Ra izaa gadxe sellu iladiꞌ
8
Ora undadi be ra izaa gadxe sellu que,
dxí doꞌ uyuu ibáꞌ biaꞌ galaa ora.
2 Ne biiya gadxe ángel ni ruzuhuaa nezalú Dios,
bidii cabe laaca gadxe trompeta.
3 Oraque beeda sti ángel naaze ti braseru de oro,
bizuhuaa ra nuu altar.
Bidii cabe laa stale guꞌxhu para uguucha ni stiidxa ca xpinni Dios ra uníꞌ né ca laa,
ne quixhe ni lu altar de oro ni nuu nezalú trono que.
4 Udxiꞌba né guꞌxhu que stiidxa ca xpinni Dios dede ra nuu Dios.
5 Oraque ucuaa be braseru que bichá be de gui ni nexhe lu altar que,
bisindaa be ni guidxilayú.
Uca ruidu ne uxidxi rayu ne uyuu xpiaani rayu ne uca xu.
Ra uxidxi trompeta
6 Ne uyuu gadxe ángel ni naaze trompeta que listu para uxhidxi.
7 Ra bixhidxi primé ángel que trompeta biaba granizu ne gui ndaani guidxilayú,
iropa ni nucha ni rini.
Casi ñaca guidxilayú chonna ndaa,
uyaꞌqui tindaa guidxilayú,
yaga ne guixi nagáꞌ ni nuu lú ni.
8 Ra bixhidxi rairopa ángel que trompeta biaba casi ti dani cá gui ndaani nisadóꞌ ne guca tindaa ni rini.
9 Binitilú caadxi mani ni nuu ndaani nisadóꞌ que.
Biaana xhupa de biaꞌ ni guti que qué ninitilú.
Zaqueca uca ca barcu.
10 Ra bixhidxi raguionna ángel que trompeta biaba ti luceru roꞌ de ibáꞌ,
cayaꞌqui casi ti guiri bidxi.
Biaba ni luguiá caadxi guiigu ne ra candani nisa,
peru biaana xhupa tantu de biaꞌ ra biaba ni que.
11 “Ajenjo” lá luceru que,
xiixa ni nandáꞌ casi xculáꞌ.
Bindá nisa biaba ni lú que ne guti stale binni ni güeꞌ ni.
12 Ra bixhidxi raidapa ángel que trompeta ucaná tindaa gubidxa ne tindaa beeu ne caadxi luceru.
Ne biaana tindaa dxi ne tindaa gueela sin biaaniꞌ.
13 Bigueta biya dxie ne bina diaꞌga canapapa ti ángel galahui ibáꞌ,
cucaa ridxi:
―Riaꞌya cani nuu ndaani guidxilayú.
Nagana zaca para laaca ora uxhidxi xhonna ángel ca trompeta.