Ximodo ibani cani ma bichaganáꞌ
3
Hermana caꞌ,
lauzuuba stiidxa xheela tu,
purti pa nuu de laaca qué runi cre stiidxa Cristu la?
zándaca iguudxi
2 ra guꞌya runi xheela jneza ne runi respetar laa.
Ne zacá cadi naquiiñe iníꞌ pe tu para ucuudxi tu laacaꞌ.
3 Cadi ucaa ique tu enda ruzuchaahui de luguiá si,
casi modo guni tu ique tu,
o gaze tu oro,
o gacu tu lari ni jma risaca,
4 sínuque laucaa ique gaca tu nachaꞌhui ne binni,
ne gaca tu nadóꞌ,
purti nga nga enda sicarú ni risaca nezalú Dios,
ne nga nga enda sicarú ni qué rinitilú.
5 Zacá nga bizuchaahui ca gunaa ni uyuu chiqué,
cani uzá gaxha de Dios.
Bini cre ca Dios de idubi ladxidóꞌ caꞌ,
ne bizuuba ca stiidxa xheela caꞌ.
6 Casi biꞌni Sara,
bizuuba stiidxa Abraham dede gudxi laa señor stiꞌ.
Ne zaca tu casi Sara,
pa guni tu jneza,
ne qué idxibi tu.
7 Zacaca laatu,
hermanu caꞌ,
lauyubi modo guiene tu xheela tu.
Lagaca nachaꞌhui ne laacabe,
cadi purti si jma nadá cabe que laatu,
sínuque ne laca purti ma bidii Dios laacabe enda nabani ni qué zaluxe,
cásica bidii ni laatu pur enda nachaꞌhui stiꞌ.
Zacá laguni ti cadi uchiiña gasti laatu ora iníꞌ né tu Dios.
Cani cayacaná purti cayuni jneza
8 Yanna la?
cayabe irá tu:
lachuu tobi si,
ne lailaselaꞌdxi saa,
ne laganaxhii saa casi enda biꞌchiꞌ.
Lagaca nachaꞌhui ne cadi udxiiba tu laca laatu.
9 Neca uchee né binni laatu,
cadi uquixe tu ni laacaꞌ,
ne pa cuꞌ dí ca laatu,
cadi cuꞌ dí tu laacaꞌ,
sínuque lainaba lu Dios cuꞌ ndaaya laacaꞌ.
Purti nga nga biꞌni Dios ne laatu,
uníꞌ né laatu para cuꞌ ndaaya laatu.
10 Sicarí cá lu Xquiꞌchi Dios:
Ni racalaꞌdxi ibani nayecheꞌ ne tidi dxi galán la?
ucueeza de iníꞌ ni cadi jneza
ne ucueeza ruaa de usiguii,
11 ixele de ni nadxabaꞌ ne guni ni jneza,
uyubi ximodo idxaaga irá binni,
ne guni ni de idubi ladxidóꞌ.
12 Purti rapa Señor cani runi jneza,
ne rucaa diaga be laaca ora iníꞌ né ca laabe,
peru rudxii deche be cani runi ni nadxabaꞌ.
13 Tu zanda gaꞌni ná laatu pa puru si ni jneza cuyubi tu guni tu yaꞌ.
14 Peru pa cayuni tu jneza ne acaná tu la?
dichoso de laatu.
Cadi idxibi tu binni guidxilayú,
ne cadi uchibi iruti laatu,
15 sínuque lausisaca Cristu ndaani ladxidóꞌ to.
Laguietenalaꞌdxi laa nga Señor stitu.
Ne lagataná para icabi tu cani racalaꞌdxi ganna xii nga runi cre tu,
peru laicabi laaca ne diidxa nadóꞌ ne respetu.
16 Lasá jneza ti ganna tu nayá ladxidóꞌ to.
Ne zacá zatuí lú cani cananíꞌ laatu purti si xpinni Cristu laatu,
ra guꞌya ca dxandí runi tu jneza.
17 Pa acaná tu ra cayuni tu jneza la?
zaa,
pa nga ni na Dios.
Peru pa acaná tu ra cuchee tu la?
laatu cuyubi tu ni.
18 Purti Cristu laca ucaná,
dede guti para biaxa ni bichéꞌ nu.
Ti tiru si guti be pur irá nu.
Qué ñuu dxi nuchee be peru ucaná be sti irá ni bichéꞌ nu,
para uchiña be laanu ra nuu Dios.
Guti cuerpu stibe,
peru qué ñati xhialma be.
19 Ne uyé xhialma be que,
yegüí né ca espíritu yeguyoo diidxaꞌ.
20 Qué nuzuuba ca alma que diidxa chiqué dxi bizáꞌ Noé arca.
Laga cuzáꞌ Noé arca que,
qué nixhacalaꞌdxi Dios,
uleza pa ninaba ca perdón laa.
Peru xhono si binni bilá ndaani arca que ra undisa nisa ni.
21 Ne zanda gabi nu zeda gaca nisa que casi ra uyúꞌ nisa nu para bilá nu.
Ne uyúꞌ nisa nu,
cadi para usiá nisa que ra nabiidi ladi nu,
sínuque para usihuinni nu ma bia ladxidóꞌ no ne canaba nu lu Dios acané laanu sa nu modo na.
Bilá be laanu purti bibani Cristu de lade gueꞌtuꞌ.
22 Ne ma nuu Cristu ibáꞌ zuba cueꞌ Dios,
ne irá ca ángel ne cani runi mandar ne cani nandxóꞌ ruzuuba ca stiidxa be.