Ra ma chi iluxe enda naná
15
Biiya sti seña naroꞌba ibáꞌ dede bidxagayaa.
Biiya gadxe ángel naaze gadxe plaga,
ma ra iluxe enda naná,
purti ma ne nga tidi xiana sti Dios.
2 Ne laca biiya xiixa ruluí espeju nucha gui,
ti lapa si nexhe ni casi raꞌta nisadóꞌ.
Ne uriá ni zuhuaa cani qué nusisaca dxa mani ngola que ne bidóꞌ stiꞌ,
ne qué nicaa seña stime.
Naaze cabe arpa ni bidii Dios laacabe.
3 Cayuunda cabe cantu biꞌnda Moisés ni biꞌni xhiiña Dios que,
ne sti Dendxu huiini que.
Na ni:
Naroꞌba ne de enda ridxagayaa irá ni runi luꞌ,
Señor Dios ni jma nandxóꞌ.
Jneza ne sicarú irá ni riguixhe luꞌ,
lii ni runi mandar irá guidxi.
4 Tuu nga qué idxibi lii ne usisaca lii yaꞌ,
Señor,
purti iruti ru casi lii.
Ne zeda uzuxibi irá binni xa ñee luꞌ
purti ma bihuinni jneza ni runi luꞌ.
5 Oraque biya dxie ne biiya zuxele yuꞌdu roꞌ sti Dios ni nuu ibáꞌ,
lugar ni jma nandxóꞌ.
6 Ne biree gadxe ángel naaze plaga que ndaani ni,
nacu lari quichiꞌ,
nayá guieꞌ dede ruzaaniꞌ,
ne xiꞌ cinturón de oro xpechu cabe.
7 Bidii ti bultu nabani que cada tobi de laacabe ti copa de oro.
Dxá ca copa que de xiana sti Dios ni qué ziuu dxi gatiꞌ.
8 Ne bichá enda risaca ne enda nandxóꞌ sti Dios yuꞌdu que de guꞌxhuꞌ.
Ne iruti ñanda ñuu dede ora ma birá idubi gadxe plaga ni né ca ángel que.