4
Ne pa zacá uca ca binni que la?
yanna laanu naquiiñe gataná nu ti qué aca nu casi uca cabe,
ne ma qué chuꞌ nu ra iziilaꞌdxi nu,
neca ma gudixhe Dios icaa nu ni.
2 Purti laca ma bina diaga nu stiidxa be casi bina diaga cabe,
peru qué niquiiñe ni para laacabe purti bina diaga cabe peru qué ñuni cre cabe ni.
3 Peru laanu ma ucuaa nu stiidxa Dios,
nga runi ziuꞌ nu ra chi udii laanu para iziilaꞌdxi nu,
neca laacabe qué ñuu cabe.
Casi cá ni lu guiꞌchi ra bizeete Dios de laacabe:
Bidxiiche nia laacabe
ne bine ti juramentu ma qué ziuu dxi chuꞌ cabe ra niziilaꞌdxi cabe.
Qué ñuu ca binni que ra niziilaꞌdxi caꞌ,
cadi ti caꞌru aca chaahui ni,
purti maca gudixhe chaahui Dios ni dede dxi uyáꞌ guidxilayú.
4 Cá ca diidxa ri lu Xquiꞌchi Dios:
Lu gadxe gubidxa de cuzáꞌ Dios guidxilayú biziilaꞌdxi de irá dxiiña ni biꞌniꞌ.
5 Ne laca cá ca diidxa ri lú ni:
Qué ziuu dxi chuꞌ ca ra niziilaꞌdxi caꞌ.
6 Qué ñuu ca binni que ra niziilaꞌdxi caꞌ,
purti qué nuzuuba ca stiidxa Dios,
peru nuu tu ziuu purti ma gudixhe Dios aca ni.
7 Udiꞌdi ru stale iza de bichee ca binni que,
bisiníꞌ Dios David,
ne cá ni lu Xquiꞌchi be ra na David:
Pa iníꞌ né Dios laatu yanadxí
cadi guni tu ladxidóꞌ to naguidxi.
Zacá nanna nu gudixhe ru Dios ti dxi iníꞌ né laanu,
ne yanna nga laani.
8 Purti dxi ma guti ca binni ni bichee que la?
gunda biuu né Josué ca xcaadxi que ndaani guidxi ra na Dios iziilaꞌdxi caꞌ.
Pacaa la?
qué nuzeete ru Dios sti dxi.
9 Nga runi nanna nu chi udii ru Dios ca xpinni ra iziilaꞌdxi chaahui caꞌ.
10 Ne irá ni chuꞌ raqué zaziilaꞌdxi de xhiiñaꞌ,
casi biziilaꞌdxi Dios dxi binduuxe xhiiña bizáꞌ guidxilayú.
11 Nga runi huaziuu ti nu ndi para ganda chuꞌ nu ra chi iziilaꞌdxi nu,
ne cadi guiaba nu casi biaba ca binni ni qué nuzuuba stiidxa Dios que.
12 Stiidxa Dios la?
rudii enda nabani laanu,
ne nandxóꞌ ni.
Jma naduxhu ni que ti puñal ni naduxhu iropa ladu,
purti zanda guiaazi ni dede jma gueteꞌ,
dede ndaani dxita.
Ora ma yendá stiidxa be que ndaani ladxidóꞌ no la?
ribee irá ni nuu ndaani ladxidóꞌ no,
ne ni cá lu xquenda biaani nu,
para ganna nu ximodo laanu.
13 Gasti nuu ndaani guidxilayú ni qué zanda guꞌya Dios.
Ruuya dxichi be irá xixé ni nuu,
ne laabe cuidxi be cuenta laanu.
Jesús, sacerdote gola
14 Napa nu ti sacerdote gola ni nabé nandxóꞌ,
ni riníꞌ pur laanu,
ne nga nga Jesús,
Xiiñi Dios ni ma nuu ra nuu Bixhoze.
Nga runi naquiiñe cadi ichaꞌcha nu de ni ma runi cre nu.
15 Beda gaca sacerdote gola stinu binni guidxilayú ne udiꞌdi irá ni rididi nu.
Xi si la?
qué nuchee be.
Zanda guiá be laanu purti nanna pe be xii nga nagana para laanu,
ne zanda acané be laanu ora ma qué ganda sa nu.
16 Nga runi zanda idxiña nu ra nuu Dios stinu ni nadxii laanu sin idxibi nu,
purti nachaꞌhui be,
riá be laanu,
ne zacá zacané be laanu ora caquiꞌñe nu tu acané laanu.