Ra bindaate cabe copa ra dxá xiana sti Dios
16
Bina diaꞌga ucuá ti ridxi ndaani yuꞌdu roꞌ,
na rabi gadxe ángel que:
―Lachiundaate gadxe copa ra dxá xiana sti Dios ca ndaani guidxilayú.
2 Para biree ti ángel,
yeundaate copa sti lu guidxilayú,
ne biree guiꞌdxu yuudxu nabé riuuba ladi irá binni napa seña sti mani que ne rusisaca bidóꞌ stime.
3 Oraque bindaate rairopa ángel que copa sti lu nisadóꞌ,
ne uca ni rini casi rini sti gueꞌtuꞌ.
Ne guti irá ni nuu ndaani nisadóꞌ.
4 Raguionna ángel que bindaate copa sti luguiá irá guiigu ne irá ra candani nisa,
ne uca cani rini.
5 Ne bina diaꞌga na ángel sti nisa:
―Jneza biꞌni lu ra bisaba ná lu ca binni riꞌ,
Señor Dios,
tobi lucha ni nachaꞌhuiꞌ.
Qué huayuu dxi guiaadxa luꞌ,
ne nuu luꞌ.
6 Purti bixhii cabe rini sti ca xpinni Dios ne cani byuíꞌ stiidxa luꞌ.
Yanna ma biquixe lu ni laacabe,
biguéꞌ lu laacabe rini.
Nga biyubi cabe.
7 Laca bina diaꞌga na tuuxa de lu altar:
―Dxandíꞌ,
Señor Dios ni jma nandxóꞌ,
jneza guridxi lu cuenta ca binni que.
8 Raidapa ángel que bindaate copa sti lu gubidxa ne dede biree bele lu gubidxa bizaaqui binni.
9 Nabé bidxuíꞌ ladi irá binni,
peru nin ne zaqué qué ninaba ca perdón Dios,
ne qué nusisaca ca laa,
lágala uluu dí ca laa xiñee biseenda ca plaga que.
10 Ra izaa gaayu ángel que bindaate copa sti lu trono sti dxa mani que,
ne bicahui doꞌ ra runi mandar me,
ne biduyuuba laacabe dede gudó yaa cabe ludxi cabe.
11 Peru nin ne zaqué qué ninaba cabe perdón Dios para nusaana cabe irá ni cayuni cabe,
lágala uluu dí cabe Dios ni nuu ibáꞌ purti cayuuba ladi cabe rabiree guiꞌdxuꞌ.
12 Ra izaa xhoopa ángel que bindaate copa sti lu guiigu Eufrates ne bibidxi nisa stini para tidi ca rey ni zeeda de neza rindani gubidxa.
13 Oraque biiya biree chonna espíritu dxaba casi bidxi ñee gaa ndaani ruaa dragón ne ndaani ruaa dxa mani que,
ne ndaani ruaa ni na profeta laa peru cadi dxandí ni.
14 Espíritu sti binidxaba laacaꞌ,
ne gunda biꞌni ca milagru.
Yeutopa ca irá ni runi mandar ndaani guidxilayú para aca ca tobi si ucaa lú ca Dios ni jma nandxóꞌ dxi uzulú cuidxi cuenta binni.
15 Na Señor:
―Laguuyaꞌ,
zenda casi reeda gubaanaꞌ.
Dichoso ni nexhená ne nacu lari ora guendaꞌ,
ti cadi guꞌya binni laa xie ladi ne ituí lú.
16 Ne bichiña ca cani runi mandar que ti lugar rabi cabe Armagedón,
diidxa hebreu.
17 Ra izaa gadxe ángel que bindaate copa sti lu bi,
ne ucuá ti ridxi de lu trono ni nuu ndaani yuꞌdu roꞌ ibáꞌ,
na ni:
―Ma biluxe irá ni.
18 Oraque uyuu xpiaani rayu ne uca ruidu ne uxidxi rayu ne uca ti xu roꞌ,
jma naroꞌba que ni huayaca dede dxi nuu binni guidxilayú.
19 Uca guidxi roꞌ que chonna ndaa,
ne bixá irá guidxi ndaani guidxilayú.
Ne bietenalaꞌdxi Dios pabiáꞌ bichee ca binni Babilonia ne bisaba ná laacabe.
20 Binitilú irá isla ne irá dani.
21 Biaba granizu roꞌ luguiá binni.
Nanaa ni biaꞌ cuarenta kilu.
Ne uluu dí cabe Dios xiñee biseenda plaga roꞌ que luguiá cabe.