Cani ibi lade cani za de Israel
7
Udiꞌdi si irá nga la?
biiya tapa ángel zuhuaa idapa ladu guidxilayú,
cucueeza ca bi,
ti cadi lica undubi bi lu guidxilayú,
nin lu nisadóꞌ nin lu yaga.
2 Ne laca biiya zeeda sti ángel de neza rindani gubidxa,
né sellu sti Dios ni nabani.
Bicaa ridxi tapa ángel ni ma ucuaa orde guniná layú ne nisadóꞌ,
3 na rabi laacabe:
―Cadi guniná tu layú nin nisadóꞌ nin ca yaga dede qué ucáꞌ du sellu sti Dios stinu lucuá ca xpinni.
4 Biluxe ucuaa si cabe sellu que,
bina diaꞌga panda tu ucuaa ni,
ti gayuaa cuarenta y cuatro mil lade cani za de Israel:
5 doce mil ni za de Judá,
doce mil ni za de Rubén,
doce mil ni za de Gad,
6 doce mil ni za de Aser,
doce mil ni za de Neftalí,
doce mil ni za de Manasés,
7 doce mil ni za de Simeón,
doce mil ni za de Leví,
doce mil ni za de Isacar,
8 doce mil ni za de Zabulón,
doce mil ni za de José,
ne doce mil ni za de Benjamín.
Ra cusisaca irá xpinni Dios laa
9 Udiꞌdi si irá nga biya dxie ne biiya zuhuaa jma binni nezalú trono ne nezalú Dendxu huiini que,
dede iruti ñanda nugaba laacaꞌ.
Za ca de irá ladu ne de irá guidxi ne irá idioma riníꞌ binni.
Nacu cabe lari quichiꞌ,
ne naaze cabe ziña.
10 Irá cabe cucaa cabe ridxi:
Dios stinu ni zuba lu trono bilá laanu,
laa ne Dendxu huiiniꞌ.
11 Naguu irá ángel leꞌ trono que,
laani ne ca binni gola ne idapa bultu que.
Ne biaba rilú ca nezalú trono que,
bisisaca ca Dios,
12 na caꞌ:
Amén.
Qué chuꞌ dxi guiaana dxí nu de usisaca nu Dios stinu ne udíꞌ nu diuxquixe laa.
Stibe irá enda nandxóꞌ,
irá enda biaaniꞌ,
irá enda risaca ne irá stipa.
13 Oraque na tobi de ca binni gola que rabi naa:
―Tu ca nga nacu lari quichi ca,
ne padé beeda caꞌ.
14 Para rabe laabe:
―Qué ganna diaꞌ,
señor.
Lii nannu tu laacabe.
Para na be rabi be naa:
―Ca nga nga ni udiꞌdi ra jma nagana ne udiibi ca xhaba caꞌ ne bisiquichi né ca ni rini sti Dendxu huiiniꞌ.
15 Nga runi zuhuaa cabe nezalú trono sti Dios,
cusisaca cabe laa ridxí ne huaxhinni ndaani yuꞌdu roꞌ stiꞌ.
Ne zapa ni zuba lu trono ca laacabe.
16 Qué zandaana cabe ne qué zati cabe nisa.
Qué zuzaaqui gubidxa laacabe ne qué zaca nandáꞌ cabe.
17 Purti zapa Dendxu huiini ni zuhuaa nezalú trono que laacabe casi riaapa dendxuꞌ.
Ziné laacabe ra candani nisa rudii enda nabani.
Ne zucuiidxi Dios irá nisa riete lú cabe.