Iquiiñe tu gracia bidii Dios laatu
4
Nga runi cásica ucaná cuerpu sti Cristu la?
zaqueca laatu laca cadi idxibi tu acaná tu,
purti ni ma ucaná pur Cristu la?
casi ñaca ma guti para enda ruchee,
2 ti ibani para guni ni na Dios,
biaꞌ dxi ibani ndaani guidxilayú riꞌ,
ne cadi ni na ique.
3 Ma biaꞌ cati de guni tu irá ni runi cani qué runibiáꞌ Dios.
Chiqué uyuu né tu laacabe tobi si lu irá viciu.
Ucuá ique tu ni cadi jneza,
uxudxi tu,
biꞌni tu saa para xhudxi si tu,
ne yenanda tu ca bidóꞌ,
neca nexhe cadi chi nanda tu laacaꞌ.
4 Yanna ma ridxagayaa cabe xiñee qué rizá né tu laacabe lu irá ni cadi jneza ni runi cabe ne nga runi riníꞌ cabe laatu.
5 Peru napa cabe xidé uzuhuaa cabe nezalú Dios ni ma nuu para cuidxi cuenta irá xixé,
cásica cani nabani zaqueca cani ma guti.
6 Nga runi bireeche stiidxa Cristu lade cani ma guti.
Guti ca casi rati irá binni guidxilayú peru nabani né xhialma ca Dios.
7 Ma zeda dxiña dxi iluxe irá xixé ni nuu ndaani guidxilayú.
Nga runi lacuu xpiaani tu ne cadi ucaa ique tu ni cadi jneza,
ti ganda iníꞌ né tu Dios de idubi ladxidóꞌ to.
8 Ne ni jma naquiiñe la?
ganaxhii saa tu,
purti pa nadxii tu stobi la?
neca uchee né laatu qué zuquixe tu ni laa.
9 Lauchagalú saa sin quiche ruaa tu.
10 Cada tobi iquiiñe gracia ni bidii Dios laa para acané ca xcaadxi,
para ihuinni jneza cayuni né gracia bidii Dios laa.
11 Ni napa gracia para iníꞌ la?
güi né binni stiidxa Dios.
Ne ni napa gracia para acané stobi la?
guni ni biaꞌ stipa ni bidii Dios laa.
Ne irá xixé ni guni tu,
laguni ni para gusisaca tu Dios purti xhiiña Jesucristu cayuni tu.
Cadi guiaana dxí nu de usisaca nu laabe,
ne qué ziaana dxí be de guni mandar be.
Ximodo tidi xpinni Cristu ni nagana
12 Hermanu ni nadxiee caꞌ,
cadi idxagayaa tu ora gueeda xiixa ni nabé naná luguiá tu,
maca nanna tu zaca ni.
13 Sínuque laguieche purti cayacaná tu casi ucaná Cristu,
ne zacá zadxá ladxidóꞌ to de enda nayeche dxi gueeda be,
dxi ihuinni pabiáꞌ risaca be.
14 Dichoso de laatu pa cuꞌ dí cabe laatu tisi xpinni Cristu laatu,
purti nuu né Espíritu sti Dios ni nandxóꞌ laatu.
Laacabe riníꞌ cabe laabe peru laatu rusisaca tu laabe.
15 Peru pa acaná tu,
cadi gaca ni pur ni huayuni tu,
cadi guuti tu,
cadi cuana tu,
nin guni tu xiixa ru ni cadi jneza,
nin cuꞌ ruaa tu ratiica si.
16 Peru pa acaná tuuxa purti runi cre Cristu la?
cadi ituí lú,
sínuque udii diuxquixe Dios purti xpinni Cristu laa.
17 Ma bidxiña hora cuꞌ biaꞌ Dios stonda xpinni,
ne pa uzulú né be laanu la?
xi gaca xa de cani qué rizaalaꞌdxi stiidxa be yaꞌ.
18 Casi cá ni lu Xquiꞌchi be:
“Pa nagana ilá ni nachaꞌhui la?
xi gaca xa de cani qué runi cre Dios,
ne cani qué runi jneza yaꞌ.”
19 Nga runi,
pa cayacaná tu purti nga nga ni gudixhe Dios para laatu la?
cadi guiaana dxí tu de guni tu jneza ne lausaana xhialma tu lu ná Dios ni bizáꞌ laanu,
purti laa qué zusaana laatu.