PRIME GUIꞌCHI BICAA SAN JUAN
Stiidxa enda nabani
1
Chi güe nia laatu stiidxa Jesucristu ni rudii laanu enda nabani ni qué zaluxe.
Maca nuu be dxi uyáꞌ guidxilayú ne bidxiña dxi biuu be ndaani guidxilayú ne bina diaga du laabe ne biduꞌya du laabe.
Biduꞌya dxichi du laabe ne gudana du laabe,
2 ne ma cayué nia laatu ni biduꞌya du que.
Racaladxe guiene tu cadi uyáꞌ be sínuque maca nuu be dxi uyáꞌ guidxilayú.
Uyuu be ra nuu Bixhoze be peru beeda be ra nuu du ne binibiáꞌ du laabe.
3 Cayué nia laatu ni biduꞌya du ne ni bina diaga du,
ti chuꞌ né tu laadu tobi si casi nuu né nu Dios tobi si ne Jesucristu Xiiñiꞌ.
4 Ne cucaa ni lu guiꞌchi ri para laatu ti guieche chaahui tu pur irá ni.
Dios zeda gaca biaani
5 Cayabi du laatu ni bisiidi Jesucristu laadu,
ne ndi nga laani:
Dios zeda gaca casi biaaniꞌ,
ne enda ruchee stinu zeda gaca casi guelacahui,
ne gasti guelacahui ra nuu be.
6 Nga runi pa gabi nu nuu né nu laabe tobi si peru canauchéꞌ nu la?
cusiguii nu ne cadi dxandí nuu né nu laabe tobi si.
7 Peru pa dxandí sa né nu laabe ra nayaꞌni la?
ma irá nu zaca nu tobi si ne zusiá rini sti Jesucristu Xiiñi be laanu de irá ni huachéꞌ nu.
8 Pa gabi nu qué huachéꞌ nu la?
cusiguii nu laca laanu ne qué lica ganna nu xii nga ni dxandíꞌ.
9 Peru pa uxhuba donda nu lú be nanna dxichi nu zuni be ni ma uníꞌ be,
zuxhá be stonda nu ne zusiá be ladxidóꞌ no de irá ni nadxabaꞌ,
purti jneza ni runi be.
10 Pa gabi nu qué huachéꞌ nu la?
caní nu rusiguii be,
ne cadi dxandí ma ucuaa nu stiidxa be.