Jma risaca Jesús que Moisés
3
Hermanu caꞌ,
ne laatu zeeda tu lade cani ulee chu Dios para laa.
Nga runi laguietenalaꞌdxi Cristu Jesús.
Biseenda Dios laabe guidxilayú,
beda gaca be sacerdote gola stinu.
2 Jneza biꞌni be irá ni biseenda Dios laabe beda guni be ndaani guidxilayú,
casi biꞌni Moisés chiqué.
Laca jneza biꞌni ne gupa chaahui ca xpinni Dios.
3 Peru qué zanda uchaaga nu Moisés Jesús purti jma risaca Jesús que laabe,
zanda gabi nu casi ti yoo,
jma risaca xpixuaana ni que cani runi si dxiiña ndaani ni.
4 Irá yoo napa xpixuaanaꞌ,
peru Dios nga xpixuaana irá xixé ni nuu.
5 Dxandí biꞌni Moisés xhiiña Dios xpixuaana jneza,
ne gupa chaahui ca xpinni be,
ne uníꞌ ni gudxi be laa iníꞌ,
ni chi tidxi be binni.
6 Peru Cristu la?
Xiiñi pe Dios laa ne runi xhiiña Bixhoze jneza.
Bisaana Bixhoze be laabe guꞌya be ca binni lidxi.
Laanu nga ca binni lidxi Bixhoze be pa qué usaana nu de guni cre nu laabe ne cueza nu ne stale enda nayeche dxi gueda caa be laanu.
Ra naguixhe Dios iziilaꞌdxi ca xpinni
7 Guietenalaꞌdxi nu ra cá lu Xquiꞌchi Dios ni uníꞌ Espíritu Santu.
Ndi nga na be:
Pa iníꞌ né Dios laatu yanadxí,
8 cadi guni tu ladxidóꞌ to naguidxi casi biꞌni ca bixhoze gola tu dxi uzá ca ndaani guiꞌxhi ne bichiichi ca laabe.
9 Casi na be:
Idubi naca cuarenta añu bichiichi cabe naa,
ne biyubi cabe pabiáꞌ zanda gune huantar laacabe,
neca biiya cabe irá ni bine para laacabe ca dxi que.
10 Nga runi bidxiiche nia laacabe
ne gudxe óraque:
“Nisi canauchee ca binni riꞌ.
Qué riná ca guni ca ni rabeꞌ.”
11 Nga runi bidxiiche nia laacabe
ne bine ti juramentu,
qué ziuu dxi chuꞌ cabe ra nudiee laacabe
para niziilaꞌdxi cabe.
12 Yanna hermanu caꞌ,
laguuya gá laatu,
cadi laca aca ladxidóꞌ to nadxabaꞌ ne qué guni cre tu Dios ni nabani,
pacaa zaxele tu de laa.
13 Ni guni tu la?
cada tobi ulidxe stobi irá dxi laga zanda,
ti cadi uchee tobi de laatu sin ganna,
ne aca naguidxi ladxidóꞌ,
ne ma qué ulabi Dios.
14 Purti naca pe nu xpinni Cristu,
pa qué ichaꞌcha nu de ni runi cre nu,
cásica bini cre nu dxi ucuaa nu stiidxaꞌ.
15 Sti tiru cusietenalaꞌdxe laatu ni cá lu Xquiꞌchi Dios ra na:
Yanadxí ca,
pa iníꞌ né Dios laatu,
cadi guni tu ladxidóꞌ to naguidxi
casi biꞌni cani bichiichi laabe que.
16 Tuu nga cuzeete be ra na be bina diaga stiidxa Dios ne qué nulabi ni.
Cuzeete be cani ulee Moisés ndaani guidxi Egipto.
17 Nabé bidxiichi né Dios laacabe idubi cuarenta añu uzá cabe ndaani guiꞌxhi que,
purti qué ñaana dxí cabe de nuchee né cabe laa.
Nga runi ndaani guiꞌxhi que guti cabe.
18 Purti biꞌni Dios ti juramentu,
qué zaguu laacabe ra niziilaꞌdxi cabe saca qué nuzuuba cabe stiidxaꞌ.
19 Zacá riduꞌya nu qué ñanda ñuu ca binni Israel ra ze ca para niziilaꞌdxi ca purti qué ñuni cre caꞌ.