Ra riete ziaba Babilonia
18
Udiꞌdi si irá nga,
biiya zeda yete sti ángel de ibáꞌ ni nabé risaca ne dede riaꞌqui biaani ladi be ne biaani ndaani guidxilayú ra biete be.
2 Cucaa be ridxi:
―Ma biaba Babilonia,
ma binitilú guidxi roꞌ que.
Ma uca ni lidxi binidxaba ne ca espíritu stiꞌ ne ca mani huiini ripapa ni ribixhilaꞌdxi binni.
3 Purti bicaa ni enda nadxaba stini binni irá guidxi,
casi ñaca bixhudxi ni laacaꞌ.
Ne casi ñaca uca ni jnadxii cani runi mandar ndaani guidxilayú.
Ne ra udxite ni xpidxichi ni lu enda nadxaba bisirricu ni cani rutoo ndaani guidxilayú.
4 Oraque bina diaꞌga uníꞌ stobi de ibáꞌ,
na:
―Lairee de ndaani guidxi ca,
xpinne caꞌ,
ti qué chuꞌ tu lu enda ruchee stini,
ne qué inaaze enda naná ni gueeda luguiá ni laatu.
5 Purti huachee ni dede nucaa ique enda ruchee stini ibáꞌ,
ne qué huasiaanda Dios irá ni huayuni ni.
6 Laguni laani casi biꞌni ni laatu.
Lauquixe laani chupa tantu ni biꞌni ni laatu.
Lauguéꞌ ni chupa tantu jma naduxhu que ni biguéꞌ ni laatu.
7 Biyubi ni irá ni ucalaꞌdxi ni.
Yanna lausaba ná ni biaꞌ queca.
Na ni:
“Rarí zuba casi reina.
Cadi viuda naa,
ne qué ziuu dxi acanaꞌyaꞌ.”
8 Nga runi ti dxi si ziaba stale plaga luguiá ni.
Ziuu tu gati ziꞌ,
ziuu tu guꞌnaꞌ,
ziuu tu gatiꞌ,
ne ziuu tu icá gui,
purti nandxóꞌ señor Dios ni bidxiiba donda ique ni.
9 Zuuna cani runi mandar ndaani guidxilayú,
cani gupa laani casi jnadxii ne uyuu né ni lu irá enda nadxaba stini ora guꞌya ca ma cá gui ni.
10 Zaxele ca de laani.
Zadxibi ca enda naná stini.
Ne zaná caꞌ:
―Lástima,
Babilonia,
guidxi roꞌ.
Nandxóꞌ loꞌ,
peru tobi ze si binitilú luꞌ.
11 Zaqueca zuuna cani rutoo.
Zuuna né ca guidxi que,
purti ma iruti sí irá sticaꞌ:
12 oro,
plata,
guie ni risaca,
perla,
lari chaꞌhuiꞌ,
seda,
lari moradu ne naxiñáꞌ,
irá clase yaga rindáꞌ naxhi,
irá ni uyáꞌ de marfil,
ne de yaga risaca,
ne de bronce ne de guiibaꞌ ne de mármol,
13 canela ne irá guixi rindáꞌ naxhi,
ne guꞌxhu rindáꞌ naxhi,
ne mirra,
ne nisa rindáꞌ naxhi,
ne vinu,
ne aceite,
harina chaꞌhuiꞌ,
ne trigu.
Ne laca rutoo cabe yuze,
dendxuꞌ,
maniꞌ,
carretón,
ne dede binni.
14 Zabi cabe guidxi que:
―Ma qué gapu irá ni uyuulaꞌdxu que.
Ma qué ziuu dxi ibigueta irá enda risaca ni gupu que.
15 Cani uca ricu ra bitoo irá ni lu guidxi que zaxele de laani.
Zadxibi ca enda naná stini.
Zuuna né ca ni ne ziá ca ni,
16 ne zaná caꞌ:
―Lástima guidxo roꞌ que.
Zeda gaca ni casi ti gunaa nacu lari chaꞌhuiꞌ,
moradu ne naxiñáꞌ ne naze oro ne guie ni risaca ne perla,
17 ne tobi ze si binitilú irá enda risaca que.
Irá ni runi dxiiña lu barcu ne ca xaíque sticaꞌ,
ne cani ze lú ni ne irá ni runi dxiiña lu nisadóꞌ,
cayuuya ca ni de zitu.
18 Ne ora biꞌya ca caree guꞌxhu ra cacá gui ni la?
bicaa ca ridxi:
―Gasti ru sti guidxi casi guidxi roꞌ riꞌ.
19 Bichá ca yu ique caꞌ,
biina ca ne bicaa ca ridxi:
―Lástima guidxi roꞌ ca.
Bisirricu ni irá ni napa barcu ne xpidxichi ni,
ne tobi ze si binitilú ni.
20 Peru laguieche né ni bizaaca ni ca,
laatu cani nuu ibáꞌ,
ne ca apóstol,
ne cani ruiꞌ stiidxa Dios,
ne irá ca xpinni.
Purti ra bisaba ná Dios ni,
biquixe laani ni biꞌni ni laatu.
21 Oraque uluu ná ti ángel nandxóꞌ ti guie casi guie sti molinu,
bindaa ndaani nisadóꞌ,
ne na:
―Zacaca zalá Babilonia,
guidxi roꞌ que,
ne qué zahuinni ru ni.
22 Qué ziuu ru dxi uxhidxi cabe arpa lu calle stiuꞌ,
nin flauta nin trompeta,
ne iruti qué lica zuni dxiiñaꞌ,
nin molineru nin iruti ruꞌ.
23 Qué zahuinni biaani ra nuu luꞌ,
ne qué zaca enda xheelaꞌ.
Ziaana dxí irá ni,
neca jma gutaná ca xpinni lu para utoo para irá binni ndaani guidxilayú,
ne udxite lu ique irá binni ne brujería stiuꞌ.
24 Ndaani guidxi ca bixii rini sti cani byuíꞌ stiidxa Dios ne ca xpinni be,
ne rini sti irá cani biiti binni.