Ra qué idxela gá cabe tu uxhele guiꞌchiꞌ
5
Ne biiya naaze ni zuba lu trono que ti guiꞌchi lu náꞌ ladu derechu,
cá nezalú ne neza deche.
Dopa ni,
ne guiꞌdi né ni gadxe sellu.
2 Ne biiya ti ángel nandxóꞌ cucaa ridxi:
―Tu risaca biaꞌ para uxhele guiꞌchi ri ne indadi ca sellu stini.
3 Peru iruti nuu para uxhele ni,
nin ibáꞌ,
nin guidxilayú,
nin xaguete guidxilayú.
Dede nin para guuya dxí si ca ni qué ñanda.
4 Ne bicaa ridxi biina purti qué nidxela iruti ni nuu para uxhele guiꞌchi que,
nin ñuunda ni,
nin ñuuya dxí ni.
5 Oraque na tobi de ca binni gola que rabi naa:
―Cadi guꞌna luꞌ.
Nuu tobi ni nuu para uxhele ni,
tobi ni zeeda lade xfamilia Judá,
za de David,
ne zeda aca casi ti lion.
Laa nuu para indadi gadxe sellu stini que,
ne uxhele ni,
purti gudixhe dxí irá ni bicaa lú laa.
6 Oraque biiya zuhuaa ti Dendxu huiini nezalú trono que,
galahui de ca bultu ne ca binni gola que,
rihuinni ra biiti cabe laa.
Napa gadxe cachu ne gadxe guielú,
ne ca guielú que riníꞌ gadxe espíritu sti Dios ni biseenda idubi guidxilayú.
7 Ucuaa be guiꞌchi naaze ni zuba lu trono que.
8 Ne casi unaaze be guiꞌchi que bizuxibi idapa bultu que ne ca binni gola que nezalú be.
Cada binni gola napa ti arpa ne ti braseru de oro dxá de guꞌxhu rindáꞌ naxhi.
Zeda aca guꞌxhu que stiidxa ca xpinni Dios ra uníꞌ né ca laa.
9 Cayuunda ca ti cantu cubi.
Sicarí na ni:
Lii risaca lu biaꞌ para icaa lu guiꞌchi ca ne indadi lu ca sellu stini.
Purti guti lu ne uzíꞌ neu laadu rini stiuꞌ para Dios,
irá du ni za du de irá ladu,
de irá guidxi ne de irá idioma ni riníꞌ binni.
10 Ne biꞌni lu laadu sacerdote para guni du xhiiña Dios,
ne rey para guni mandar du binni guidxilayú.
11 Oraque biiya dxie ne bina diaꞌga stidxi jma ángel,
de nin iruti ñanda nugaba laacaꞌ,
naguu ca leꞌ trono que,
ne stidxi ca bultu que,
ne stidxi ca binni gola que.
12 Cucaa ca ridxi:
Risaca Dendxu huiini biiti cabe que.
Naquiiñe udxiꞌba nu laa purti nandxóꞌ
ne risaca ne riene ne napa stipa.
13 Ne laca bina diaꞌga stidxi irá ni bizáꞌ Dios,
irá ni nuu ibáꞌ ne ni nuu ndaani guidxilayú ne xaguete guidxilayú ne ndaani nisadóꞌ na caꞌ:
Cadi guiaana dxí nu de udxiꞌba nu ne usisaca nu ni zuba lu trono ca,
ne Dendxu huiiniꞌ.
Stícabe irá enda risaca ne irá enda nandxóꞌ.
14 Ne na idapa bultu que:
―Zacá aca ni.
Ne bizuxibi ca binni gola que bisisaca ca ni qué ziuu dxi gatiꞌ.