Ca xiiñi Dios
3
Laguuya si pabiáꞌ nadxii Dios laanu dede rabi laanu xiiñiꞌ.
Ne dxandí xiiñi be laanu.
Qué ganna binni pa xiiñi be laanu ne qué riene ca laanu purti qué runibiáꞌ ca laabe.
2 Hermanu ni nadxiee caꞌ,
ma xiiñi Dios laanu,
peru caꞌru ganna nu ximodo pe chi aca nu dxi gueeda Cristu.
Ni nanna si nu la?
zaca nu casi laa purti zaduꞌya nu ximodo pe laa.
3 Ne irá cani cá lú gueeda be para gaca ca zacá la?
ruyubi cadi uchee casi qué ruchee Jesucristu.
4 Ora cuchee binni la?
cadi cayuni ni gudixhe Dios gacaꞌ,
ne nga nga pecadu.
5 Laatu ma nanna tu beeda uxhá Jesucristu stonda nu,
ne laa gasti donda luguiáꞌ.
6 Nga runi cani nuu né laabe tobi si,
qué ziaana lu ná enda ruchee,
ne ni qué uyubi iree de lu ná ni la?
qué runibiáꞌ laabe ne qué ganna ximodo laabe.
7 Cadi udii tu lugar chuꞌ tu quite laatu,
xiiñe huiine caꞌ.
Ni nabani jneza la?
nga nga ni ma bia ladxidóꞌ casi nayá ladxidóꞌ be.
8 Peru ni nisi canauchee la?
xpinni binidxaba laa,
purti dede bizulú binidxaba nisi cuchee.
Nga runi beeda Xiiñi Dios,
beda uchiá xhiiña binidxabaꞌ.
9 Ca xiiñi Dios la?
zuyubi cadi uchee purti ma za ca de Dios.
Ma qué ziulaꞌdxi ca uchee caꞌ,
purti ma xiiñi Dios laacaꞌ.
10 Sicarí nga rihuinni uná xiiñi Dios ne uná xiiñi binidxabaꞌ:
tutiica qué guni jneza ne cadi nadxii stobi la?
cadi xiiñi Dios laa.
Ganaxhii saa nu
11 Nga nga ni bina diaga tu dede dxi bizulú bini cre tu:
naquiiñe ganaxhii saa nu.
12 Cadi gaca nu casi Caín,
purti laa xpinni binidxaba laa.
Biiti biꞌchi purti si biꞌchi biꞌni jneza ne laa coꞌ.
13 Hermanu stinne caꞌ,
cadi idxagayaa tu pa gaca nanalaꞌdxi binni laatu.
14 Laanu ma biréꞌ nu lu ná enda guti,
ma napa nu enda nabani ni qué zaluxe.
Rihuinni ni purti nadxii nu binni.
Ni cadi nadxii binni la?
nuu ru lu ná enda guti.
15 Ni nanalaꞌdxi stobi la?
zeda aca casi cani ruuti binni.
Ne nanna tu qué gapa cani ruuti binni enda nabani ni qué zaluxe.
16 Biluíꞌ Jesucristu laanu xi pe nga enda ranaxhii ra guti pur laanu.
Ne laanu laca naquiiñe quixhe nu xpida nu pur stobi.
17 Pa nuu tuuxa napa ni caquiiñe ne guꞌya qué gapa stobi gastiꞌ,
ne qué guiá laabe la?
ximodo na nadxii Dios.
18 Xiiñe huiine caꞌ,
cadi gabi si nu nadxii nu binni sínuque ganaxhii nu laaca de idubi ladxidóꞌ no ne usihuinni nu ni ra acané nu laacaꞌ.
Ximodo rihuinni uná nga xpinni Dios
19 Zacá zanda ganna nu dxandí xpinni Dios laanu ne zanda chuꞌ dxí ladxidóꞌ no nezalú.
20 Ne pa nuu nu xizaa purti cayabi ladxidóꞌ no laanu cadi jneza cayuni nu la?
guietenalaꞌdxi nu,
jma nandxóꞌ Dios que laani ne laa nanna irá ni nuu ndaani ni.
21 Peru hermanu caꞌ,
pa cayabi ladxidóꞌ no laanu cayuni nu ni na Dios la?
zanda idxiña nu laa sin idxibi nu,
22 ne intiica inaba nu laabe zudii be laanu purti cuzuꞌba nu stiidxa be ne cuyubi nu guni nu ni riulaꞌdxi be.
23 Ne ndi nga ni gudxi be laanu guni nu:
guni cre nu Jesucristu Xiiñi be,
ne ganaxhii saa nu casi gudxi laanu guni nu.
24 Cani guni ni na be ca,
nuu né laabe tobi si ne laabe nuu né be laa.
Nanna nu nuu né be laanu purti bidii be Espíritu stibe laanu.