Ni nadxii guidxilayú
4
Xiñee ridinde tu ne rindaa saa tu pue.
Ñee cadi zeeda ni purti cada tobi ruyubi ni chuꞌlaꞌdxi si la?
2 Purti nuu de laatu ora cayuulaꞌdxi xiixa ne qué ganda icaa la?
dede ñanda ñuuti para nicaa ni.
Ridinde diidxa tu ne ridxela saa tu,
purti racalaꞌdxi tu ni napa stobi peru qué idxela tu ximodo gapa tu ni.
Qué ricaa tu ni racalaꞌdxi tu purti qué rinaba tu ni Dios.
3 O pacaa la?
rinaba tu ni,
peru qué rudii be ni laatu purti cadi jneza ni cá ique tu ora canaba tu ni,
sínuque racalaꞌdxi si tu ni para chi chite tu.
4 Laatu zeda aca tu casi tobi ni cuchee né xheelaꞌ.
Ñee qué ganna tu qué zanda ganaxhii nu Dios ne ganaxhii ca nu guidxilayú la?
Pa chuꞌ né nu binni guidxilayú tobi si la?
cucáꞌ lú nu Dios.
5 Lu Xquiꞌchi Dios nuu ra cá ca diidxa riꞌ:
“Espíritu Santu ni bidii Dios laanu racalaꞌdxi laanu para laasi.”
Ñee na tu cá si ni lu guiꞌchi la?
6 Peru qué rusaana dxí Dios de acané laanu.
Laca cá lu Xquiꞌchi be:
“Rudxii deche Dios cani rudxiiba laca laa,
ne racané cani qué rudxiiba laca laa.”
7 Laudii lugar guni mandar Dios laatu,
ne cadi ulabi tu binidxabaꞌ,
stubi stubi zaxele de laatu.
8 Laidxiña gaxha de Dios,
ne laa zadxiña gaxha de laatu.
Gabe caꞌ laatu,
cani cuchee né Dios caꞌ,
lausiá xpida tu casi ñaca niguiibi ná tu.
Ne zaqueca laatu,
cani racalaꞌdxi ganaxhii Dios ne ganaxhii ca guidxilayú,
lausiá ladxidóꞌ to.
9 Cadi quite né tu enda ruchee,
sínuque lachuu xizaa,
ne lachuu triste ne laguunaꞌ.
Lugar de nuxidxi tu,
laguunaꞌ,
ne lugar de ñeche tu,
lachuu triste.
10 Lagaca nadóꞌ nezalú Señor,
ne laa zusisaca laatu.
Iruti udxiiba donda ique stobi
11 Hermanu caꞌ,
cadi iníꞌ saa tu,
purti pa iníꞌ tu ti hermanu stitu,
ne udxiiba tu donda ique la?
cadi laasi be caníꞌ tu sínuque laca caníꞌ tu ley ne na tu cadi jneza ni.
Ne pa iníꞌ tu zacá la?
lugar de ñuni tu ni na ley que,
laga cusisaca tu laatu jma que laani.
12 Dios gudixhe ni,
ne laa si zanda udxiiba donda ique binni,
ne laca laa si zanda ulá o unitilú.
Lii,
iruti naca lu para udxiiba lu donda ique stobi.
Zeda aca enda nabani casi gupa
13 Yanna laucaa diaga ni chinié riꞌ,
purti nuu de laatu na:
“Yanadxí o ixí ziuu nu tal guidxi,
ne ziaana nu raqué tubiza.
Raqué zazí nu ne zutóꞌ no para cuee nu stale bidxichi.”
14 Xiñee riníꞌ tu zacá,
nin qué ganna tu xi chi aca ixíꞌ.
Ñee na tu ze ru enda nabani napa tu ca la?
Cadi zacá di nga laani,
sínuque zeda aca enda nabani stinu casi gupa riaba siadóꞌ ne sti ratu ma gastiꞌ.
15 Ndi nga ni niníꞌ tu:
“Pa na Señor la?
zabani nu ne zuni nu ndi ne ndicaꞌ.”
16 Peru laatu runi tu laatu nandxóꞌ purti qué ribeza tu xi na xa Dios.
Ne irá ni guni zacá la?
cuchee.
17 Cani ma nanna xii nga jneza ne qué guni ni la?
cuchee né Dios.