Ra uladi gadxe sellu
6
Biiya ora bixhele Dendxu huiini que primé sellu ne uníꞌ tobi de ca bultu que casi ora rixidxi rayu,
na:
―Gudáꞌ guꞌyuꞌ.
2 Biiya ti mani quichiꞌ,
ne naaze ni dxiꞌba laame que ti bara.
Bidii cabe laa ti laꞌpa ne biree zitixhe dxí cani ucaa lú laa.
3 Ora bixhele be rairopa sellu bina diaꞌga na rairopa bultu que rabi naa:
―Gudáꞌ guꞌyuꞌ.
4 Biree sti mani xiñáꞌ,
ne ucuaa ni dxiꞌba laame que ti espada roꞌ ne orde para guni yaya ndaani guidxilayú ne guni pur guuti saa binni.
5 Ora bixhele be raguionna sellu bina diaꞌga na raguionna bultu que rabi naa:
―Gudáꞌ guꞌyuꞌ.
Biya dxie ne biiya ti mani yaaseꞌ ne naaze ni dxiꞌba laame ti balanza.
6 Ne bina diaꞌga ti ridxi lade ca bultu que na:
―Ti litru arroz zasaca biaꞌ ti dxi dxiiña ne biaꞌ cá ca zasaca chonna litru xubaꞌ.
Peru cadi guni yuudxu tu aceite ne vinu.
7 Ora bixhele be raidapa sellu bina diaꞌga na raidapa bultu que rabi naa:
―Gudáꞌ guꞌyuꞌ.
8 Biya dxie ne biiya ti mani guchi,
dxiꞌba tobi laame lá “Enda guti”.
Ne nanda stobi laa lá “Ra riaana ca gueꞌtuꞌ”.
Ucuaa Enda guti que orde chi guuti binni galaa de galaa guidxilayú.
Nuu tu zati ra cadinde,
nuu tu zati de enda rindaana,
nuu tu zati de enda huará,
ne nuu tu zuuti mani duxhu laa.
9 Ora undadi be ra izaa gaayu sellu que,
biiya xaꞌna altar nexhe xhialma cani biiti binni laa purti qué ñaana dxí ca de ñuiꞌ né ca binni stiidxa Dios.
10 Cucaa ridxi caꞌ:
―Tobi lucha Señor ni qué rusiguii,
padxí udxiiba lu donda ique ca binni nuu ndaani guidxilayú ni biiti laadu,
ne uquixe lu ni laacaꞌ.
11 Para bidii cabe laaca lari quichi gacu caꞌ,
ne gudxi cabe laaca iziilaꞌdxi ca laga si izaa caꞌ,
purti riaadxa gati xcaadxi hermanu ni cayuni ru xhiiña Cristu casi biꞌni caꞌ.
12 Ora undadi be ra izaa xhoopa sellu que biya dxie ne uca ti xu roꞌ.
Biyaase lana gubidxa ne bixiñá rini beeu.
13 Ne biaba ca luceru cá ibáꞌ guidxilayú casi riaba duꞌga riꞌni ora rundubi bi yooxhoꞌ.
14 Ne bidopa ibáꞌ casi ridopa guiꞌchiꞌ,
ne biduuba irá dani ne irá isla de jlugar.
15 Ne irá ni runi mandar ndaani guidxilayú ne irá binni risaca ne irá binni napa ne irá capitán ne irá ca justicia ne irá ni cá yaga ne ni cadi cá yaga,
irá cabe bicachi lú cabe ndaani cueva ne lade ca guie sti dani.
16 Ne na cabe rabi cabe ca dani ne ca guie que:
―Laguiaba luguiá du,
laucaachi laadu ti qué guꞌya ni zuba lu trono que laadu ne cadi usaba ná Dendxu huiini que laadu.
17 Purti ma gunda dxi roꞌ nexhe guiaba ná binni,
ne tuu ndi zanda guni huantar ni.