19
Udiꞌdi si irá nga,
bina diaꞌga cacá ridxi ibáꞌ,
casi ora cucaa stale binni ridxi,
na caꞌ:
¡Aleluya!
Usisaca nu Dios stinu purti nandxóꞌ ne bilá laanu.
2 Jneza ribidxi be cuenta binni
purti ma bisaba ná be dxa gunaa dxaba ni bicaa enda nadxaba sti binni guidxilayú.
Biquixe be laa saca biiti ca xpinni be.
3 Bigueta na caꞌ:
―Usisaca nu Dios.
Qué ziuu dxi gyuíꞌ guidxi que.
4 Oraque bizuxibi idubi veinticuatro binni gola ne ca bultu nabani que,
bisisaca ca Dios ra zuba lu trono,
na caꞌ:
―¡Amén!
¡Usisaca nu Dios!
5 Ne ucuá ti ridxi de lu trono que,
na:
Lausisaca Dios stinu,
irá tu,
cani runi xhiiña be,
ne irá ni ridxibi laabe,
cani risaca ne cani qué risaca.
Ra ichaganá Dendxu huiniꞌ
6 Laca bina diaꞌga ti ridxi casi ora rucaa ridxi stale binni,
ne casi ora rixidxi ra zidiꞌdi stale nisa ne casi rixidxi rayu roꞌ,
na:
Usisaca nu Señor Dios stinu ni jma nandxóꞌ,
purti ma bizulú cayuni mandar.
7 Guieche nu dede idxá ladxidóꞌ no de enda nayecheꞌ,
ne usisaca nu laabe,
purti ma bidxiña dxi ichaganá Dendxu huiini que,
ma zuchaahui ni chi chaganáꞌ.
8 Nacu lari chaꞌhuiꞌ,
nayá ne ruzaaniꞌ.
Laa zanda gacu ni purti zeda gaca lari que casi enda nachaꞌhui ni biꞌni ca xpinni Dios.
9 Oraque na ángel que rabi naa:
―Bicaa ni chi tidxe lii riꞌ:
Dichoso cani ma nexhe che enda xheela sti Dendxu huiiniꞌ.
Ne laca rabi be naa:
―Dios uníꞌ ca diidxa ca,
ne dxandí cani.
10 Bizuxiꞌbe xa ñee ángel que,
nusisaca laa,
peru óraque na:
―Cadi guꞌnu nga.
Naa laca rune xhiiña Dios casi ruꞌnuꞌ,
lii ne ca xcaadxi hermanu stiuꞌ ni qué riree chu lu stiidxa Jesús.
Bisisaca Dios.
Stiidxa Jesús ruiꞌ cani rabi Dios laa xi iníꞌ.
Ni dxiꞌba caballu quichiꞌ
11 Oraque biiya zuxele ibáꞌ ne biree ti caballu quichiꞌ.
Nuu tobi runi jneza peꞌ ne riníꞌ irá ni dxandíꞌ,
ne laa dxiꞌba laame.
Jneza rucaa lú be ne jneza ribidxi be cuenta.
12 Ruzaani guielú be casi bele,
ne nuu jma laꞌpa ique be.
Né be ti lá iruti ru ganna sínuque laasi be.
13 Nadxéꞌ daata xhaba be de rini,
ne lá be Stiidxa Dios.
14 Nanda ejércitu ni nuu ibáꞌ laabe,
dxiꞌba ca mani quichi ne nacu ca lari chaꞌhuiꞌ,
naquichi bé ne nayá guieꞌ.
15 Nasa ruaa be ti espada naduxhu iropa ladu ni quixhe dxí né be ca guidxi ni ucaa lú laabe,
ne zuni mandar be laacaꞌ,
ne zaca be naduxhu ne laacaꞌ.
Zuniná be laaca casi rutu ñee cabe uvas ra usaba be xiana sti Dios ni nandxóꞌ luguiá caꞌ.
16 Cá caadxi diidxa lu xhaba be ne lu coꞌre be,
na:
“Xaíque sti irá rey ne irá ni runi mandar.”
17 Oraque biiya ti ángel zuhuaa lu gubidxa bicaa ridxi irá mani huiini ripapa,
na:
―Latáꞌ,
laidxiña ra endaró xhi roꞌ chi udii Dios.
18 Latáꞌ go to xpeela ca rey ne ca comandante ne irá ni rinaaze guiibaꞌ,
xpeela caballu ne ni dxiꞌba laacaꞌ,
xpeela irá binni,
cani cá yaga ne cani cadi cá yaga,
cani risaca ne cani qué risaca.
19 Ne biiya dxa mani ngola que ne ca rey sti guidxilayú ne ejércitu sticaꞌ.
Bidxiña ca para ucaa lú ca dxa ni dxiꞌba caballu quichi que ne ejércitu stiꞌ.
20 Bigaa dxa mani ngola que,
laa ne ni byuíꞌ stiidxaꞌ ne ni biꞌni milagru nezalú que.
Pur irá milagru que bicuudxi binni para ucuaa seña sti mani que ne bisisaca bidóꞌ stime.
Iropa ca ulá ca lu bele ra cayaꞌqui azufre,
idubi nabani caꞌ.
21 Ne ca xcaadxi que la?
guti né ca espada ni nasa ruaa dxa ni dxiꞌba caballu que,
ne gudó ca mani huiini que xpeela ca dede ra bidxá caꞌ.