9
Ra bixhidxi ra izaa gaayu ángel que trompeta biiya biree ti luceru de ibáꞌ biaba guidxilayú ne bidii cabe laa llave sti ti bizé roꞌ ni qué gapa ra iluxe.
2 Bixhele ruaa bizé que ne biree guꞌxhu ndaani ni casi ora cayaꞌqui ti zuquii roꞌ.
Bisicahui guꞌxhu que lu gubidxa ne lu bi.
3 Biree jma gusú lade guꞌxhu que,
canapapa ndaani guidxilayú,
ne uca came casi meuxubi ne gunda biquiichi came binni.
4 Ne gudxi cabe laacame cadi guniná came ca guixi gaꞌ ni nuu ndaani guidxilayú nin ca yaga nin gasti ni nagáꞌ,
sínuque ca binni si ni cadi cá sellu sti Dios lucuá.
5 Peru cadi para guuti came laacaꞌ,
sínuque para guniná si came laaca gaayu beeu.
Zuquiichi came laaca casi ruquiichi meuxubi.
6 Zuyubi binni gati ca dxi que,
peru qué zanda.
Ne para laacabe pa ñanda si ñati cabe,
peru zaxele enda guti de laacabe.
7 Zeda aca came casi caballu ni nuu listu para che guerra.
Nuu casi laꞌpa de oro ique came ne casi lú binni lú came.
8 Napa came guicha ique came casi guicha ique gunaa,
ne laya came casi laya lion.
9 Nanda xiixa xpechu came casi guiiba para cadi acaná came ne rixidxi xhiaa came casi rixidxi ra zidiꞌdi stale carretón ziuxooñe ra cayaca guerra.
10 Napa came xcola came casi xcola meuxubi.
Lu punta ni nuu ni guniná né came binni idubi gaayu beeu que.
11 Naca ángel sti bizé que xaíque stícame.
Abadón lá ángel que diidxa hebreu,
ne diidxa griegu la?
Apolión.
Ni riníꞌ ni la?
“Ni runitilú”.
12 Ma udiꞌdi ti yuubaꞌ.
Riaadxa ru xhupa.
13 Ra bixhidxi ra izaa xhoopa ángel que trompeta bina diaꞌga ucuá ti ridxi lade idapa cachu sti altar de oro ni zuhuaa nezalú Dios que.
14 Na ni rabi ni ángel ni bixhidxi trompeta que:
―Bixhedxe idapa ángel ni liibi uriá guiigu Eufrates.
15 Ne bixedxe idapa ángel ni ma nexhe para dxi idxiña hora ne dxi ne beeu ne iza guuti ca caadxi binni,
ne guiaana xhupa tantu de biaꞌ gati que.
16 Bina diaꞌga panda soldadu sticaꞌ,
biaꞌ chupa millón,
dxiꞌba maniꞌ.
17 Sicarí nga modo biiya ca caballu ne cani dxiꞌba laacame.
Nanda guiiba xiñá ne azul,
ne naguchi xpechu cani dxiꞌba laacame que.
Ne ique came zeda aca casi ique lion,
ne caree bele ne guꞌxhu ne azufre ndaani ruaa came.
18 Ne biiti ni biree ndaani ruaa came que caadxi binni.
19 Runiná né came ni riree ndaani ruaa came,
ne laca runiná né came xcola came.
Purti casi beenda xcola came,
napa ique.
20 Ca xcaadxi binni ni qué ñati lu guionna plaga que,
nin ne zacá qué ninaba ca perdón Dios para nusaana ca irá ni runi caꞌ.
Ne qué ñaana dxí ca de nusisaca ca binidxabaꞌ nin bidóꞌ de oro ne de plata ne de bronce ne de guie ne de yaga,
neca qué zanda iníꞌ cani nin guꞌya cani nin sa cani.
21 Nin qué niná ca nusaana ca de ñuuti ca binni nin de ñuni ca brujería nin de ñuu né ca ni cadi xheela caꞌ,
ne nin de nibaꞌna caꞌ.