Nuu tu caníꞌ pur laanu
2
Xiiñe huiine caꞌ,
cucaa irá ndi lú tu para cadi uchee tu.
Peru pa chuꞌ tu uchee la?
napa nu tu caníꞌ né Dios pur laanu,
Jesucristu ni qué ñuu dxi nuchee.
2 Laabe gudixe be saca bixá stonda nu,
ne cadi sti si nu,
sínuque ne sti irá xixé binni guidxilayú.
3 Pa cayuni nu ni gudixhe Cristu guni nu la?
zacá nanna dxichi nu runibiáꞌ nu laa.
4 Tutiica na runibiáꞌ laabe,
peru qué runi ni na be la?
cusiguii,
ne qué lica ganna xii nga ni dxandíꞌ.
5 Peru ni runi ni na be la?
nadxii laabe de idubi ladxidóꞌ.
Zacá rihuinni dxandí nuu né nu laabe tobi si,
pa guni nu ni na be.
6 Ni na nuu né Dios tobi si la?
naquiiñe sa casi uzá Cristu.
Ni nexhe guni nu
7 Hermanu caꞌ,
cadi caguixhe xiixa nacubi guni tu,
sínuque cucaa ni maca nanna tu dede dxi bizulú tu bicaa diaga tu stiidxa Dios.
Ne ndi nga laani:
“Laganaxhii saa.”
Maca guꞌta ni dede chiqué ne maca bina diaga tu ni.
8 Peru casi ñaca nacubi ni yanna,
purti ma beeda Cristu ni dxandí biaaniꞌ,
ne ma cadi canazá nu lu guelacahui casi chiqué.
Ma cayaca ni bina diaga tu guni tu que,
purti biꞌni Cristu ni,
ne laatu laca cayuni tu ni purti ma nadxii saa tu.
9 Ni na ma nuu ra nayaꞌni peru nanalaꞌdxi stobi la?
nuu ru ra nacahui.
10 Ni nadxii stobi la?
canazá ra nayaꞌni ne qué ziuu ni usaba laa.
11 Peru ni nanalaꞌdxi stobi la?
nuu ru lu guelacahui ne qué ganna pa ladu cheꞌ,
purti canazá ra nacahui ne ma bisicheepa ni lú.
12 Cucaa ndi lú tu,
xiiñe huiine caꞌ,
purti ma guca perdonar ni bichee tu pur ni biꞌni Cristu.
13 Cucaa ndi lú tu,
cani jma huaniisi,
purti ma runibiáꞌ tu Cristu ni maca nuu dxi uyáꞌ guidxilayú.
Cucaa ndi lú tu,
cani zeda niisi ruꞌ purti ma gudixhe dxí tu binidxabaꞌ.
Ni ma bicaa lú tu,
xiiñe huiine caꞌ,
bicaa ni purti ma runibiáꞌ tu Dios.
14 Ni ma bicaa lu cani ma huaniisi la?
bicaa ni purti ma runibiáꞌ tu Cristu ni maca nuu dxi uyáꞌ guidxilayú.
Ne ni bicaa lu cani zeda niisi ru la?
bicaa ni purti ma zuhuaa dxiichi tu ne ma napa tu stiidxa Dios ndaani ladxidóꞌ to ne ma gudixhe dxí tu binidxabaꞌ.
15 Cadi ganaxhii tu guidxilayú nin ni nuu ndaaniꞌ.
Ni nadxii guidxilayú la?
cadi nadxii Dios.
16 Ndaani guidxilayú riꞌ riulaꞌdxi binni guni ni na ique ne gapa irá ni guꞌyaꞌ,
ne gaca tuuxa nezalú ca xcaadxi.
Peru cadi de Dios zeeda irá nga,
sínuque de binni guidxilayú.
17 Canitilú guidxilayú ne irá ni nuu ndaani ni que,
peru qué ziuu dxi initilú ni guni ni na Dios.
Ni dxandí ne enda rusiguii
18 Xiiñe huiine caꞌ,
ma cadxiña dxi iluxe guidxilayú.
Ma huayuna diaga tu ziasa tobi ucaa lú Cristu,
ne de ca yanna ma nuu stale cayuni casi chi guni ngue.
Nga runi nanna nu ma cadxiña dxi que.
19 Uyuu cabe lade nu peru cadi de laanu laacabe.
Purti pa ñaca de laanu laacabe la?
ñaana né cabe laanu.
Biree cabe ti ihuinni cadi irá ni nuu né laanu de laanu laa.
20 Peru laatu,
ma bidii Cristu Espíritu Santu laatu ne irá tu riene tu xii nga dxandíꞌ.
21 Cadi cucaa ndi lú tu purti qué ganna tu ni dxandíꞌ,
sínuque purti nanna tu ni,
nga runi cucaa ni lú tu.
Ne ma nanna tu,
ni zinanda ni dxandí la?
qué rusiguii.
22 Tuu nga rusiguii pue.
Ni na cadi dxandí Jesús nga ni nexhe gueeda que.
Ni iníꞌ zacá la?
nga nga ni cucaa lú Cristu ca,
purti qué na guni cre laabe,
nin Bixhoze be.
23 Ni qué runi cre Xiiñi Dios la?
laca qué runi cre Dios.
Peru ni nuu né Xiiñi be tobi si la?
laca ma nuu né laabe tobi si.
24 Cadi ixele tu de ni ma bina diaga tu dede dxi bizulú bini cre tu.
Pa gapa tu ni ndaani ladxidóꞌ to la?
qué zaxele tu de Dios nin de Xiiñiꞌ.
25 Ma bidii stiidxa Jesucristu udii laanu enda nabani ni qué zaluxe.
26 Bicaa nga lú tu purti nuu tu racalaꞌdxi quite laatu.
27 Peru laatu,
ma bidii Jesucristu laatu Espíritu Santu.
Ma cadi caquiiñe tu tu usiidi laatu,
purti irá ni naquiiñe ganna tu,
zusiidi Espíritu que laatu.
Qué zusiguii be laatu sínuque zabi be laatu ni dxandíꞌ.
Laguiaana né Cristu tobi si,
casi cayabi be laatu guni tu.