Caguixhená Santiagu ca ricu
5
Yanna,
laucaa diaga,
ricu caꞌ.
Laguuna ne laucaa ridxi pur enda naná ni chi gueeda luguiá tu.
2 Ma qué zaquiiñe irá bidxichi ni napa tu ca,
ne mápeca cayó bandaa xhaba tu.
3 Ma cá tini oro ne plata stitu,
ne zusihuinni tini que stonda tu,
purti zunidé ni laatu casi runi gui.
Cutopa lú tu bidxichi para iquiiñe laatu stobi dxi,
peru laca laani usihuinni ni stonda tu dxi usaba ná Dios laatu.
4 Huaguite si tu cani huachuugu semiá stitu,
ne qué huaguixe tu laacaꞌ,
ne yanna casi ñaca culuíꞌ ni laatu.
Ne ma bina diaga Señor Dios stidxi cani ulee né laatu guela.
5 Ndaani guidxilayú ri huayapa tu irá ni huayacalaꞌdxi tu,
ne huayuni tu irá ni gapa tu gana.
Huachá tu ladxidóꞌ to casi ti yuze ni caroo para gatiꞌ.
6 Huadxiiba tu donda ique cani nayá ladxidóꞌ,
huayuuti tu laaca sin indisa ná ca lú tu.
Tidi binni ra nagana sin ixhacalaꞌdxiꞌ
7 Peru laatu,
hermanu caꞌ,
cadi ixhacalaꞌdxi tu irá ni cayuni cabe laatu ca.
Lacueza ganda dxi gueeda Señor.
Laguuya modo runi cani riguu biní:
qué rixhacalaꞌdxi ca laga cabeza ca guiaba primé nisa guie ne rairopa para cuee ca guela.
8 Zaqueca laatu,
neca cazaaca tu irá nga,
cadi ixhacalaꞌdxi tu,
ne cadi cui sa tu atrá,
purti ma zeda yuba dxi gueeda Señor.
9 Hermanu stinne caꞌ,
cadi cuꞌ saa tu xqueja tu,
ti qué quiba donda ique tu,
purti ma zeeda Dios gaxha,
ne laa udxiiba donda ique cabe.
10 Hermanu stinne caꞌ,
laguni casi biꞌni ca profeta ni byuíꞌ né binni stiidxa Señor chiqué.
Qué nixhacalaꞌdxi ca neca udiꞌdi ca ra nagana.
11 Riduꞌya nu yanna pabiáꞌ nayeche biaana cabe ora ma udiꞌdi cabe ra nagana sin nixhacalaꞌdxi cabe.
Casi uca Job:
nabé naná ni beeda luguiá be,
peru qué nibí sa be atrá.
Ne nanna tu xi biꞌni Señor para laabe óraque,
purti riá Señor binni,
ne rilaselaꞌdxi laacaꞌ.
12 Yanna laiziidi chaahui ni chi tidxe laatu riꞌ:
cadi guni jurar tu,
nin pur ibáꞌ,
nin pur guidxilayú,
nin pur intiica,
sínuque lainíꞌ “Ya” o “Coꞌ”,
ne nga si,
ti cadi quiba donda ique tu.
Naquiiñe iníꞌ né binni Dios
13 Pa nuu tobi de laatu cadiꞌdi ra nagana la?
iníꞌ né Dios.
Pa nuu ni cayeche la?
guꞌnda cantu.
14 Pa nuu tobi de laatu huará la?
useenda caa ca hermanu gola de lade cani runi cre,
iníꞌ né ca Dios pur laabe ne xhubi ca aceite ladi be laga canaba ca lu Señor acané laabe.
15 Ne pa dxandí runi cre ca zuni Dios ni canaba ca la?
zalá be,
ne zandisa Señor laabe,
ne pa huachee be la?
zuxhá Señor stonda be.
16 Pa nuu tobi de laatu nanna ma bichee la?
gabi ca xcaadxi hermanu xi biꞌniꞌ,
ne cada tobi de laatu iníꞌ né Dios pur ca xcaadxi,
ti aca tu nazaaca de irá modo.
Ora riníꞌ né ca xpinni Dios laa de idubi ladxidóꞌ ca la?
rugaanda stiidxa ca lú be.
17 Uca profeta Elías binni guidxilayú casi laanu,
ne ti tiru unaba be lu Dios de idubi ladxidóꞌ be cadi usaba nisa guie,
ne zaqué uca ni.
Qué ñaba nisa guie guidxi que chonna iza arondaꞌ.
18 Bigueta uníꞌ né be Dios peru ngue ma canaba be guiaba nisa guie,
ne dxi que ruꞌ biaba nisa guie ne bigueta biree guela.