Ra guiaba ná gunaa dxabaꞌ
17
Oraque bidxiña tobi de ca ángel ni naaze ca copa que,
ne na rabi naa:
―Gudáꞌ ulué lii modo chi guiaba ná gunaa dxaba ni zuba lu nisadóꞌ.
2 Uyuu né cani runi mandar ndaani guidxilayú laabe ne bicaa be enda nadxaba stibe irá binni,
casi ñaca nuxhudxi be laacaꞌ.
3 Lu irá ni culuíꞌ Espíritu Santu naa,
casi ñaca yené ti ángel naa ndaani guiꞌxhiꞌ.
Raqué biiya ti gunaa dxiꞌba ti mani ngola xiñáꞌ.
Cá jma diidxa ladi mani que ni riguu dí Dios,
ne napa me gadxe ique me ne chii xcachu me.
4 Nacu gunaa que lari xiñá ne moradu,
ne naze oro ne guie ni risaca ne perla.
Naaze be ti copa de oro ne casi ñaca ndaani ni dxá irá enda nayuudxu ni biꞌni be,
casi ra biuu né be ni cadi xheela be.
5 Cá ti lá lucuá be,
iruti qué riene chaahuiꞌ.
Ndi nga laani:
“Babilonia,
guidxi roꞌ que,
jñaa irá gunaa dxaba ne irá ni runi enda nadxaba idubi guidxilayú.”
6 Oraque biiya naxudxi be.
Bixhudxi rini sti ca xpinni Dios ne sti cani guti ra canayuíꞌ stiidxa Jesús laabe.
Nabé bidxagayaa ora biiya laabe.
7 Oraque na ángel que rabi naa:
―Xiñee cadxagayaa luꞌ.
Nagana guiene binni ni biꞌyu ca,
peru zabe lii xi riníꞌ irá ni,
casi mani napa gadxe ique ne chii cachu ca ne gunaa ni dxiꞌba laame.
8 Mani ngola ni biꞌyu ca la?
uyuu me chiqué peru yanna ma coꞌ.
Zaree me ndaani dxa bizé que ante initilú chaahui me.
Dede dxi caꞌru cha guidxilayú maca ucuá lá binni ni gapa enda nabani ni qué zaluxe.
Ne zadxagayaa cani cadi cá lá lu guiꞌchi que ora guꞌya mani ngola ca,
purti uyuu me chiqué ne yanna ma coꞌ peru zahuinni me sti tiru.
9 Rarí riquiiñe enda biaaniꞌ.
Gadxe ique ca la?
riníꞌ gadxe dani ra ribí gunaa ca.
10 Ne laca riníꞌ cani gadxe rey.
Gaayu de laaca ma biasa ne zuba tobi yanna.
Gueeda ru stobi,
ne ora gueeda ngue qué zandaa diꞌ.
11 Mani ngola ni uyuu chiqué ne yanna ma coꞌ ca la?
nga nga ra izaa xhono rey neca naca me tobi de gadxe que.
De raqué ma initilú pe me.
12 Chii cachu ni biꞌyu ca la?
nga chii rey ni caꞌru cuiꞌ.
Peru zabí ca de rey caadxi laga zuba mani ca.
13 Ne ziuu ca tobi si,
zudii ca guni mandar mani ca jlugar caꞌ.
14 Zucaa lú ca Dendxu huiini que peru zaguixhe dxí laacaꞌ,
purti laa nga Xaíque sti irá rey ne irá ni runi mandar.
Ne cani nuu né laabe la?
guridxi Dios laaca ne ulí laaca para aca ca xpinni be ne qué zusaana ca laabe.
15 Ne laca na ángel que rabi naa:
―Nisadóꞌ ni biꞌyu zuba gunaa dxaba que lú la?
riníꞌ ni guidxi ne binni ni riníꞌ adxé adxé idioma.
16 Ne zaca nanalaꞌdxi chii cachu ni napa mani que dxa gunaa dxaba que,
ne zusaana ca laabe xie ladi be sin gastiꞌ.
Zo ca xpeela be ne zuzaaqui ca laabe.
17 Biꞌni cabe ni biluiꞌlaꞌdxi cabe ra uyuu cabe tobi si,
ne bidii cabe guni mandar mani ngola que,
peru uluu Dios ni ndaani ladxidóꞌ cabe para gaca ni ma gudixhe gacaꞌ.
18 Ne gunaa ni biꞌyu ca la?
zeda aca ti guidxi roꞌ.
Laani runi mandar ni irá rey ni nuu ndaani guidxilayú.