Ra biree chupa mani ngola
13
Bizuhuaa uriá nisadóꞌ ne biiya biree ti mani ngola ndaani nisa,
napa gadxe ique ne chii cachu.
Nuu ti laꞌpa cada xcachu ne cá ti diidxa lu cada ique me ni riguu dí Dios.
2 Sicarí nga mani ni biiya que:
ruluíꞌ me beedxeꞌ,
ne casi ñee oso ñee me,
ne casi ruaa lion ruaa me.
Bicuí dragón que laame guni mandar me jlugar,
ne bidii laame enda nandxóꞌ stiꞌ.
3 Biiya ucaná ti ique me dede ruluíꞌ ñati me,
peru bianda ni,
ne nabé bidxagayaa binni ne yenanda laame.
4 Bisisaca ca dragón que purti bicuí laame guni mandar me ne laca bisisaca ca laame,
na caꞌ:
―Iruti ru casi mani riꞌ,
ne iruti zanda ucaa lú laame.
5 Gucuaa me lugar uníꞌ me stale diidxa guidxa ne uluu dí me Dios,
ne bini mandar me cuarenta y dos beeu.
6 Zacá biꞌni me,
uníꞌ me Dios,
uluu dí me laa ne yuꞌdu stiꞌ ne irá ni nuu ibáꞌ.
7 Laca bidii Dios lugar ucaa lú me ca xpinni dede quixhe dxí me laacaꞌ,
ne zaqueca guni mandar me irá guidxi,
irá ladu,
irá binni riníꞌ adxé adxé idioma.
8 Ne bisisaca irá binni ni nuu guidxilayú laame,
cani cadi cá lá lu guiꞌchi sti Dendxu huiini ni guti que.
Dede dxi caꞌru cha guidxilayú ucuá lá cani chi caa enda nabani ni qué zaluxe lu guiꞌchi que.
9 Ni racalaꞌdxi guiene la?
ucaa diaga.
10 Ni useguyoo binni la?
laca zieguyoo,
ne ni guuti né espada la?
laca né espada zati.
Rarí nga naquiiñe cadi ixhacalaꞌdxi ca xpinni Dios ne cadi usaana ca de guni cre caꞌ.
11 Oraque biiya biree sti mani ngola ndaani yu,
napa chupa cachu casi xcachu dendxuꞌ,
peru rucaa ridxi casi dragón.
12 Ucuaa me irá enda runi mandar sti dxa mani ucaná ique dede bilá ñati que,
ne bini mandar me nezalú.
Ne biꞌni me para bizuxibi irá binni nuu ndaani guidxilayú xa ñee ni bianda ique que.
13 Laca gunda biꞌni me stale ni bidxagayaa binni dede bisaba me gui de ibáꞌ ndaani guidxilayú.
14 Zacá udxite me binni,
ne irá ni ucuaa me lugar guni me nezalú dxa mani ucaná ne espada peru qué ñati que.
Ne bicaa me irá binni uzáꞌ ti bidóꞌ chura mani que.
15 Ne laca bidii Dios lugar bisibani me bidóꞌ que ti ganda iníꞌ,
ne guuti irá ni qué na usisaca laa.
16 Ne na me ucaa irá binni ti seña lu ná ladu derechu o lucuá ― cani risaca ne cani qué risaca,
ricu ne pobre,
ni cá yaga ne ni cadi cá yaga.
17 Iruti qué ñanda nutoo nin nizíꞌ pa qué gapa seña que,
ne nga nga lá mani que o númeru stiꞌ.
18 Rarí nga riquiiñe enda biaaniꞌ.
Tu napa enda biaani la?
cuee númeru sti mani que.
Riníꞌ ni lá ti hombre.
Ne ndi nga númeru que:
xhoopa gayuaa sesenta y seis.