Xi naca ludxi binni
3
Hermanu stinne caꞌ,
cadi stale de laatu uyubi aca maistru,
purti naquiiñe guni binni ni usiidiꞌ,
pacaa jma rusi naná zaca para laa dxi uzuhuaa nezalú Dios.
2 Irá nu ruchéꞌ nu.
Peru pa nuu tuuxa qué riuu ora iníꞌ ni cadi jneza la?
laa huaxa ma biziidi guni ni na Dios,
ne ma zanda ucueeza laca laa de guni intiica ni cadi jneza.
3 Riguu binni frenu ruaa mani para guni ni na caꞌ,
ne pur frenu si que la?
randa riné cabe laame ladu acalaꞌdxi cabe.
4 Laca zaqueca barcu,
neca naroꞌba ni peru raca mandar ni pur ti timón huiiniꞌ.
Ne ora acalaꞌdxi bi yooxho chiné ni ladu na la?
rucueeza timón huiini que ni para udxii lú ni ladu na ni cusá ni que.
5 Yanna,
casi frenu ne casi timón que la?
zaqueca nga ludxi nu.
Neca nahuiini ni peru naroꞌba ni runi ni.
Laguuya si laatu pabiáꞌ nahuiini ti batee,
peru zanda ucaa gui ni ti guiꞌxhi roꞌ.
6 Ne ludxi nu laca zeda aca casi ti batee,
ne casi xiixa ni dxá de enda nadxabaꞌ.
De ra nuu binidxaba biaaxha batee que,
ne rucaa gui irá ni runi nu.
Nuu ni lade xcuerpu nu,
ne rusiuꞌdxu ni idubi nu.
7 Zanda idóꞌ irá clase maniꞌ,
mani huiiniꞌ,
beendaꞌ,
ne ca mani ni nuu ndaani nisadóꞌ,
ne ma huasidóꞌ binni laacaꞌ.
8 Peru qué zanda usidóꞌ no ludxi nu,
ne qué zanda ucueeza nu ni,
purti nadxaba ni.
Casi ñaca napa ni venenu ni ruuti.
9 Riquiꞌñe nu ni para udíꞌ nu diuxquixe Dios Bixhoze nu,
ne laca laani rigúꞌ dí né nu binni ni bizáꞌ Dios casi laa.
10 Ruaa ca rusisaca né nu Dios,
ne ruaa queca rigúꞌ dí né nu binni.
Hermanu stinne caꞌ,
cadi jneza guni nu zacá.
11 Zanda xa iree nisa naxhi ne nisa xi de ti ra candani nisa.
12 Hermanu stinne caꞌ,
ñee zanda udii yaga duꞌga aceituna,
ne yaga uvas udii duꞌga la?
Zacaca qué zanda indani nisa naxhi ra candani nisa xi.
Ni dxandí riene
13 Pa nuu de laatu riene ne nuu xpiaani la?
uluíꞌ ni pur modo nabani sin udxiiba laca laa,
ti ihuinni dxandí riene.
14 Peru pa go dí laatu xiñee didi stobi lú tu,
ne cada tobi uyubi para laa si la?
cadi zácaxa tu riene tu purti cadi dxandí ni.
15 Cadi de Dios zeeda irá nga,
sínuque zeeda ni de guidxilayú.
Zacá runi binni ni qué runibiáꞌ Dios,
ne de binidxaba zeeda ni.
16 Purti pa cayó dí laatu xiñee didi stobi lú tu,
ne cada tobi cuyubi para laa si la?
qué zanda chuꞌ tu tobi si,
ne nisi zuni tu ni cadi jneza.
17 Peru ni ma bisiene Dios laa la?
ma qué lica zucaa ique ni nadxabaꞌ,
qué zuyubi diidxaꞌ,
ne qué zucaa lú,
sínuque zaca nadóꞌ ne ziuu razón.
Ziá binni ne zuni stale enda nachaꞌhui de idubi ladxidóꞌ,
ne cadi para udxiiba binni laa.
18 Zaree ndu xhiiña cani runi pur chuꞌ binni tobi si,
purti cayuni ca jneza ne laca cayacané ca ca xcaadxi guni jneza.