Culidxe Pedru ca xpinni Cristu
5
Yanna la?
chinié nia cani naca hermanu gola lade ca xpinni Cristu.
Naa laca naca hermanu gola casi laatu.
Naa biiya piaꞌ ra ucaná Cristu,
ne ziuaa lu enda nandxóꞌ stibe,
casi laatu,
dxi ganda dxi ihuinni ni.
2 Rinaba laatu,
hermanu gola caꞌ,
lagapa ca xpinni Dios,
cani bisaana be lu ná tu.
Laguni ni de idubi ladxidóꞌ to casi racalaꞌdxi Dios,
ne cadi purti napa tu xidé guni tu ni,
nin pur bidxichi,
sínuque laguni ni de idubi ladxidóꞌ to.
3 Cadi guni mandar tu laacabe casi ñaca laatu nga xpixuaana cabe,
sínuque lasá jneza ti guꞌya cabe ximodo ibani cabe.
4 Ti ora gueeda Pastor ni naca xaíque sti irá xixé nu la?
zudii laatu ti premiu ni qué ziuu dxi initilú.
5 Zaqueca laatu,
hermanu ni nahuiini ruꞌ,
lauzuuba stiidxa ca hermanu gola.
Ne irá tu laizaalaꞌdxi saa,
sin udxiiba tu laca laatu,
purti cá lu guiꞌchi ra na ni:
“Nanalaꞌdxi Dios ni runi cani rudxiiba laca laa,
peru racané be cani qué rudxiiba laca laa.”
6 Laganna gasti nga laatu nezalú Dios ni nandxóꞌ,
ti udxiiba be laatu dxi naguixhe be guni be ni.
7 Cadi chuꞌ tu xizaa,
sínuque laquixhe irá ni lu ná be,
purti laabe cayapa be laatu.
8 Lacuu xpiaani tu ne lagataná,
purti canazá binidxabaꞌ,
enemigu stitu,
canananda laatu casi ti lion ni canaguu beedxeꞌ,
canayubi tu uxuuxe.
9 Lauzuhuaa dxiichi lu ni runi cre tu,
ne laucaa lú laabe,
purti nanna tu cadi laasi tu cadiꞌdi tu ni,
sínuque zacaca cayacaná ca hermanu stitu ni nuu irá ladu.
10 Ne ora ma ucaná tu caadxi la?
jma rusi zaniisi tu lu stiidxa Dios,
zuzuhuaa chaahui be laatu,
ne zudii be stipa laatu ne zuni be laatu naguidxi.
Laabe racané be laanu,
uníꞌ né be laanu para isaca né nu Jesucristu lu enda nandxóꞌ sti ni qué ziuu dxi iluxe.
11 Laabe qué ziuu dxi guiaana dxí be de isaca be ne guni mandar be.
Amén.
Diuxi
12 Napa Silvanu casi ti hermanu ni qué riree chu lu jneza Dios.
Laa ucané naa bicaa guiꞌchi huiini ri lú tu.
Bicaa ni para acaniá laatu indisa ique tu ne para gabe laatu irá ni bidii Dios laatu,
irá ni rusihuinni pabiáꞌ nadxii laatu.
Yanna cadi ichaacha tu de ni runi cre tu.
13 Ca xpinni Cristu ni nuu Babilonia,
cani gulí Dios cásica gulí laatu,
cuseenda ca stiuxi tu,
ne Marcu xiiñe laca cuseenda stiuxi tu.
14 Laugapa diuxi saa ne laquidxi saa purti hermanu laatu.
Gata dxí ladxidóꞌ to irá tu,
ca xpinni Jesucristu.
Amén.