Ra bihuinni ti gunaa ne ti dragón
12
Oraque bihuinni ti seña roꞌ ibáꞌ,
ti gunaa renda gubidxa,
nexhe beeu xa ñee,
ne nuu ti laꞌpa de doce luceru ique.
2 Naca xiiñi be ne cucaa be ridxi,
cayuuba ndaani be,
purti mayaca gale badu huiiniꞌ.
3 Bihuinni ru sti seña ibáꞌ,
ngue ma ti dragón ngola xiñáꞌ,
napa gadxe ique ne cada ique nuu ti laꞌpaꞌ,
ne napa chii cachu.
4 Gudiñe xcola me caadxi luceru,
biaba guidxilayú.
Bizuhuaa me nezalú gunaa que para gabi me xiiñi casi gale.
5 Uxana gunaa que ti badu nguiiu huiini ni nexhe guni mandar,
casi ñaca ne ti guiibaꞌ.
Peru casi gule badu huiini que ucuaa Dios laa yené laa ra nuu trono stiꞌ.
6 Ne bixooñe gunaa que biaazi guiꞌxhiꞌ,
yeguiaana ti lugar ra naguixhe chaahui Dios para guiaapa ti mil chupa gayuaa sesenta dia.
7 Oraque udinde cabe ibáꞌ.
Bicaa lú Miguel,
tobi de ca xaíque sti ca ángel,
ne ca xpinni dxa dragón.
Laca bicaa lú dragón ne ca xpinni.
8 Peru qué ñanda ñuni ganar caꞌ.
Ma qué ñanda ñuu ca ibáꞌ.
9 Ulá me ndaani guidxilayú,
laame ne ca xpinni me.
Laame nga dxa beenda yooxho ni lá diablu ne binidxabaꞌ,
ni rusiguii irá binni que.
10 Oraque bina diaꞌga ucuá ti ridxi de ibáꞌ:
―Ma bidxiña dxi ulá Dios stitu laanu.
Ma chi usihuinni enda nandxóꞌ stiꞌ,
chi guni mandar,
laa ne Cristu stiꞌ.
Purti ma uladxi be ni uluu xqueja ca hermanu stinu,
dxa ni uluu xqueja ca nezalú be ridxí ne huaxhinni que.
11 Gunda gudixhe dxí ca laabe purti guti Dendxu huiini que pur laacaꞌ,
ne purti qué nidxibi ca ñuiꞌ ca xpinni Cristu laacaꞌ,
neca nanna ca zándaca gati caꞌ.
Qué ña ca xpida caꞌ.
12 Laguiecheꞌ,
cani nuu ibáꞌ,
peru lagapa gá si laatu cani nuu ndaani guidxilayú ne ndaani nisadóꞌ,
purti ma biete binidxaba ra nuu tu ne cayó dí laa ti nanna ma huaxiéꞌ dxi napa.
13 Ora biꞌya dragón que ma ulá ndaani guidxilayú,
uzabi nanda jñaa badu huiini que.
14 Peru bidii cabe chupa xhiaa roꞌ casi xhiaa bisiá gunaa que para gunda bipapa ne zacá bilá de lu ná mani que.
Uyé be ndaani guiꞌxhi ra nexhe chaahui guiaapa be chonna iza arondaꞌ.
15 Peru bindaa mani que nisa ndaani ruaa.
Ne uca ni casi guiigu para niné ni laabe.
16 Peru ucané guidxilayú laabe,
güeꞌ nisa que.
17 Jma rusi gudó dí laame óraque,
bidxiichi né me gunaa que.
Para biree me zitinde né me cani za de laabe,
cani ruzuuba stiidxa Dios ne zinanda stiidxa Jesucristu.