Angel naaze guiꞌchiꞌ
10
Oraque biiya zeda yete sti ángel de ibáꞌ,
nandxóꞌ,
renda ti za ne nuu arcu iris ique.
Ruzaani lú casi gubidxa ne ruluíꞌ bele ñee.
2 Naaze be ti guiꞌchi zuxeleꞌ ne bizuhuaa ñee be ladu derechu lu nisadóꞌ ne ladu biga lu guidxilayú.
3 Bicaa be ridxi casi ora riguu beedxe lion ne uxidxi gadxe rayu,
bicabi laabe.
4 Casi uxidxi rayu que,
ucaladxe nucaa xi na cani,
peru bina diaꞌga uníꞌ tobi de ibáꞌ,
na rabi naa:
―Cadi ucoou,
purti cadi para ganna binni ni.
5 Ne undisa ná dxa ángel ni biiya zuhuaa ñee lu nisadóꞌ ne lu guidxilayú que ibáꞌ,
6 ne bini jurar pur ni qué ziuu dxi gatiꞌ,
ni bizáꞌ ibáꞌ ne irá ni nuu ndaaniꞌ ne guidxilayú ne irá ni nuu ndaaniꞌ,
ne nisadóꞌ ne irá ni nuu ndaaniꞌ,
na:
―Ma qué zandaa ruꞌ,
7 ma chi aca ni gudxi Dios ca profeta acaꞌ,
ucaa si ra izaa gadxe ángel que trompeta.
Oraque zuluíꞌ Dios binni ni qué nihuinni chiqué.
8 Bigueta uníꞌ dxa ni uníꞌ né naa de ibáꞌ que,
na rabi naa:
―Yecaa guiꞌchi zuxele naaze ángel ni zuhuaa ñee lu nisadóꞌ ne lu guidxilayú ca.
9 Oraque uyaa ra nuu ángel que,
gudxe laa udii naa guiꞌchi que,
para na rabi naa:
―Gucuaa,
gudó ni.
Nanaxhi dxiña zaca ni ndaani ruaa luꞌ,
peru ora ma nuu ni ndaani lu zaca ni nandáꞌ.
10 Para ucuaa guiꞌchi naaze ángel que,
gudahuaꞌ.
Ne dxandí nanaxhi dxiña uca ni ndaani ruaaꞌ,
peru biluxe si gudahua ni,
nandá uca ni ndaaneꞌ.
11 Oraque rabi cabe naa:
―Napu xidé güi neu binni diidxa sti tiru,
gaꞌbu laaca xi na Dios chi aca stale guidxi ni riníꞌ adxé adxé idioma,
de ra irá idioma riníꞌ binni,
ne stale de cani runi mandar.