Ra yeguyoo binidxabaꞌ
20
Udiꞌdi si irá nga biiya zeda yete ti ángel de ibáꞌ,
naaze llave sti dxa bizé roꞌ que ne ti cadena roꞌ.
2 Unaaze be dragón,
dxa beenda yooxho ni rabi cabe binidxaba que,
bindiibi be laa ti mil iza.
3 Bisaba be laa ndaani dxa bizé que.
Raqué biseguyoo be laa.
Biseegu dxiichi be ruaa ni ti ma cadi usiguii binni.
Izaa si ti mil iza,
óraque ma undaa cabe laa caadxi.
4 De raqué biiya caadxi trono zuba cani ma gudixhe Dios cuꞌ biaꞌ stonda binni.
Laca biiya xhialma cani bigá cabe yanni purti canayuíꞌ xpinni Jesús laa,
ne canayuíꞌ stiidxa Dios,
ne qué nuzuxibi ca xa ñee dxa mani ngola que ne xpidóꞌ,
ne qué nudii ca lugar nicá seña stime lucuá caꞌ nin lu ná caꞌ.
Biiya bibani cabe ne bini mandar né cabe Cristu ti mil iza.
5 Nga nga primé ra bibani gueꞌtuꞌ.
Peru ca xcaadxi gueꞌtu la?
que nibani di caꞌ dede ora ma udiꞌdi mil iza que.
6 Dichoso cani ibani primé que.
Ma bia ladxidóꞌ caꞌ.
Ma qué zanda guniná rairopa enda guti laacabe,
sínuque zaca cabe sacerdote para guni cabe xhiiña Dios ne xhiiña Cristu,
ne zuni mandar né cabe laa ti mil iza.
7 Tidi si ti mil iza que zundaa cabe binidxaba de ra yeguyoo.
8 Zacá zusiguii binni idubi naca guidxilayú.
Zusiguii Gog ne Magog ne zuni laacabe tobi si para ucaa lú né cabe laa.
Nabé stale cabe,
casi yuxi sti nisadóꞌ.
9 Ne biiya zeda guiꞌba cabe biaꞌ xilaga guidxilayú,
uluu cabe leꞌ ra nuu ca xpinni Dios ne dxa guidxi nadxii Dios que.
Peru biseenda Dios gui de ibáꞌ binidé laacabe.
10 Ne ulá dxa binidxaba bisiguii laacabe que lu gui ne azufre ra ma nuu dxa mani ngola que ne ni byuíꞌ stiidxaꞌ.
Qué ziuu dxi iree ca raqué,
ne zacaná ca ridxí ne huaxhinni.
Ra cuidxi Dios cuenta binni
11 De raqué biiya ti trono roꞌ naquichi bé,
ne biiya zuba Dios lú ni.
Bixele guidxilayú ne ibáꞌ de ra nuu be,
ne ma gasti lugar ra ñaana caꞌ.
12 Biiya zuhuaa cani ma guti nezalú Dios,
cani risaca ne cani qué risaca.
Ne bixele caadxi libru,
ne laca bixele libru de enda nabani.
Ne guridxi be cuenta cani ma guti,
casi cá lu libru que ni biꞌni caꞌ.
13 Biree ca gueꞌtu ni nuu ndaani nisadóꞌ ne biree irá gueꞌtu ni nuu ra riaana cani cabeza cuidxi Dios cuenta laa.
Ne bidxiiba Dios donda ique irá cabe,
cada tobi ne ni biꞌniꞌ.
14 Oraque ulá enda guti ne jlugar lu gui que.
Nga nga rairopa enda guti.
15 Raqueca ulá cani cadi cá lá lu libru de enda nabani que.