Cani chi useenda Dios güi stiidxaꞌ
11
Oraque bidii cabe naa ti gueere casi ti metru ne rabi cabe naa:
―Biasa,
uluu biaꞌ yuꞌdu roꞌ sti Dios ne altar.
Ne bigaba panda cusisaca laabe raqué.
2 Peru cadi cuꞌ biaꞌ lu patiu stini ni nuu fuera,
purti ma bidii Dios ni ca binni cadi judíu,
ne zuutu ñee ca xquidxi Dios chonna iza arondaꞌ.
3 Zuseenda chupa xpinne de lutu chi güi stiidxa ti mil chupa gayuaa sesenta dia.
4 Zeda aca cabe iropa yaga olivo ne iropa candeleru ni zuhuaa nezalú Señor,
xpixuaana guidxilayú.
5 Pa chuꞌ tu gacalaꞌdxi guniná laacabe zaree gui ndaani ruaa cabe zuzaaqui laa.
Zacá zati tutiica ucaa lú laacabe.
6 Nandxóꞌ cabe.
Zanda useegu cabe ibáꞌ ti cadi guiaba nisa guie biáꞌ tica dxi güi cabe stiidxa Dios.
Ne laca zanda guni cabe nisa rini ne guniná cabe guidxilayú biaꞌ tica acalaꞌdxi cabe ne adxé adxé plaga.
7 Peru ora ma biluxe xhiiña cabe zaree ti mani ngola ndaani dxa bizé que,
zucaa lú laacabe ne zaguixhe dxí laacabe dede zuuti laacabe.
8 Ziaana xcuerpu cabe lu calle sti guidxi roꞌ ra ucuá Señor stinu lu cruz.
Zeda aca guidxi que casi Sodoma ne Egipto.
9 Zuuya dxí binni laacabe chonna gubidxa arondaꞌ,
binni de irá guidxi ne de irá idioma,
ne qué zaná ca igaachi cabe.
10 Zieche binni ma guti cabe dede zuni ca saa ne zusigaꞌde saa ca xiixa purti nabé bininá cabe laacaꞌ.
11 Peru tidi si chonna gubidxa aronda que,
zusibani Dios laacabe ne zuzuhuaa cabe ne irá ni guꞌya laacabe zadxibi.
12 Oraque zuna diaga cabe zaníꞌ né tuuxa laacabe de ibáꞌ,
zabi laacabe:
―Laquiꞌba raríꞌ.
Ne zaguiꞌba cabe lade ti za nezalú cani nanalaꞌdxi laacabe.
13 Ne zaca ti xu roꞌ,
zanitilú tindaa de guidxi que ne zati gadxe mil binni.
Nabé zadxibi ca xcaadxi binni que ne zusisaca ca Dios ni nuu ibáꞌ.
14 Racá iluxe rairopa yuubaꞌ,
peru zeeda ru stobi.
Ra izaa gadxe trompeta xhidxi
15 Oraque biiya bixhidxi ra izaa gadxe ángel que trompeta ucuá stale ridxi ibáꞌ,
na:
Ma bidxiña dxi guiaana irá xixé ni runi mandar ladxi ná Dios ne Cristu stiꞌ,
ne qué ziaana dxí de guni mandar.
Señor Dios ni nandxóꞌ,
nuu lu ne qué huayuu dxi guiaadxa lu ne qué ziuu dxi.
Diuxquixe pe lii purti ma biluíꞌ lu enda nandxóꞌ stiuꞌ;
ma bizulú lu guni mandar luꞌ.
18 Bidxiichi binni guidxilayú,
peru ma bidxiña dxi usaba ná lu laacaꞌ ne cuidxu cuenta cani ma guti.
Zaguixe lu cani biꞌni xhiiña luꞌ,
byuíꞌ stiidxa luꞌ,
cani biaana para lii siouꞌ ne bisisaca lii,
cani risaca ne cani qué risaca.
Ne zunitilú lu cani binitilú guidxilayú.
19 Oraque bixele yuꞌdu roꞌ sti Dios ni nuu ibáꞌ,
ne bihuinni lugar ni jma nandxóꞌ.
Uyuu xpiaani rayu,
uxidxi rayu,
uca ruidu,
uca xu ne biaba granizu.