Ra biꞌnda 144,000 binni
14
Oraque biya dxie ne biiya zuhuaa Dendxu huiini que lu dani Sion.
Zuhuaa né ti gayuaa cuarenta y cuatro mil binni laabe,
ni cá lá be ne lá Bixhoze be lucuá.
2 Ne bina diaꞌga ti ruidu casi ora rixidxi stale nisa ne casi ora rixidxilaa rayu ne casi ora cuxhidxi stale binni arpa.
3 Cayuunda cabe ti cantu cubi nezalú trono ne nezalú idapa bultu ne ca binni gola que.
Iruti ru ñanda niziidi cantu que,
sínuque ti gayuaa cuarenta y cuatro mil que si ni bilá lade irá binni guidxilayú.
4 Ca ngue nga cani qué ñuni dxaba laa luguiá gunaa,
sínuque bibani ca jneza,
ne canananda ca Dendxu huiini que ladu tiica cheꞌ.
Bilá cabe lade irá binni,
casi ñaca nirudóꞌ laacabe guꞌde cabe Dios ne Dendxu huiini que.
5 Qué ñuu dxi nusiguii cabe.
Nayá ladxidóꞌ cabe ra zuhuaa cabe nezalú trono sti Dios.
Ra bicaa chonna ángel ridxi
6 Oraque biiya sti ángel zipapa galahui ibáꞌ,
zigüí né binni stiidxa Cristu ni qué ziuu dxi initilú.
Zigüí né be ni binni de irá ladu,
de irá guidxi,
ni riníꞌ adxé adxé idioma.
7 Bicaa be ridxi,
rabi be laacaꞌ:
―Laidxibi Dios ne lausisaca laa,
purti ma bidxiña dxi cuidxi cuenta binni.
Lausisaca ni bizáꞌ ibáꞌ ne guidxilayú ne nisadóꞌ ne ra rindani nisa.
8 Nanda sti ángel laabe,
na:
―Ma binitilú Babilonia,
guidxi roꞌ que,
purti bicaa ni enda nadxaba stini xcaadxi guidxi,
casi ñaca nuxhudxi ni laacaꞌ.
9 De raqué nanda sti ángel,
zeda ucaa ridxi:
―Gapa gá si cani usisaca mani que ne bidóꞌ stiꞌ,
ne udii lugar icá seña que lu ná o lucuá.
10 Purti ma nexhe xi chi aca cabe,
qué zaguꞌba ná Dios ra usaba ná laacabe.
Ziuu cabe lade bele ra cayaꞌqui azufre nezalú ca ángel sti Dios ne Dendxu huiini que.
11 Ne qué ziuu dxi gyuíꞌ gui ra cayacaná cabe que.
Qué lica zaziilaꞌdxi cani rusisaca mani que ne bidóꞌ stiꞌ o ricaa seña stiꞌ,
nin ridxí nin huaxhinni.
12 Rarí nga riquiiñe cadi ixhacalaꞌdxi ca xpinni Dios ni runi ni na ne qué rixele de Jesús.
13 Oraque bina diaꞌga uníꞌ né tuuxa naa de ibáꞌ rabi naa:
―Bicaa ni chi tidxe lii riꞌ:
“Dede yanadxí dichoso cani gati nuu né Señor tobi si.”
Dxandí ca diidxa ca,
na Espíritu Santu,
purti zaziilaꞌdxi cabe de irá dxiiña biꞌni cabe.
Ma gunda dxi
14 Oraque biya dxie ne biiya ti za quichiꞌ,
ne zuba tobi lu za que ruluíꞌ Hombre Biseenda Dios.
Nuu ti laꞌpa de oro ique ne naaze ti gandxu naduxhuꞌ.
15 Biree sti ángel ndaani yuꞌdu roꞌ ni nuu ibáꞌ,
bicaa ridxi ni zuba lu za que,
na:
―Uluu gandxu stiuꞌ,
bichiña cani ma nuu para idxiña,
purti ma gunda dxi idopa caꞌ casi semiá ora ma nuu para iruuguꞌ.
16 Para uluu ni zuba lu za que gandxu stiꞌ,
bitopa ca xpinni Dios ni nuu ndaani guidxilayú.
17 Oraque biree sti ángel ndaani yuꞌdu roꞌ que,
laca naaze ti gandxu duxhuꞌ.
18 Ne biree sti ángel ra nuu altar ni rapa gui ni nexhe lu altar que.
Bicaa be ridxi ángel ni naaze gandxu que,
rabi be laa:
―Uluu gandxu stiuꞌ bichuugu ca beꞌza uvas ni nuu ndaani guidxilayú,
purti ma güi cani.
19 Para uluu ángel que gandxu stiꞌ,
bitopa cani ne bichá cani ndaani pila para ixii cani.
Zacá nga usaba ná Dios cani qué ñuni cre laa.
20 Ulee cabe ca uvas que de ndaani guidxi,
yeguutu ñee cabe cani.
Biree ziaꞌ rini ndaani pila que dede bigaanda ni ndaani yanni caballu.
Guꞌta ni biaꞌ chonna gayuaa kilómetru idubi uriá pila que.