para biziidi be uzuuba be diidxaꞌ.
9 Biꞌni be irá ni gudixhe Bixhoze be guni be,
ne pur ni biꞌni be ca zalá irá cani uzuuba stiidxa be.
10 Ne ma biꞌni Dios laabe sacerdote gola,
casi Melquisedec.
Nagana ibigueta tobi ni usaana de guni cre
11 Napa stale ni nusiide laatu de irá ndiꞌ,
peru nagana usiene ni laatu yanna purti huaxiéꞌ rucaa ique tu iziidi tu.
12 Ma xadxí de bini cre tu,
mápeca ñanda nusiidi tu stobi,
peru naquiiñe uzulú tu iziidi tu stiidxa Dios sti tiru,
purti nin ra jma qué igana caꞌru guiene tu.
Nuu tu casi baꞌduꞌ,
leche si zanda gue tu,
qué zanda go to gueta.
13 Purti cani reꞌ leche si la?
nga casi ca binni ni caꞌru guiene chaahui ni rusiidi stiidxa Dios laanu guni nu,
purti para laani,
baꞌdu cayadxi ru laacabe.
14 Peru cani ma zanda go gueta la?
nga cani ma nanna uná nga jneza ne uná nga ni cadi jneza,
purti ma biaa ca guni ca jneza.